காரில் ஆஃப்டர் மார்க்கெட் சன்ரூஃப் மாட்டினால் வாரண்டி கிடையாதா? முழு விவரம் இதோ!

Aftermarket Sunroof: கார் நிறுவனங்கள் வாடிக்கையாளர்களின் பாதுகாப்புக்காகவே காரை டிசைன் செய்கின்றன. அதில் ஆஃப்டர் மார்க்கெட் சன்ரூஃப் வைத்தால் வாரண்டி ரத்து ஆகுமா? இது தொடர்பான முழு சந்தேகங்களை இந்த செய்தியில் விரிவாக பார்க்கலாம்.

காருக்கு ஆஃப்டர் மார்க்கெட் சன்ரூஃப் போடுவது நல்லதா?

இப்போதெல்லாம் கார்களை மாடிஃபை செய்வது பெரிய ட்ரெண்டாகி விட்டது. சிலர் புது லைட், பெரிய இன்ஃபோடெயின்மென்ட் சிஸ்டம், அலாய் வீல் என பல விஷயங்களை மாற்றுகிறார்கள். கம்பெனியில் சன்ரூஃப் கொடுக்கவில்லை என்றால், சிலர் ஆஃப்டர் மார்க்கெட் சன்ரூஃப் போட்டுக்கொள்கிறார்கள். ஆனால், இது காரின் லுக்கை மாற்றுவதோடு, வாரண்டியையும் பாதிக்கும் என்பது பலருக்கும் தெரிவதில்லை.

ஆஃப்டர் மார்க்கெட் சன்ரூஃப் வைக்க, காரின் மேற்கூரையை வெட்ட வேண்டும். இது சாதாரண ப்ளக் அண்ட் ப்ளே வேலை கிடையாது. காரின் பாடியில் கட்டிங், ட்ரில்லிங், வெல்டிங் என பெரிய மாற்றங்களைச் செய்வதால் வாரண்டிக்கு சிக்கல் வரலாம்.

வாரண்டி ரத்து ஆகுமா?

ஆஃப்டர் மார்க்கெட் சன்ரூஃப் வைக்கும்போது, எந்தப் பாகத்தில் மாற்றம் செய்கிறோமோ அந்தப் பாகத்தின் வாரண்டிக்கு சிக்கல் வரலாம். மேற்கூரையை வெட்டும்போது, அந்த இடத்தில் தண்ணீர் கசியலாம். துருப்பிடிக்கலாம் அல்லது காரின் பாடியில் வேறு பிரச்சனைகள் வரலாம். இப்படி நடந்தால், வாரண்டியில் அதை சரிசெய்ய கம்பெனிகள் மறுக்க வாய்ப்புள்ளது. ஆனால், இதற்காக எஞ்சின் அல்லது சன்ரூஃபுக்கும் சம்பந்தமே இல்லாத மற்ற பாகங்களின் வாரண்டி தானாக ரத்தாகிவிடும் என்று அர்த்தமில்லை.

ரூஃப் கட்டிங் பெரிய சிக்கலைத் தரும்

காரின் பாடியும் மேற்கூரையும் ஃபேக்டரியிலேயே ஒரு குறிப்பிட்ட டிசைனில் உருவாக்கப்படுகின்றன. ஆஃப்டர் மார்க்கெட் சன்ரூஃப் வைக்க அதை வெட்டும்போது, காரின் ஒரிஜினல் டிசைன் மாறுகிறது. சன்ரூஃப் வைக்கும்போது சீலிங் மற்றும் தண்ணீர் வெளியேறும் ட்ரைனேஜ் சிஸ்டத்திலும் மாற்றம் செய்ய வேண்டும். ஃபிட்டிங் சரியாக இல்லை என்றால், மழைநீர் காருக்குள் புகுந்துவிடும் அபாயம் உள்ளது. நீண்ட நாட்களுக்கு ஈரம் இருந்தால், காருக்குள் இருக்கும் எலக்ட்ரிக்கல் பாகங்களும் வீணாகிவிடும்.

வாரண்டி பாலிசியை கவனியுங்கள்

ஒவ்வொரு கார் கம்பெனியின் வாரண்டி விதிகளும் வேறுபடும். சில கம்பெனிகள் காரின் ஒரிஜினல் டிசைனில் மாற்றம் செய்தால் வாரண்டியை மாற்றிவிடுவார்கள். இன்னும் சில கம்பெனிகள், அங்கீகாரம் இல்லாத மாற்றங்கள் அல்லது தவறான ரிப்பேர் வேலைகளால் வரும் சேதங்களை வாரண்டியில் சேர்க்க மாட்டார்கள். அதனால், ஆஃப்டர் மார்க்கெட் சன்ரூஃப் வைத்த உடனே மொத்த காரின் வாரண்டியும் ரத்தாகிவிடும் என்று சொல்ல முடியாது. ஆனால், சன்ரூஃப் தொடர்பான சேதங்களுக்கு வாரண்டி க்ளைம் கிடைக்காமல் போக அதிக வாய்ப்புள்ளது.

புது காரில் இப்படி ஒரு மாற்றம் செய்ய நினைத்தால், முதலில் உங்கள் அதிகாரப்பூர்வ டீலரிடம் எழுத்துப்பூர்வமாக தகவல் வாங்குவது பாதுகாப்பானது. ஆக்சஸரீஸ் கடைக்காரர் 'வாரண்டிக்கு எந்தப் பிரச்சனையும் வராது' என்று சொல்வதை அப்படியே நம்பிவிடாதீர்கள். கம்பெனியின் அனுமதி மற்றும் ஃபிட்டிங் தொடர்பான நிபந்தனைகள் இருந்தால், அதை பத்திரமாக வைத்துக்கொள்ளுங்கள்.

இன்சூரன்ஸிலும் சிக்கல் வரும்

சன்ரூஃப் வைப்பதால் வாரண்டிக்கு மட்டுமில்லாமல், காரின் இன்சூரன்ஸுக்கும் சிக்கல் வரலாம். காரில் பெரிய அளவில் மாற்றங்கள் செய்யும்போது, அதைப்பற்றி இன்சூரன்ஸ் கம்பெனிக்கு கட்டாயம் தெரிவிக்க வேண்டும்.