டாடா பஞ்ச்-க்கு ‘செக்’ வைக்கும் மாருதி! கம்மி விலையில் மிரட்டலான மைக்ரோ-எஸ்யூவி Y43

டாடா பஞ்ச் காருக்கு போட்டியாக, மாருதி சுஸுகி நிறுவனம் 'Y43' என்ற புதிய மைக்ரோ-எஸ்யூவியை களமிறக்க உள்ளது. இது தொடர்பான முழு விவரங்களை இந்த செய்தியில் பார்க்கலாம்.

டாடா பஞ்ச்க்கு போட்டியாக மாருதி சுஸுகி

இந்தியாவின் மைக்ரோ-எஸ்யூவி செக்மென்ட்டில் டாடா பஞ்ச் காருக்கு நேரடிப் போட்டியாக ஒரு புதிய காரை களமிறக்க மாருதி சுஸுகி தயாராகி வருகிறது. 'Y43' என்ற கோட் பெயரில் உருவாக்கப்படும் இந்த கார், டாடா பஞ்சுக்கு கடும் போட்டியை உருவாக்கும் என எதிர்பார்க்கப்படுகிறது. இந்த காரில் 3-சிலிண்டர் இன்ஜின் பொருத்தப்படலாம். இது 80 hp பவரையும், 101.8 Nm டார்க்கையும் வெளிப்படுத்தும் திறன் கொண்டது. இதில் சிஎன்ஜி வேரியன்ட்டும் அறிமுகம் செய்யப்படலாம் என தகவல்கள் தெரிவிக்கின்றன.

சிஎன்ஜி வேரியன்ட்டும் வரலாம்

இந்த புதிய Y43 கார், சுமார் 3.8 மீட்டர் நீளம், 1.7 மீட்டருக்கும் அதிகமான அகலம், மற்றும் 1.6 மீட்டருக்கும் அதிகமான உயரம் கொண்டிருக்கும் என எதிர்பார்க்கப்படுகிறது. இதன் வீல்பேஸ் சுமார் 2.5 மீட்டராக இருக்கலாம். மாருதியின் புதிய Z12E 1.2 லிட்டர், 3-சிலிண்டர் பெட்ரோல் இன்ஜின் இதில் பயன்படுத்தப்படலாம். இந்த இன்ஜின் 80 bhp பவரையும், 111.7 Nm டார்க்கையும் உருவாக்கும். இதன் சிஎன்ஜி வேரியன்ட் 69 bhp பவரையும், 101.8 Nm டார்க்கையும் வெளிப்படுத்தும் என கூறப்படுகிறது.

2027-ல் அறிமுகம்

மாருதி சுஸுகி நிறுவனம் Y43 காரை 2027-ம் ஆண்டின் தொடக்கத்தில் அறிமுகம் செய்ய திட்டமிட்டுள்ளது. இதன் பேஸ் மாடலின் எக்ஸ்-ஷோரூம் விலை ரூ. 5.25 லட்சம் முதல் ரூ. 5.50 லட்சம் வரை இருக்கலாம் என எதிர்பார்க்கப்படுகிறது. அடுத்த 5-6 ஆண்டுகளில் 7 புதிய எஸ்யூவி-க்களை அறிமுகப்படுத்த மாருதி திட்டமிட்டுள்ளது. அதில் இந்த மாடலும் ஒன்றாகும். தற்போது எஸ்யூவி பிரிவில் சுமார் 20% சந்தைப் பங்கைக் கொண்டுள்ள மாருதி, புதிய மாடல்கள் மூலம் தனது இடத்தை மேலும் வலுப்படுத்த இலக்கு வைத்துள்ளது.

மாருதியின் அடுத்த பெரிய அறிமுகம் 'YMC' என்ற கோட் பெயரில் வரவிருக்கும் முழுமையான எலக்ட்ரிக் எம்பிவி ஆகும். இந்த எலக்ட்ரிக் காருக்குப் பிறகு, நிறுவனம் மீண்டும் என்ட்ரி-லெவல் கார்களில் கவனம் செலுத்தும்.

பிரெஸ்ஸா ஃபேஸ்லிஃப்ட்

சப்-காம்பாக்ட் எஸ்யூவி பிரிவில் மிகவும் பிரபலமான மாடல்களில் ஒன்று மாருதி சுஸுகி பிரெஸ்ஸா. இந்த காருக்கு விரைவில் ஒரு புதிய ஃபேஸ்லிஃப்ட் அப்டேட் வரவுள்ளது. இந்த முறை, காரின் அடிப்பகுதியில் சிஎன்ஜி டேங்க் பொருத்தப்படுவதுதான் இதன் முக்கிய ஹைலைட்டாக இருக்கும். சமீபத்தில் அறிமுகமான 'விக்டோரிஸ்' (Victoris) மாடலைப் போலவே, புதிய பிரெஸ்ஸா ஃபேஸ்லிஃப்ட்டிலும் அண்டர்பாடி சிஎன்ஜி டேங்க் இடம்பெறும். இதில் தற்போதைய அதே 1.5 லிட்டர் பெட்ரோல் இன்ஜின் தான் பயன்படுத்தப்படும். இந்த இன்ஜின் பெட்ரோல் மோடில் 102 bhp பவரையும் 137 Nm டார்க்கையும், சிஎன்ஜி மோடில் 87 bhp பவரையும் 121.5 Nm டார்க்கையும் உருவாக்கும்.