இனி தலைகிழா நின்னு தண்ணீர் குடிச்சாலும் வேலையே கிடைக்காது: AI-யின் ரூட்டு தல எச்சரிக்கை

செயற்கை நுண்ணறிவின் முன்னோடி ஜியோஃப்ரி ஹிண்டன், AI தொழில்நுட்பம் வேலையின்மையைத் தூண்டி, ஒரு சிலரின் கைகளில் செல்வத்தைக் குவிக்கும் என எச்சரிக்கிறார். கூகுளை விட்டு விலகிய அவர், AI-யின் அபாயங்கள் குறித்துப் பேசுகிறார்.

செயற்கை நுண்ணறிவு (AI) தொழில்நுட்பத்தின் அபரிமிதமான வளர்ச்சி, இன்று உலகை மாற்றியமைத்து வருகிறது. ஆனால், இந்தத் துறையின் அடிப்படைப் பணிகளை உருவாக்கியவரான, ‘செயற்கை நுண்ணறிவின் தந்தை’ என அழைக்கப்படும் ஜியோஃப்ரி ஹிண்டன் (Geoffrey Hinton), இந்த வளர்ச்சியின் இருண்ட பக்கங்கள் குறித்துத் தீவிரமான எச்சரிக்கையை விடுத்திருக்கிறார்.

ஹிண்டனின் திடீர் விலகல் ஏன்?

2024-ல் நோபல் பரிசு பெற்ற ஹிண்டன், அண்மையில் கூகுள் நிறுவனத்திலிருந்து வெளியேறினார். இதற்குக் காரணம், AI-யின் அபாயங்கள் குறித்து எந்தத் தயக்கமும் இல்லாமல் சுதந்திரமாகப் பேச வேண்டும் என்பதே. மைக்ரோசாஃப்ட் நிறுவனம் தனது தேடுதளத்தில் சாட்போட்களை இணைத்த பிறகு, AI தொழில்நுட்பம் வணிகப்போட்டிக்கு உட்படுத்தப்படுவதை அவர் கவனித்தார். இது, தொழில்நுட்ப நிறுவனங்கள் AI-யை பாதுகாப்பான வழியில் கையாள மாட்டார்கள் என்ற அச்சத்தை அவருக்கு ஏற்படுத்தியது.

வேலையில்லாத் திண்டாட்டம் மற்றும் செல்வக் குவிப்பு

ஒரு நேர்காணலில் பேசிய ஹிண்டன், "AI, பெரிய நிறுவனங்களின் லாபத்தை அதிகரிக்கும். அதேநேரம், மனித வேலைவாய்ப்புகளைப் பறித்து, பெரிய அளவிலான வேலையின்மையைத் தூண்டும்" என்று கூறினார். மேலும், "பணக்காரர்கள் AI-யைப் பயன்படுத்தி தொழிலாளர்களை நீக்குவார்கள். இது பெரும் வேலையின்மையை உருவாக்கி, சிலரை மட்டும் பெரும் பணக்காரர்களாக மாற்றும். இது AI-யின் தவறு அல்ல, மாறாக, முதலாளித்துவ அமைப்பின் இயல்பு" என்று அவர் நேரடியாகவே சாடினார்.

மனிதர்களுக்கு இணையாகும் சாட்போட்கள்: ஓர் அபாயம்

AI சாட்போட்களால் ஏற்படும் அபாயங்கள் குறித்துப் பேசிய ஹிண்டன், "அது மிகவும் பயங்கரமானது" என்றார். சாட்போட்கள் மனிதர்களை விட அதிக புத்திசாலித்தனம் அடைந்து, தவறான நபர்களால் பயன்படுத்தப்படலாம் என எச்சரித்தார். இது, போலிச் செய்திகள், ஸ்பேம் மெசேஜ்கள் மற்றும் அரசியல் பிரச்சாரங்களை எளிதாக உருவாக்க உதவும். சர்வாதிகாரத் தலைவர்கள் தங்கள் மக்களைக் கையாளுவதற்கு இதை ஒரு கருவியாகப் பயன்படுத்தலாம் என்றும் அவர் கூறினார்.

தொழில்நுட்ப நிறுவனங்களின் மௌனம்

பெரிய தொழில்நுட்ப நிறுவனங்கள், AI-யின் அபாயங்களை பொதுவெளியில் குறைத்து மதிப்பிடுவதாக ஹிண்டன் குற்றம் சாட்டினார். "பல நிறுவனங்களில் உள்ளவர்களுக்கு, இந்த அபாயங்கள் குறித்து நன்கு தெரியும். ஆனாலும், அவர்கள் அதனைப் பொதுவெளியில் பேசுவதில்லை" என்று அவர் கூறினார். AI-யின் வளர்ச்சி வேகம் யாரும் எதிர்பாராத அளவுக்கு அதிகரித்துள்ளதாகவும், இதற்கான கட்டுப்பாடுகளை உடனடியாகக் கொண்டு வர வேண்டும் எனவும் அவர் வலியுறுத்தினார்.

ஜியோஃப்ரி ஹிண்டனின் இந்த அச்சமும், எச்சரிக்கையும், தொழில்நுட்பத்தின் எதிர்காலம் குறித்து ஒரு புதிய விவாதத்தைத் தொடங்கியுள்ளது. AI மனிதகுலத்திற்கு வரமா, சாபமா என்ற கேள்விக்கு, எதிர்காலம்தான் பதில் சொல்ல வேண்டும். ஆனால், இப்போதைக்கு, அதன் வளர்ச்சிக்கு நாம் எச்சரிக்கையாகவும், பொறுப்புணர்வுடனும் அணுக வேண்டியது அவசியம் என்பதை ஹிண்டனின் வார்த்தைகள் உணர்த்துகின்றன.