50% விற்பனை சரிவை சந்தித்த ஓலா.. இவி ஸ்கூட்டர் சந்தையில் புதிய ராஜா யார்?
2025-ல் இந்திய எலக்ட்ரிக் இருசக்கர வாகன சந்தையில் ஓலா எலக்ட்ரிக் 50% மேல் விற்பனை சரிவை சந்தித்துள்ளது. இந்த மாற்றங்கள் இருந்தபோதிலும், ஒட்டுமொத்த இந்திய இவி சந்தை 11% வளர்ச்சி கண்டுள்ளது.
2025-ம் ஆண்டு இந்திய எலக்ட்ரிக் இருசக்கர வாகனம் சந்தையில் பெரிய மாற்றங்களை கொண்டு வந்த ஆண்டாக அமைந்துள்ளது. இந்திய ஆட்டோமொபைல் டீலர்கள் சங்க கூட்டமைப்பு வெளியிட்ட சமீபத்திய விற்பனைத் தகவல்கள், சந்தையின் முன்னணி நிறுவனங்களின் நிலைப்பாட்டில் குறிப்பிடத்தக்க மாற்றம் ஏற்பட்டுள்ளதைக் காட்டுகின்றன. ஒருகாலத்தில் சந்தையை ஆதிக்கம் செலுத்திய ஓலா எலக்ட்ரிக் (Ola Electric) இந்த ஆண்டு கடும் சரிவை சந்தித்துள்ளது என்பது முக்கியமான விஷயமாக பார்க்கப்படுகிறது.
2025-ல் ஓலா எலக்ட்ரிக்கின் மொத்த விற்பனை 1.99 லட்சம் யூனிட்கள் மட்டுமே பதிவாகியுள்ளது. கடந்த 2024-ல் 4.07 லட்சத்துக்கும் அதிகமாக இருந்த விற்பனையுடன் ஒப்பிடும்போது, இது 50 சதவீதத்துக்கும் அதிகமான வீழ்ச்சியாகும். இந்த சரிவு இருந்தாலும், ஓலா எலக்ட்ரிக் இந்தியாவின் டாப் 5 எலக்ட்ரிக் இருசக்கர வாகன நிறுவனங்களில் ஒன்றாகத் தொடர்கிறது. ஆனால், அதன் வளர்ச்சி வேகம் குறைந்துள்ளது.