ஹோட்டல் ஸ்டைல் பூரி உப்பலாக வேண்டுமா?

வீட்டில் செய்யும் பூரியும் ஹோட்டல் ஸ்டைலில் உப்பலாக வர என்ன செய்ய வேண்டும் என்று பார்க்கலாம்.

கோதுமை மாவு - 500 கிராம், மைதா - 100 கிராம், ரவை - 50 கிராம், எண்ணெய் - 50 மி.லி., பொரிப்பதற்கு எண்ணெய் - 1 லிட்டர், தண்ணீர் - 100 முதல் 150 மி.லி., உப்பு - தேவையான அளவு.

500 கிராம் கோதுமை மாவு, 50 கிராம் ரவை, 100 கிராம் மைதாவை ஒன்றாகக் கலக்கவும். அதனுடன் உப்பு மற்றும் எண்ணெய் சேர்க்கவும். இதனால் பூரி எண்ணெய் குடிக்காது.

இப்போது, பூரி மாவில் தேவையான அளவு தண்ணீர் ஊற்றி, நன்றாகப் பிசைந்துகொள்ளுங்கள். பிசைந்த மாவை ஒரு 10 நிமிடங்கள் அப்படியே ஊறவைத்தால், மாவு மென்மையாகிவிடும்.

பத்து நிமிடங்கள் கழித்து, மாவை மீண்டும் உங்கள் உள்ளங்கையால் அழுத்திப் பிசையுங்கள். பிறகு, மாவைச் சிறிய உருண்டைகளாகப் பிரித்து, கோதுமை மாவு தொட்டு பூரியாகத் தேய்க்கவும்.

இப்போது ஒரு வாணலியில் எண்ணெய் ஊற்றி சூடாக்கி, தேய்த்துவைத்த பூரிகளைப் பொரித்தெடுக்கவும். ஒரு பக்கம் வெந்ததும், மறுபக்கம் திருப்பினால், பூரி பலூன் போல உப்பி, பொன்னிறமாக மாறும்.