இந்திய இளைஞருக்கு 23 வயதில் ரூ. 3.6 கோடி சம்பளத்தில் வேலை! எப்படி கிடைத்தது தெரியுமா?

இந்தியாவைச் சேர்ந்த 23 வயது இளைஞருக்கு Meta-வில் ரூ. 3.6 கோடி சம்பளத்தில் வேலை கிடைத்தது. AI மற்றும் மெஷின் லேர்னிங்கில் சாதிக்க விரும்பும் மாணவர்களுக்கு அவர் கூறும் டிப்ஸ்களை இங்கே அறியுங்கள்.

23 வயதே ஆன இந்திய வம்சாவளியைச் சேர்ந்த மனோஜ் தூமு என்ற இளைஞர், Meta நிறுவனத்தில் ஒரு கனவு வேலையைப் பெற்றுள்ளார். அவர், ஆண்டிற்கு ரூ. 3.6 கோடி சம்பளத்தில் மெட்டாவில் மெஷின் லேர்னிங் சாஃப்ட்வேர் இன்ஜினியராகச் சேர உள்ளார். இதற்கு முன்பு அமேசான் நிறுவனத்தில் பணியாற்றிய மனோஜ், தனது பயணத்தையும், AI துறையில் சாதிக்க விரும்பும் மாணவர்களுக்கான மதிப்புமிக்க ஆலோசனைகளையும் பகிர்ந்து கொண்டுள்ளார்.

அமேசானில் இருந்து Meta-விற்கு ஒரு புதிய பாதை!

Meta-வில் கிடைத்த வாய்ப்பு குறித்து மனோஜ், Business Insider-க்கு அளித்த பேட்டியில் தனது உற்சாகத்தை வெளிப்படுத்தியுள்ளார். அமேசானில் பணியாற்றியபோது கிடைத்த அனுபவங்கள் மிகவும் மதிப்புமிக்கவை என்றாலும், வேகமாக மாறிவரும் AI மற்றும் மெஷின் லேர்னிங் துறையில் மேலும் சவாலான பொறுப்புகளைத் தேடினார். மனிதர்களின் முடிவுகளை நம்பியிருந்த பழைய தொழில்நுட்பங்களில் இருந்து, தானாகவே கற்றுக்கொள்ளும் டீப் லேர்னிங் மாடல்களுக்கு இந்தத் துறை எப்படி மாறியுள்ளது என்பதையும் அவர் எடுத்துரைத்தார்.

AI துறையில் நுழைய மனோஜ் தரும் டிப்ஸ்!

இளைஞர்களுக்கு தனது அனுபவத்தின் மூலம் சில முக்கிய ஆலோசனைகளை மனோஜ் வழங்கியுள்ளார்:

• வேலை தலைப்பு முக்கியமில்லை: AI துறையில் 'அப்ளைடு சயின்டிஸ்ட்', 'ரிசர்ச் சயின்டிஸ்ட்', 'மெஷின் லேர்னிங் இன்ஜினியர்' அல்லது 'சாஃப்ட்வேர் இன்ஜினியர்' என பல வேலை தலைப்புகள் உள்ளன. எந்த தலைப்பாக இருந்தாலும், உங்கள் பணித்திறன் தான் முக்கியம்.

• இன்டர்ன்ஷிப் அனுபவம் முக்கியம்: கல்லூரி படிக்கும்போது, குறைந்த சம்பளம் என்றாலும் இன்டர்ன்ஷிப்களில் கவனம் செலுத்த வேண்டும். அவை AI மற்றும் மெஷின் லேர்னிங் துறையில் முக்கியமான அனுபவத்தை அளிக்கும்.

• திறன் மீது கவனம்: ஆரம்பத்தில் அதிக சம்பளத்தை விட, உங்களின் திறன்களை மேம்படுத்துவதில் கவனம் செலுத்த வேண்டும். வலுவான திறன்களை வளர்த்துக்கொண்டால், பின்னர் அதிக சம்பளம் தரும் வேலைகளை எளிதாகப் பெறலாம்.

2022-ல் தனது முதுகலைப் படிப்பை முடித்த மனோஜ், விரைவிலேயே AI துறையில் பணியாற்றத் தொடங்கினார். இந்த துறையில் அவருக்குக் கிடைத்த ஆரம்ப அனுபவமே, மெட்டாவில் இந்த கனவு வேலையைப் பெற உதவியது என்றும் அவர் நம்புகிறார்.