டெல்லியின் சூப்பர் ஹீரோ ஜாக் பிரேசர் மெக்கர்க்கை கண்டு கொள்ளாத ஆஸ்திரேலியா!

ஜூன் 1 ஆம் தேதி முதல் ஜூன் 29 ஆம் தேதி வரையில் நடைபெறும் 9ஆவது டி20 உலகக் கோப்பைக்கான ஆஸ்திரேலியா அணி நேற்று அறிவிக்கப்பட்டது. இதில், டெல்லி கேபிடல்ஸின் அதிரடி வீரர் ஜாக் பிரேசர் மெக்கர்க் இடம் பெறவில்லை.

ஐபிஎல் கிரிக்கெட் திருவிழாவில் டெல்லி கேபிடல்ஸ் அணியில் இடம் பெற்று விளையாடி வரும் ஜாக் பிரேசர் மெக்கர்க், 6 போட்டிகளில் இடம் பெற்று விளையாடியுள்ளார். இதில், 3 அரைசதம் உள்பட 259 ரன்கள் குவித்துள்ளார்.

அப்படிப்பட்ட மெக்கர்க்கை டி20 உலகக் கோப்பைக்கான அணியில் ஆஸ்திரேலியா எடுக்கவில்லை. எனினும், உலகக் கோப்பை தொடர் தொடங்குவதற்கு இன்னும் ஒரு மாதம் இருக்கும் நிலையில், ஆஸ்திரேலியா அணியில் மாற்றம் செய்யப்படும். அதில் மெக்கர்க் இடம் பெறலாம் என்று எதிர்பார்க்கப்படுகிறது.

டி20 உலகக்கோப்பை தொடருக்கான ஆஸ்திரேலியா அணியின் கேப்டனாக மிட்சல் மார்ஷ் நியமிக்கப்பட்டார். கடந்த 2021 ஆம் ஆண்டு டி20 உலகக் கோப்பையை ஆஸ்திரேலியா வெல்ல காரணமாக இருந்தவர் மிட்செல் மார்ஷ். ஆதலால், அவர் கேப்டனாக நியமிக்கப்பட்டுள்ளார்.

ஆனால், கடந்த ஆண்டு நடைபெற்ற ஒருநாள் கிரிக்கெட் உலகக் கோப்பையை வென்று கொடுத்த பேட் கம்மின்ஸ் கேப்டனாக நியமிக்கப்படவில்லை. மேலும், ஸ்டீவ் ஸ்மித் மற்றும் ஐபிஎல் அதிரடி மன்னன் ஜாக் பிரேசர் மெக்கர்க் ஆகியோரும் இடம் பெறவில்லை.

டி20 உலகக் கோப்பைக்கான ஆஸ்திரேலியா வீரர்கள்:

மிட்செல் மார்ஷ் (கேப்டன்), டேவிட் வார்னர், மிட்செல் ஸ்டார்க், பேட் கம்மின்ஸ், ஆஸ்டன் அகர், மேத்யூ வேட், டிராவிஸ் ஹெட், ஜோஸ் இங்கிலிஸ், கிளென் மேக்ஸ்வெல், மார்கஸ் ஸ்டோய்னிஸ், டிம் டேவிட், நேதன் எல்லீஸ், கேமரூன் க்ரீன், ஜோஸ் ஹசல்வுட், ஆடம் ஜம்பா.

இதில், வார்னர், ஸ்டார்க், கம்மின்ஸ், ஹெட், ஜாக் பிரேசர் மெக்கர்க், மேக்ஸ்வெல், டிம் டேவிட், ஸ்டோய்னிஸ், கேமரூன் க்ரீன் ஆகியோர் ஐபிஎல் கிரிக்கெட்டில் சிறப்பாக விளையாடி வருகின்றனர் என்பது குறிப்பிடத்தக்கது.