Asianet News Tamil

Vaibhav Suryavanshi: "சுடு தண்ணி மட்டும் குடிப்பா.." வைபவ் சூர்யவன்ஷிக்கு ரசிகை அட்வைஸ்.. பாலகன் ரியாக்ஷன் வீடியோ பாருங்க!

Rayar A — Wed, 28 Oct 2026 21:53:44 +0530

Vaibhav Suryavanshi: நியூசிலாந்து டி20 தொடரில் பங்கேற்றுள்ள இந்திய அணி இளம் வீரர் 15 வயதான பாலகன் வைபவ் சூர்யவன்ஷிக்கு தாய் போன்று ஒரு ரசிகை செய்த அட்வைஸ் இணையத்தில் வைரலாகி வருகிறது.

வெலிங்டனில் நடந்த இந்தியா - நியூசிலாந்து இடையேயான 3வது டி20 போட்டிக்கு பிறகு, இந்திய அணியின் இளம் வீரர் 15 வயதான பாலகன் வைபவ் சூர்யவன்ஷிக்கு தாய் போன்ற ஒரு ரசிகை ஸ்பெஷல் அட்வைஸ் கொடுத்துள்ளார். இந்த மேட்சில் ஓப்பனிங் இறங்கிய வைபவ், வெறும் 19 பந்துகளில் 45 ரன்களை விளாசினார்.

இந்திய அணி போட்டியையும் தொடரையும் வென்ற பிறகு, ரசிகர்களுக்கு ஆட்டோகிராப் போட்டுக்கொண்டிருந்தார் வைபவ். அப்போது அங்கு வந்த ஒரு பெண், "ஹலோ வைபவ்! நாங்களும் பாலியா (Ballia) ஊர்க்காரங்க தான். இங்க ரொம்ப குளிரா இருக்கு. அதனால பச்சை தண்ணி குடிக்காத, சுடு தண்ணி மட்டும் குடிப்பா" என்று அன்பாக கூறினார். தனது சொந்த ஊரான பாலியாவின் பெயரைக் கேட்டதும் வைபவ் முகத்தில் பெரிய சிரிப்பு வந்தது. உடனே அவர், "சரிங்க, ஓகே" என்று கியூட்டாக பதில் அளித்தார்.

Girl to Vaibhav Suryavanshi :- “Don't drink cold water. Try to avoid it, otherwise, it might affect your health.

Then, at the 19-second mark, she gently places her hand on Vaibhav's head, blessing him like a big sister.

That's the kind of love and respect Vaibhav has earned at such a young age.

— Cricketplusmeme (@cricketplusmeme) October 27, 2026

இந்திய கிரிக்கெட் அணி உலகத்தில் எந்த மூலைக்கு விளையாடப் போனாலும், அங்க நம்ம ரசிகர்களோட கூட்டம் கண்டிப்பாக இருக்கும். நியூசிலாந்து சுற்றுப்பயணமும் அதற்கு விதிவிலக்கல்ல. இந்த டி20 தொடரில் இந்திய வீரர்களை உற்சாகப்படுத்த நிறைய ரசிகர்கள் மைதானத்திற்கு வந்திருந்தனர். மேட்ச் முடிஞ்சதும் வீரர்களிடம் அவர்கள் பேசும் சின்ன சின்ன விஷயங்கள் கூட சில நேரங்களில் வைரலாகிவிடும்.

அப்படித் தான் வைபவ் சூர்யவன்ஷிக்கு அந்த பெண் ரசிகை கொடுத்த அட்வைஸ் இப்போது இணையத்தில் ட்ரெண்டாகி வருகிறது. வெளிநாட்டில் விளையாடும் ஒரு இளம் வீரரை, தன் சொந்த ஊர் பையனாக நினைத்து அந்தப் பெண் கொடுத்த அட்வைஸ் நெட்டிசன்களின் மனதை வென்றுள்ளது. சோஷியல் மீடியாவில் இந்த வீடியோ பரவியதும், அந்தப் பெண்ணின் அன்பை பலரும் பாராட்டி வருகின்றனர்.

நியூசிலாந்துக்கு எதிரான 3வது டி20 போட்டியில் அபிஷேக் சர்மாவுடன் ஓப்பனிங் இறங்கிய வைபவ், 7.1 ஓவர்களில் 133 ரன்கள் பார்ட்னர்ஷிப் அமைத்தார். இவர் 4 பவுண்டரிகள் மற்றும் 4 சிக்ஸர்களை பறக்கவிட்டார். இந்த ஓப்பனிங் ஜோடி வெறும் 5 ஓவர்களிலேயே 100 ரன்களை கடந்து மிரட்டியது.

பவர்பிளேயில் விக்கெட் இழப்பின்றி 118 ரன்களை இந்திய அணி குவித்தது. ஐசிசி-யின் முழு நேர உறுப்பினர் நாடுகளில், ஒரு டி20 போட்டியின் பவர்பிளேயில் அடிக்கப்பட்ட அதிகபட்ச ஸ்கோர் இதுதான். 199 ரன்கள் என்ற இலக்கை துரத்திய இந்திய அணி, வெறும் 13.2 ஓவர்களிலேயே 4 விக்கெட் இழந்து இலக்கை எட்டி 6 விக்கெட் வித்தியாசத்தில் இமாலய வெற்றி பெற்றது குறிப்பிடத்தக்கது.

என்னா அடி! அபிஷேக் சர்மா ருத்ரதாண்டவம்.. 35 பந்துகளில் சதம்.. சாதனை மேல் சாதனை படைத்த இந்தியா!

Rayar A — Tue, 27 Oct 2026 17:22:51 +0530

Abhishek Sharma: நியூசிலாந்துக்கு எதிரான 3வது டி20 போட்டியில் இந்திய வீரர் அபிஷேக் சர்மா வெறும் 35 பந்துகளில் சதம் விளாசி சாதனை படைத்தார். ஒரே போட்டியில் பல்வேறு சாதனைகளை இந்திய அணி படைத்தது.

இந்த போட்டியில் முதலில் பேட்டிங் செய்த நியூசிலாந்து அணி 20 ஓவர்களில் 3 விக்கெட் இழப்பிற்கு 198 ரன்கள் குவித்துது. டேரில் மிட்செல் 52 பந்துகளில் 89 ரன்கள் விளாசி இறுதிவரை ஆட்டமிழக்காமல் இருந்தார். ஃபின் ஆலன் (25 பந்துகளில் 40), பெவோன் ஜேக்கப்ஸ் (23 பந்துகளில் 39*) ஆகியோரும் சிறப்பான ஆட்டத்தை வெளிப்படுத்தினர். இந்திய அணி தரப்பில் அர்ஷ்தீப் சிங் 33 ரன்கள் கொடுத்து 1 விக்கெட்டும், நிதிஷ் குமார் ரெட்டி 23 ரன்கள் கொடுத்து 1 விக்கெட்டும் எடுத்தனர்.

பின்பு 199 ரன்கள் இலக்கை நோக்கி ஆடிய இந்திய அணி வீரர்கள் அதிரடியில் பட்டையை கிளப்பினார்கள். தொடக்க வீரர்களாக களமிறங்கிய அபிஷேக் சர்மாவும், வைபவ் சூர்யவன்ஷியும் ஆரம்பம் முதலே சிக்சர் மழை பொழிந்தனர். பவுண்டரிகளையும் ஓட விட்டனர். முதல் ஓவரில் மட்டும் 26 ரன்கள் நொறுக்கிய இந்திய அணி வெறும் 2.2 ஓவர்களில் 50 ரன்களை கடந்தது. இதன்மூலம் 14 பந்துகளில் அதிவேகமாக 50 ரன்களை தொட்ட முதல் அணி என்ற சாதனையை இந்தியா படைத்தது.

ஒருபக்கம் அபிஷேக் சர்மா நியூசிலாந்து பாஸ்ட் பவுலர்களின் ஓவர்களில் காட்டடி அடிக்க, மறுபக்கம் வைபவ் சூர்யவன்ஷியும் அதிரடியில் பட்டையை கிளப்பினார். இவர்களின் மின்னல்வேக அதிரடியால் பவர்பிளேவின் 6 ஓவர்களில் இந்திய அணி விக்கெட் இழப்பின்றி 118 ரன்கள் எடுத்து பிரம்மிக்க வைத்தது. இதன்மூலம் பவர்பிளேயில் அதிக ரன்கள் எடுத்த முதல் அணி என்ற உலக சாதனையையும் இந்திய அணி படைத்தது. தொடர்ந்து அட்டகாசமாக ஆடிய அபிஷேக் சர்மா வெறும் 15 பந்துகளில் அரைசதம் விளாசினார். இந்திய அணி 7 ஓவர்களில் 133 ரன்கள் குவித்தது.

மறுமுனையில் சூப்பராக விளையாடிய வைபவ் சூர்யவன்ஷி 19 பந்துகளில் 4 பவுண்டரி, 4 சிக்சருடன் 45 ரன்கள் அடித்து அவுட் ஆனார். அவர் அவுட் ஆனாலும் அபிஷேக் சர்மா தனது அதிரடியை நிறுத்துவதாக தெரியவில்லை. தொடர்ந்து மைதானத்தின் நாலாபுறமும் சிக்சர்களை பறக்க விட்ட அபிஷேக் சர்மா வெறும் 35 பந்துகளில் சதம் விளாசி சாதனை படைத்தார். தொடர்ந்து அவர் 38 பந்துகளில் 11 சிக்சர்கள், 9 பவுண்டரியுடன் 113 ரன்கள் எடுத்து அவுட் ஆனார்.

இதனைத் தொடர்ந்து இந்திய அணி 13.2 ஓவர்களில் 4 விக்கெட்டுகளை மட்டும் இழந்து 6 விக்கெட் வித்தியாசத்தில் இமாலய வெற்றி பெற்றது. சமீபத்தில் அயர்லாந்து மண்ணில் டி20 தொடரை இழந்த இந்திய அணி நியூசிலாந்து மண்ணில் மிக அசாத்தியமாக விளையாடி தொடரை கைப்பற்றி சாதனை படைத்துள்ளது. இன்னும் 2 போட்டிகளையும் வென்று நியூசிலாந்து அணியை முழுமையாக வொயிட் வாஷ் செய்யும் முனைப்பில் இந்திய அணி உள்ளது.

IND vs NZ T20: புயல் வேகத்தில் அர்ஷ்தீப் சிங்.. புவனேஷ்வர் குமாரின் சாதனையை தகர்த்து வரலாற்று சாதனை!

Rayar A — Sun, 25 Oct 2026 13:15:21 +0530

Arshdeep Singh Record: ஒரே ஆண்டில் டி20 கிரிக்கெட்டில் அதிக விக்கெட்டுகளை வீழ்த்திய இந்திய பவுலர் என்ற சாதனையை இந்திய வீரர் அர்ஷ்தீப் சிங் படைத்துள்ளார். புவனேஷ்வர் குமார் சாதனையை முறியடித்துள்ளார்.

டி20 கிரிக்கெட்டில் 150 விக்கெட்டுகளை வீழ்த்திய முதல் இந்தியர் என்ற சாதனையைப் படைக்க அர்ஷ்தீப்புக்கு இன்னும் இரண்டு விக்கெட்டுகள் மட்டுமே தேவை. இந்த ஆண்டில் மட்டும் அவர் 38 விக்கெட்டுகளை எடுத்துள்ளார்.

அவரது சராசரி 24.78, எகானமி ரேட் 9.25 மற்றும் சிறந்த பந்துவீச்சு 5/51 ஆகும். இதற்கு முன்பு புவனேஷ்வர் குமார் 32 ஆட்டங்களில் 37 விக்கெட்டுகளை எடுத்ததே சாதனையாக இருந்தது (சராசரி 19.56, இரண்டு 4 விக்கெட்டுகள், ஒரு 5 விக்கெட்).

உலக அளவில் பார்த்தால், ஒரே ஆண்டில் அதிக டி20 விக்கெட்டுகளை வீழ்த்திய சாதனை அயர்லாந்து பந்துவீச்சாளர் ஜோஷுவா லிட்டில் பெயரில் உள்ளது. அவர் 2022ஆம் ஆண்டில் 39 விக்கெட்டுகளை வீழ்த்தியிருந்தார்.

முன்னதாக நேற்று நடந்த நியூசிலாந்துக்கு எதிரான 2வது டி20 போட்டியில் இந்திய அணி 4 விக்கெட் வித்தியாசத்தில் வெற்றி பெற்றது. இந்த போட்டியில் முதலில் பேட்டிங் செய்த நியூசிலாந்து அணி பவர் பிளே முடிவதற்குள் நியூசிலாந்து 41 ரன்களுக்கு 3 விக்கெட்டுகளை இழந்து தடுமாறியது. எனினும், க்ளென் பிலிப்ஸ் (46 பந்துகளில் 70 ரன்கள், 4 பவுண்டரிகள், 6 சிக்சர்கள்), பெவோன் ஜேக்கப்ஸ் (46 பந்துகளில் 58 ரன்கள், 5 பவுண்டரிகள், 1 சிக்சர்) இருவரும் சேர்ந்து அணியை சரிவிலிருந்து மீட்டுவந்தனர். நான்காவது விக்கெட்டுக்கு இவர்கள் 116 ரன்கள் கூட்டணி அமைக்க, 20 ஓவர்களின் முடிவில் நியூசிலாந்து 5 விக்கெட் இழப்புக்கு 180 ரன்களைக் குவித்தது.

இந்திய அணியின் இடதுகை வேகப்பந்து வீச்சாளர் அர்ஷ்தீப் சிங் புதிய வரலாறு படைத்துள்ளார். ஒரே ஆண்டில் டி20 போட்டிகளில் அதிக விக்கெட்டுகளை வீழ்த்திய இந்திய பந்துவீச்சாளர் என்ற சாதனையை அவர் படைத்துள்ளார். இதற்கு முன்பு புவனேஷ்வர் குமார் வைத்திருந்த நான்கு ஆண்டு சாதனையை இப்போது அர்ஷ்தீப் முறியடித்துள்ளார்.

நியூசிலாந்தின் கிறிஸ்ட்சர்ச் நகரில் நடைபெற்ற இரண்டாவது டி20 போட்டியில்,4 ஓவர்கள் வீசிய அர்ஷ்தீப் 33 ரன்கள் மட்டும் விட்டுக்கொடுத்து 2 விக்கெட்டுகளை வீழ்த்தினார். டிம் சீஃபெர்ட், க்ளென் பிலிப்ஸ் ஆகியோரின் விக்கெட்டுகளை அவர் கைப்பற்றினார்.

இந்திய அணியின் பந்துவீச்சில் அர்ஷ்தீப் 2 விக்கெட்டுகளையும், புவனேஷ்வர் குமார், பிரின்ஸ் யாதவ், நிதிஷ் குமார் ரெட்டி தலா ஒரு விக்கெட்டையும் வீழ்த்தினர். 181 ரன்கள் எடுத்தால் வெற்றி என்ற இலக்குடன் களமிறங்கிய உலக சாம்பியன் இந்தியா, 40/0 என நல்ல தொடக்கத்தைப் பெற்றாலும், நடுப்பகுதி ஓவர்களில் மிட்செல் சான்ட்னர் 4 விக்கெட்டுகளை வீழ்த்தியதால் 112/6 எனத் தடுமாறியது.

அந்தச் சமயத்தில் நமன் திர் 17 பந்துகளில் 31 ரன்கள் (1 பவுண்டரி, 3 சிக்சர்கள்) அடித்து நம்பிக்கையளித்தார். இறுதியில் திலக் வர்மா (26 பந்துகளில் 51 ரன்கள், 6 பவுண்டரிகள், 1 சிக்சர்), நிதிஷ் குமார் ரெட்டி (13 பந்துகளில் 26 ரன்கள், 1 பவுண்டரி, 1 சிக்சர்) இருவரும் இணைந்து இன்னும் ஒரு பந்து மீதமுள்ள நிலையில் இந்தியாவை வெற்றி பெறச் செய்தனர். இந்த வெற்றியின் மூலம் ஐந்து போட்டிகள் கொண்ட தொடரில் இந்தியா 2-0 என முன்னிலையில் உள்ளது.

விவாகரத்து, குடிக்கு அடிமை, பேனிக் அட்டாக்.. மீண்டு வந்த யுஸ்வேந்திர சாஹலின் கண்ணீர் கதை!

Rayar A — Sun, 18 Oct 2026 22:09:38 +0530

Yuzvendra Chahal: இந்திய கிரிக்கெட் வீரர் யுஸ்வேந்திர சாஹல் விவாகரத்துக்குப் பிறகு சந்தித்த கஷ்டங்களை மனம் திறந்து பேசியுள்ளார். குடிக்கு அடிமையானதால், தன்னை மீட்க 26 நாட்கள் ரீஹாப் சென்டரில் இருந்ததாக அவர் கூறியுள்ளார்.

இந்திய கிரிக்கெட் வீரர் யுஸ்வேந்திர சாஹல், விவாகரத்துக்கு பிறகு தன் வாழ்க்கையில் நடந்த பல கசப்பான விஷயங்களை இப்போது வெளியே சொல்லியிருக்கிறார். முன்னாள் கிரிக்கெட் வீரர் ஆகாஷ் சோப்ரா நடத்தும் பாட்காஸ்ட் நிகழ்ச்சியில் அவர் பேசினார். விவாகரத்துக்குப் பின் குடிக்கு அடிமையானது, மனதளவில் உடைந்து போனது என பல விஷயங்களை அவர் பகிர்ந்து கொண்டார். கடைசியில் தன் கிரிக்கெட் கரியரை காப்பாற்றிக் கொள்ள, அவரே முன்வந்து மருத்துவ உதவியை நாடியுள்ளார்.

கவுண்டி கிரிக்கெட் விளையாடி முடித்த பிறகு, சாஹலுக்கு குடிப்பழக்கம் ரொம்பவே அதிகமாகிவிட்டது. நிலைமை கைமீறிப் போவதை உணர்ந்த அவர், ரீஹாப் சென்டரில் (Rehab Centre) சேர முடிவு செய்தார். இதுபற்றி சாஹல் கூறுகையில், "விவாகரத்துக்குப் பிறகு எல்லாமே கைமீறிப் போச்சு. என் மனநிலையும் சரியில்லை. இப்படியே போனால், நான் உயிருக்கு உயிராக நேசிக்கும் கிரிக்கெட்டையே அழிச்சிடுவேன்னு எனக்குப் புரிஞ்சது. அதனாலதான் அந்தப் பழக்கத்தை விட முடிவு பண்ணேன். இப்போ நான் ரொம்ப சந்தோஷமாவும், நல்லபடியாவும் இருக்கேன்" என்றார்.

26 நாட்கள் ரீஹாப் சென்டரில் சாஹல்

இந்தப் பிரச்சனையிலிருந்து வெளியே வர, சாஹல் 26 நாட்கள் ரீஹாப் சென்டரில் தங்கியிருந்தார். இந்த முடிவு தன் தனிப்பட்ட வாழ்க்கையில் பெரிய மாற்றத்தை ஏற்படுத்தியதாக அவர் சொல்கிறார். இப்போது மனதளவில் அவர் ரொம்பவே பக்குவப்பட்டுவிட்டார். தன் உணர்ச்சிகளை முன்பு விட இப்போது நன்றாகவே கட்டுப்படுத்துகிறார். ஐபிஎல் 2026 சமயத்தில் தன் உடல்நிலை முன்பை விட ரொம்ப ஃபிட்டாக இருந்ததாக சாஹல் தெரிவித்தார். ஜிம், ஃபீல்டிங் பயிற்சி என எல்லாவற்றிலும் அவரால் முழு கவனம் செலுத்த முடிந்தது.

தனிப்பட்ட வாழ்க்கையில் நடந்த பிரச்சனைகள், அவருடைய கிரிக்கெட்டையும் பாதித்தது. அந்த நேரத்தில் பதற்றம், பேனிக் அட்டாக் போன்ற பல பிரச்சனைகளை சாஹல் சந்தித்தார். பேனிக் அட்டாக் வரும்போது அவருக்கு இதயத் துடிப்பு அதிகமாகிவிடும். சில நேரங்களில் பேசக் கூட முடியாமல் கஷ்டப்பட்டுள்ளார். அந்த இருண்ட காலத்தில், அவருடைய குடும்பத்தினரும் நெருங்கிய நண்பர்களும் தான் அவருக்குப் பக்கபலமாக இருந்தார்கள். அவர்களின் ஆதரவுதான் தன்னை அந்த மோசமான நிலையிலிருந்து வெளியே கொண்டு வந்தது என சாஹல் நெகிழ்ச்சியாகக் கூறினார்.

சாஹல் முதன்முதலில் 2011-ம் ஆண்டு ஐபிஎல் தொடரில் விளையாடத் தொடங்கினார். கரியரின் ஆரம்பக் கட்டத்திலேயே பார்ட்டி, குடிப்பழக்கம் என எல்லாமே அவருக்கு அறிமுகமாகிவிட்டது. இதுபற்றிப் பேசும்போது, தென்னாப்பிரிக்க முன்னாள் வீரர் ஏபி டிவில்லியர்ஸ் தனக்குக் கொடுத்த அறிவுரையையும் அவர் நினைவுகூர்ந்தார்.

வாழ்க்கையில் ஒரு பேலன்ஸ் எவ்வளவு முக்கியம் என்பதை சாஹல் இப்போது புரிந்துகொண்டார். தன் தனிப்பட்ட வாழ்க்கை குறித்து சோஷியல் மீடியாவில் வந்த பல விமர்சனங்களையும் அவர் எதிர்கொள்ள வேண்டியிருந்தது. ஆனால், இப்போது அந்தப் பழைய கசப்பான நினைவுகளை எல்லாம் ஓரம் கட்டிவிட்டு, முழுமையாக கிரிக்கெட்டில் மட்டும் கவனம் செலுத்த சாஹல் முடிவு செய்துள்ளார்.

IND vs NZ 2nd T20: இளம் தோனி வந்தாச்சு.. ருத்ரதாண்டவமாடிய திலக் வர்மா.. இந்திய அணி த்ரில் வெற்றி!

Rayar A — Sat, 24 Oct 2026 17:13:21 +0530

IND vs NZ 2nd T20: நியூசிலாந்து அணிக்கு எதிரான 2வது டி20 போட்டியில் இந்திய அணி 4 விக்கெட் வித்தியாசத்தில் த்ரில் வெற்றி பெற்றது. திலக் வர்மா அதிரடி அரைசதம் விளாசி அணியை வெற்றி பெற வைத்தார். நிதிஷ் குமார் ரெட்டி கைகொடுத்தார்.

நியூசிலாந்தின் கிறிஸ்ட்சர்ச் நகரில் இன்று நடந்த 2வது டி20 போட்டியில் இந்தியா 4 விக்கெட் வித்தியாசத்தில் த்ரில் வெற்றி பெற்றது. மிடில் ஓவர்களில் இந்திய அணி பயங்கரமாகத் தடுமாறியது. அப்போது ஜோடி சேர்ந்த திலக் வர்மா - நிதிஷ் குமார் ரெட்டி பார்ட்னர்ஷிப் 69 ரன்கள் குவித்து அணியை வெற்றிப் பாதைக்கு அழைத்துச் சென்றது. இந்த போட்டியில் முதலில் பேட்டிங் செய்த நியூசிலாந்து அணி 20 ஓவர்களில் 5 விக்கெட் இழப்பிற்கு 180 ரன்கள் எடுத்தது.

பவர்பிளேயில் 41/3 என சரிந்த அந்த அணியை, க்ளென் பிலிப்ஸ் மற்றும் பெவோன் ஜேக்கப்ஸ் ஜோடி அரைசதங்கள் அடித்து மீட்டெடுத்தது. 4வது விக்கெட்டுக்கு இவர்கள் 116 ரன்கள் சேர்த்தனர். க்ளென் பிலிப்ஸ் 46 பந்துகளில் 70 ரன்களும் (4 பவுண்டரி, 4 சிக்ஸர்), பெவோன் ஜேக்கப்ஸ் 46 பந்துகளில் 58 ரன்களும் (5 பவுண்டரி, 1 சிக்ஸர்) எடுத்தனர். இந்திய அணி தரப்பில் அர்ஷ்தீப் சிங் 2 விக்கெட்டுகளை வீழ்த்தினார்.

நியூசிலாந்து நிர்ணயித்த 181 ரன்கள் டார்கெட்டை நோக்கி உலக சாம்பியனான இந்தியா களமிறங்கியது. அபிஷேக் சர்மாவும், சஞ்சு சாம்சனும் முதல் விக்கெட்டுக்கு 40 ரன்கள் சேர்த்தனர். 14 பந்துகளில் 17 ரன்கள் எடுத்திருந்த சாம்சன், க்ளென் பிலிப்ஸிடம் கேட்ச் கொடுத்து அவுட் ஆனார். பெரிதும் எதிர்பார்க்கப்பட்ட வைபவ் சூர்யவன்ஷி 8 பந்துகளில் 4 ரன்கள் மட்டும் எடுத்து நாதன் ஸ்மித் பந்துவீச்சில் டேரில் மிட்செலிடம் கேட்ச் கொடுத்து வெளியேறினார்.

அபிஷேக் சர்மா (21 பந்துகளில் 27 ரன்கள், 3 பவுண்டரி, 1 சிக்ஸர்) மிட்செல் சான்ட்னர் பந்துவீச்சில் நாதனிடம் கேட்ச் ஆனார். கேப்டன் ஷ்ரேயாஸ் ஐயரும் எதிரணி பாஸ்ட் பவுலர்களை சிக்சரும், பவுண்டரியுமாக அடித்து கலங்கடித்தனர். இறுதி வரை களத்தில் நின்று ஒரு பந்து மீதமிருக்கும் போதே இந்தியாவை வெற்றி பெற வைத்தனர்.

சூப்பர் அரை சதம் விளாசிய திலக் வர்மா 26 பந்துகளில் 51 ரன்கள் எடுத்து அவுட்டாகாமல் இருந்தார். இதேபோல் நிதிஷ் குமார் ரெட்டியும் 13 பந்துகளில் 1 பவுண்டரி, 1 சிக்சருடன் 26 ரன்கள் எடுத்து களத்தில் இருந்தார். திலக் வர்மா ஆட்டநாயகன் விருது வென்றார்.

இந்த வெற்றியின் மூலம் 5 போட்டிகள் கொண்ட தொடரில் இந்தியா இப்போது 2-0 என முன்னிலையில் உள்ளது. நியூசிலாந்து அணியில் பாஸ்ட் பவுலர்கள் சொதப்பினாலும் அந்த அணியின் கேப்டன் மிட்ச்செல் சான்ட்னர் 4 ஓவர்களில் வெற்றும் 21 ரன்கள் மட்டுமே கொடுத்து 4 விக்கெட்டுகளை சாய்த்தார். இந்திய அணி தத்தளிக்கும்போதெல்லாம் மகேந்திர சிங் தோனி போல கைகொடுத்து அணியை வெற்றி பெற வைத்து வரும் திலக் வர்மா, இந்த போட்டியிலும் தான் குட்டி தோனி என்பதை நிரூபித்துள்ளார்.

IND vs NZ: இந்தியா - நியூசிலாந்து டி20 தொடரை எந்த டிவியில் பார்க்கலாம்? போட்டிகள் தொடங்கும் நேரம் என்ன?

Rayar A — Tue, 20 Oct 2026 14:36:51 +0530

India vs New Zealand T20 Series: இந்தியா, நியூசிலாந்து இடையிலான‌ 5 போட்டிகள் கொண்ட டி20 தொடர் அக்டோபர் 22-ம் தேதி தொடங்குகிறது. இந்த தொடரை எந்த டிவியில் பார்க்கலாம்? போட்டிகள் தொடங்கும் நேரம் என்ன? விரிவாக பார்ப்போம்.

இந்திய கிரிக்கெட் அணி நியூசிலாந்துக்கு சென்று 5 டி20 போட்டிகள் கொண்ட தொடர், 5 ஓடிஐ போட்டிகள் கொண்ட தொடர் மற்றும் 2 டெஸ்ட் போட்டிகள் கொண்ட தொடரில் விளையாட உள்ளது. இதில் முதலில் டி20 தொடர் நடைபெற உள்ளது. இந்தியா - நியூசிலாந்து இடையிலான 5 போட்டிகள் கொண்ட டி20 தொடர் அக்டோபர் 22 (வியாழக்கிழமை) தொடங்குகிறது.

முதல் மேட்ச் கிறிஸ்ட்சர்ச்சில் உள்ள ஹாக்லி ஓவல் மைதானத்தில் நடக்கிறது. ஸ்ரேயாஸ் ஐயர் கேப்டனாக களமிறங்கும் இந்த 16 பேர் கொண்ட இந்திய அணியில் சஞ்சு சாம்சன், திலக் வர்மா, அபிஷேக் சர்மா மற்றும் வைபவ் சூர்யவன்ஷி போன்ற முக்கிய வீரர்கள் உள்ளனர்.

சமீபத்தில் உள்ளூரில் வெஸ்ட் இண்டீஸுக்கு எதிராக சஞ்சு சாம்சன் சூப்பராக விளையாடியதால், அவர் மீது பெரிய எதிர்பார்ப்பு இருக்கிறது. அதேபோல, நியூசிலாந்து மண்ணில் வைபவ் சூர்யவன்ஷிக்கு பிளேயிங் லெவனில் வாய்ப்பு கிடைக்குமா என்ற ஆர்வமும் ரசிகர்களிடம் எகிறியுள்ளது.

இந்தத் தொடரின் முதல் இரண்டு டி20 போட்டிகள் கிறிஸ்ட்சர்ச்சில் உள்ள ஹாக்லி ஓவல் மைதானத்தில் நடக்கிறது. இரண்டாவது மேட்ச் சனிக்கிழமை நடைபெறும். அதன்பிறகு, மூன்றாவது போட்டி வெலிங்டனில் உள்ள என்.ஆர்.ஒய் (NRY) மைதானத்தில் (அக்டோபர் 27), நான்காவது போட்டி ஆக்லாந்தின் ஈடன் பார்க்கில் (அக்டோபர் 30) மற்றும் கடைசிப் போட்டி ஹாமில்டனில் உள்ள செடன் பார்க்கில் (நவம்பர் 1) நடைபெற உள்ளன.

இந்த தொடரின் அனைத்து டி20 போட்டிகளும் நியூசிலாந்து உள்ளூர் நேரப்படி இரவு 8:00 மணிக்கும் இந்திய நேரப்படி மதியம் 12:30 மணிக்கும் ஆரம்பமாகும். இந்திய கிரிக்கெட் ரசிகர்கள் சோனி ஸ்போர்ட்ஸ் நெட்வொர்க்கில் (Sony Sports Network) இந்த மேட்ச்களை லைவாக பார்க்கலாம்.

சோனி லிவ் (Sony Liv) ஆப் மற்றும் வெப்சைட்டிலும் லைவ் ஸ்ட்ரீமிங் செய்யப்படும். நியூசிலாந்தில் ஸ்கை ஸ்போர்ட்ஸ் (Sky Sports) சேனலிலும், அமெரிக்கா மற்றும் கனடாவில் வில்லோ டிவியிலும் (Willow TV) இந்தப் போட்டிகள் ஒளிபரப்பாகும்.

இந்திய ஓடிஐ அணி மற்றும் டெஸ்ட் அணியின் கேப்டன் சுப்மன் கில், நியூசிலாந்து டெஸ்ட் தொடருக்காக 4-5 நெட் பவுலர்களை தன்னுடன் நியூசிலாந்துக்கு அழைத்துச் செல்கிறார். இவர்களுக்கான முழு செலவையும் கில்லே ஏற்றுக்கொள்கிறார்.

வெளிநாட்டுப் பயணங்களின் போது வீரர்களின் வசதிக்காக தனியாக நெட் பவுலர்களை பிசிசிஐ ஏற்பாடு செய்வது வழக்கம். ஆனால், ஒரு வீரர் தனது சொந்த செலவில் நெட் பவுலர்களை அழைத்துச் செல்வது இதுவே முதல் முறை. சுப்மன் கில் அக்டோபர் 23 அல்லது 24-ம் தேதியே நியூசிலாந்துக்கு கிளம்புகிறார். அங்கு டெஸ்ட் மற்றும் ஒருநாள் தொடருக்காக அவர் தீவிர பயிற்சியில் ஈடுபட உள்ளார் என்பது குறிப்பிடத்தக்கது.

Virat Kohli Records: விராட் கோலி ஓய்வு பெறுவதற்குள் முறியடிக்க வாய்ப்புள்ள 5 சாதனைகள்

Asianet News — Thu, 05 Nov 2026 23:49:09 +0530

கிரிக்கெட் உலகின் தலைசிறந்த பேட்ஸ்மேன்களில் ஒருவரான விராட் கோலி தனது 38வது பிறந்தநாளைக் கொண்டாடுகிறார். சச்சின் டெண்டுல்கரின் 100 சர்வதேச சதங்கள் மற்றும் 30,000 ரன்கள் உட்பட 5 முக்கிய சாதனைகளை முறியடிக்க அவர் காத்திருக்கிறார்.

முன்னாள் இந்திய கேப்டனும், பேட்டிங் நட்சத்திரமுமான விராட் கோலி, நவம்பர் 5, வியாழக்கிழமை அன்று தனது 38வது பிறந்தநாளைக் கொண்டாடினார். நவீன காலத்தின் தலைசிறந்த பேட்ஸ்மேன்களில் ஒருவராகக் கருதப்படும் கோலி, இலக்குகளைத் துரத்திப் பிடிக்கும் தனது திறமைக்காக 'சேஸ் மாஸ்டர்' என்ற பட்டப்பெயரைப் பெற்றார்.

2008-ல் இந்திய அணிக்காக அறிமுகமான பிறகு, கோலி சர்வதேச கிரிக்கெட்டின் மிகவும் வெற்றிகரமான மட்டையாளர்களில் ஒருவரானார். அனைத்து வடிவங்களிலும் சாதனைகளைப் படைத்து, எல்லா காலத்திலும் சிறந்த வீரர்களில் ஒருவராகத் தனது புகழை நிலைநாட்டினார். 566 போட்டிகளில் 52.86 சராசரியில், 86 சதங்கள் மற்றும் 149 அரைசதங்கள் உட்பட 28601 ரன்களைக் குவித்துள்ள இந்த முன்னாள் இந்திய கேப்டன், கிரிக்கெட்டின் மிகவும் திறமையான மட்டையாளர்களில் ஒருவராகத் திகழ்கிறார்.

தனது 38வது பிறந்தநாளில், விராட் கோலி தனது கிரிக்கெட் வாழ்க்கையிலிருந்து ஓய்வு பெற்று வெளியேறுவதற்கு முன்பு அவர் தகர்க்கக்கூடிய ஐந்து சாதனைகளைப் பார்ப்போம்.

விராட் கோலியின் 100 சர்வதேச சதங்கள் என்ற இலக்கு, உலக கிரிக்கெட்டின் உச்சகட்ட எவரெஸ்ட் சிகரமாகத் திகழ்கிறது. அவரது முன்னாள் இந்திய சக வீரரும், பேட்டிங் ஜாம்பியுமான சச்சின் டெண்டுல்கரின் சர்வதேச கிரிக்கெட் வரலாற்றில் 100 சதங்கள் என்ற சாதனை, ஒரு தசாப்தத்திற்கும் மேலாக எட்ட முடியாததாகத் தோன்றியது; ஆனால், கோலி அந்த சாத்தியமற்றதை எட்டக்கூடிய தூரத்திற்குக் கொண்டு வந்துள்ளார்.

86 சர்வதேச சதங்களைக் கொண்டுள்ள கோலி, டெண்டுல்கரின் புகழ்பெற்ற சாதனையை முறியடிக்க இன்னும் 15 சதங்கள் தேவை. டெஸ்ட் கிரிக்கெட்டிலிருந்து ஓய்வு பெற்ற பிறகு கோலி நான்கு ஒருநாள் சதங்களை அடித்ததால், மீதமுள்ள 14 சத இடைவெளியைக் குறைக்க அவர் இப்போது முழுவதுமாக ஒருநாள் போட்டிகளையே நம்பியிருக்க வேண்டியுள்ளது.

மீதமுள்ள ஐந்து போட்டிகளில் நியூசிலாந்துக்கு எதிரான நான்கு போட்டிகள் உட்பட 11 இருதரப்பு ஒருநாள் போட்டிகளிலும், அதனைத் தொடர்ந்து இலங்கை மற்றும் ஜிம்பாப்வேக்கு எதிராக தலா மூன்று போட்டிகளிலும், அத்துடன் ஆசியக் கோப்பை மற்றும் 2027 ஒருநாள் உலகக் கோப்பைத் தொடரிலும் இந்தியா விளையாட உள்ளதால், இந்த வரையறுக்கப்பட்ட ஓவர் போட்டிப் பட்டியல், அவர் மூன்று இலக்க மைல்கல்லை எட்டுவதற்குப் போதுமான வாய்ப்புகளை வழங்குகிறது.

சச்சின் டெண்டுல்கரின் 100 சர்வதேச சதங்கள் என்ற சர்வகால சாதனையை விராட் கோலி முறியடிப்பதற்கு முன்பு, முன்னாள் இந்திய கேப்டனான அவர், தனது சொந்த மண்ணில் அதிக சர்வதேச சதங்கள் அடித்த அந்த ஜாம்பவான் பேட்ஸ்மேனின் சாதனையை முதலில் குறிவைக்கலாம்.

இந்தியாவில் அடித்த 42 சர்வதேச சதங்களுடன் கோலியும் டெண்டுல்கரும் தற்போது சமநிலையில் உள்ளனர். சொந்த மண்ணில் இலங்கை மற்றும் ஜிம்பாப்வே அணிகளுக்கு எதிராக தலா இரண்டு தொடர்களில் ஆறு ஒருநாள் போட்டிகளில் இந்திய அணி விளையாட உள்ள நிலையில், விராட் கோலி தனது சொந்த மண்ணில் இன்னும் ஒரு சதம் அடித்தால் இந்த சமநிலையை முறியடித்து, அந்த சாதனையைத் தனி ஒருவராக தனதாக்கிக் கொள்ள வாய்ப்புள்ளது.

சொந்த மண்ணில் அதிக சர்வதேச சதங்கள் அடித்த டெண்டுல்கரின் சாதனையை கோலி முறியடித்தால், அவர் சொந்த மண்ணில் அனைத்து வகையான கிரிக்கெட் வடிவங்களிலும் தனிப்பெரும் வெற்றி பெற்ற பேட்ஸ்மேன் என்ற பெருமையைப் பெறுவார்.

தனது சர்வதேச வெற்றிகளைத் தவிர, விராட் கோலி இந்தியன் பிரீமியர் லீக் (ஐபிஎல்) வரலாற்றில் மிகவும் வெற்றிகரமான மற்றும் அதிக ரன்கள் குவித்த மட்டையாளர்களில் ஒருவராகத் திகழ்கிறார். அவர் 283 போட்டிகளில் 9 சதங்கள் மற்றும் 68 அரைசதங்கள் உட்பட 9336 ரன்கள் குவித்து, 40.41 சராசரி மற்றும் 134.79 ஸ்டிரைக் ரேட்டுடன் ஐபிஎல்-லில் அதிக ரன்கள் எடுத்த வீரராக உள்ளார்.

ஐபிஎல் தொடரில் வரலாற்றுச் சாதனைகளைப் படைக்கும் தருவாயில் கோலி இருக்கிறார். முன்னாள் ஆர்சிபி கேப்டனான அவர், ஐபிஎல் வரலாற்றில் 1,000 ரன்கள் மற்றும் 10 சதங்கள் என்ற இரட்டைச் சாதனையைப் படைத்த முதல் பேட்ஸ்மேன் என்ற பெருமையை அடைய, இன்னும் 664 ரன்களும் ஒரு சதமும் மட்டுமே பின்தங்கியுள்ளார்.

ஏற்கனவே இத்தொடரில் அதிக ரன்கள் மற்றும் சதம் அடித்தவர் என்ற தனது நிலையை நிலைநிறுத்திக் கொண்ட விராட் கோலி, ராயல் சேலஞ்சர்ஸ் பெங்களூரு அணிக்காக மற்றொரு சிறப்பான ஆட்டத்தை வெளிப்படுத்துவதன் மூலம் இந்த இரட்டை மைல்கல்லை எட்ட முடியும்.

4. லிஸ்ட்-ஏ போட்டிகளில் அதிக சதங்கள் அடித்த இந்திய பேட்ஸ்மேன்

ஒருநாள் கிரிக்கெட் வரலாற்றில் அதிக சதங்கள் அடித்த சச்சின் டெண்டுல்கரின் சாதனையை விராட் கோலி தகர்த்திருக்கலாம், ஆனால் உள்நாட்டு மற்றும் சர்வதேச 50 ஓவர் கிரிக்கெட் இரண்டையும் சேர்த்து, மற்றொரு பெரிய மைல்கல்லை எட்டும் வாய்ப்பு அவருக்கு உள்ளது.

லிஸ்ட் ஏ கிரிக்கெட்டில் 60 சதங்கள் அடித்த சாதனையை கோலியும் டெண்டுல்கரும் தற்போது தக்கவைத்துள்ளனர். இது 50 ஓவர் கிரிக்கெட்டில் இந்திய பேட்ஸ்மேன்கள் அடித்த அதிகபட்ச சதங்களாகும். ஏற்கனவே 60 லிஸ்ட் ஏ சதங்களை அடித்துள்ள முன்னாள் இந்திய கேப்டன், தனது முன்னாள் சக வீரரை முறியடித்து, 61 லிஸ்ட் ஏ சதங்களுடன் தனி உரிமையாளராக்க இன்னும் ஒரு சதம் மட்டுமே தேவைப்படுகிறது.

ஒருநாள் போட்டிகளில் தொடர்ந்து கவனம் செலுத்தி வருவதால், விராட் கோலி வரவிருக்கும் போட்டிகளில் இந்தச் சாதனையை விரைவில் நிகழ்த்துவார் என எதிர்பார்க்கப்படுகிறது

விராட் கோலி தனது அறிமுகப் போட்டியிலிருந்தே சர்வதேச கிரிக்கெட் வாழ்க்கையின் உச்சத்தில் இருந்து வருகிறார். சச்சின் டெண்டுல்கருக்குப் பிறகு, சர்வதேச கிரிக்கெட் வரலாற்றில் 28,000 ரன்கள் என்ற மைல்கல்லைக் கடந்த இரண்டாவது பேட்ஸ்மேன் என்ற பெருமையையும் அவர் பெற்றுள்ளார்.

சர்வதேச கிரிக்கெட்டில் 28,601 ரன்களைக் குவித்துள்ள விராட் கோலி, தற்போது 30,000 ரன்கள் என்ற மாபெரும் மைல்கல்லை எட்டுவதற்கு இன்னும் 1,399 ரன்கள் மட்டுமே பின்தங்கியுள்ளார். ஆசியக் கோப்பை மற்றும் உலகக் கோப்பையுடன், நியூசிலாந்து, இலங்கை மற்றும் ஜிம்பாப்வே அணிகளுக்கு எதிராக இந்தியா மேலும் 10 இருதரப்பு ஒருநாள் போட்டிகளில் விளையாட உள்ளதால், இந்த 1,399 ரன்கள் இடைவெளியைக் குறைப்பதற்கு கோலிக்கு பல வாய்ப்புகள் கிடைக்கும்.

சர்வதேச கிரிக்கெட்டில் 30,000 ரன்கள் என்ற மைல்கல்லை விராட் கோலி கடந்தால், இந்த மகத்தான மைல்கல்லை எட்டிய சச்சின் டெண்டுல்கரின் அரிதான பட்டியலில் அவர் இணைவார். மேலும், சர்வதேச கிரிக்கெட் வரலாற்றில் இந்த மைல்கல்லை எட்டிய இரண்டாவது பேட்ஸ்மேன் என்ற பெருமையையும் பெறுவார்.

Kieron Pollard: MI அணியின் புதிய ‘கிங்’ பொல்லார்ட்..! தலைமைப் பயிற்சியாளராக அதிரடி புரமோஷன்..

Asianet News — Sat, 24 Oct 2026 19:57:07 +0530

மும்பை இந்தியன்ஸ் அணியின் முன்னாள் அதிரடி வீரரும், பேட்டிங் பயிற்சியாளருமான கீரன் பொல்லார்ட், தற்போது அந்த அணியின் தலைமைப் பயிற்சியாளராக நியமிக்கப்பட்டுள்ளார். 16 ஆண்டுகால MI அணியுடனான உறவில் பொல்லார்ட் புதிய அத்தியாயத்தைத் தொடங்குகிறார்.

ஐபிஎல் தொடரில் மிகவும் பிரபலமான அணிகளில் ஒன்றான மும்பை இந்தியன்ஸ், தனது முன்னாள் அதிரடி வீரரும், பேட்டிங் பயிற்சியாளருமான கீரன் பொல்லார்டை அணியின் தலைமைப் பயிற்சியாளராக நியமித்துள்ளது. இதன் மூலம், மும்பை இந்தியன்ஸ் அணியுடனான அவரது 16 ஆண்டுகாலப் பயணம் புதிய அத்தியாயத்தை எட்டியுள்ளது.

வீரராகத் தொடங்கி தலைமைப் பயிற்சியாளர் வரை!

மேற்கிந்தியத் தீவுகளைச் சேர்ந்த அதிரடி ஆட்டக்காரரான கீரன் பொல்லார்ட், தனது 22 வயதில் மும்பை இந்தியன்ஸ் அணியில் இணைந்தார். அன்றிலிருந்து அந்த அணியின் வெற்றிப் பயணத்தில் முக்கியப் பங்காற்றி வந்துள்ளார்.

தனது அதிரடியான பேட்டிங், ஆட்டத்தின் போக்கையே மாற்றும் திறன், நெருக்கடியான சூழல்களில் சிறப்பாகச் செயல்படும் ஆற்றல் ஆகியவற்றால் ரசிகர்களின் மனதில் நீங்கா இடம்பிடித்தவர் பொல்லார்ட்.

வீரராக மும்பை இந்தியன்ஸ் அணிக்குப் பல மறக்க முடியாத வெற்றிகளைத் தேடித்தந்த அவர், பின்னர் பேட்டிங் பயிற்சியாளராகவும் தனது அனுபவத்தை அணியுடன் பகிர்ந்துகொண்டார். தற்போது தலைமைப் பயிற்சியாளர் பொறுப்புக்கு உயர்த்தப்பட்டிருப்பது அவரது நீண்டகாலத் தொடர்பில் முக்கியமான மைல்கல்லாக அமைந்துள்ளது.

கீரன் பொல்லார்டின் நியமனம் குறித்து மும்பை இந்தியன்ஸ் அணியின் இணை உரிமையாளரான நீதா எம். அம்பானி கூறுகையில்:

“பொல்லார்ட் தனது 22 வயதில் மும்பை இந்தியன்ஸ் அணியில் இணைந்தார். கடந்த 16 ஆண்டுகளாக அவர் எங்கள் குடும்பத்தின் ஓர் அங்கமாக இருந்து வருகிறார். வீரராக அவர் பல மறக்க முடியாத தருணங்களை எங்களுக்குப் பரிசளித்தார். பயிற்சியாளராகவும் தனது அனுபவம், ஆர்வம் மற்றும் கிரிக்கெட் விளையாட்டின் மீதான ஆழமான புரிதலைத் தொடர்ந்து பகிர்ந்து வருகிறார்.

தற்போது அவர் தலைமைப் பயிற்சியாளர் பொறுப்பை ஏற்றிருப்பது எங்களுக்கு மிகுந்த மகிழ்ச்சி அளிக்கிறது. மும்பை இந்தியன்ஸ் அணியின் சீருடையை அணிவதன் அர்த்தமும், அணிக்காக விளையாடும்போது என்ன எதிர்பார்க்கப்படுகிறது என்பதும் பொல்லார்டுக்கு நன்றாகத் தெரியும். இந்தப் புதிய பொறுப்பிலும் அதே அர்ப்பணிப்பு, நம்பிக்கை மற்றும் உறுதியுடன் அவர் செயல்படுவார் என்று நம்புகிறேன். அணியின் அடுத்தகட்டப் பயணத்தை அவர் வழிநடத்த எனது வாழ்த்துகள்” என்று தெரிவித்தார்.

மும்பை இந்தியன்ஸ் அணியின் செயல்பாடுகள், அணியின் கலாசாரம் மற்றும் உயர்மட்டப் போட்டிகளில் வெற்றி பெறுவதற்கான சவால்கள் குறித்து பொல்லார்டுக்கு ஆழமான புரிதல் உள்ளது.

டி20 கிரிக்கெட் வளர்ச்சியடைந்த காலகட்டத்தில் அதன் ஓர் அங்கமாக இருந்த அவர், விளையாட்டின் மாறிவரும் தன்மை, போட்டிக்கான உத்திகள் மற்றும் அதிகரித்து வரும் போட்டி ஆகியவற்றில் சிறந்த அனுபவத்தைப் பெற்றுள்ளார்.

மும்பை இந்தியன்ஸ் அணிக்காக வீரராகவும், சமீபத்திய ஆண்டுகளில் பேட்டிங் பயிற்சியாளராகவும் பணியாற்றிய அனுபவம், அணியின் வெற்றிக்கான காரணங்களைப் புரிந்துகொள்ள அவருக்கு உதவுகிறது. இந்த அனுபவம், அணியை அடுத்தகட்டத்துக்கு அழைத்துச் செல்வதற்கான வலுவான அடித்தளமாக இருக்கும் என்று எதிர்பார்க்கப்படுகிறது.

View this post on Instagram

A post shared by Mumbai Indians (@mumbaiindians)

தலைமைப் பயிற்சியாளராக நியமிக்கப்பட்டது குறித்து கீரன் பொல்லார்ட் கூறுகையில்:

“மும்பை இந்தியன்ஸ் அணியின் தலைமைப் பயிற்சியாளர் பொறுப்பை ஏற்றுக்கொள்வது எனக்குப் பெருமையாக உள்ளது. மும்பை இந்தியன்ஸ் என் வாழ்க்கையிலும் கிரிக்கெட் வாழ்க்கையிலும் மிக முக்கியமான இடத்தைப் பெற்றுள்ளது. இந்த அணியுடனும், வீரர்களுடனும், ரசிகர்களுடனும் எனக்குள்ள பந்தம் மிகவும் மதிப்புமிக்கது.

வீரராகவும் பின்னர் பயிற்சியாளராகவும் இந்தப் பயணத்தை அனுபவித்துள்ளதால், மும்பை இந்தியன்ஸ் அணி எதைக் குறிக்கிறது என்பதையும், அணியின் நீல-தங்க நிறச் சீருடையைப் பிரதிநிதித்துவப்படுத்துவதில் உள்ள பொறுப்பையும் நான் நன்கு அறிவேன்.

என் மீது நம்பிக்கை வைத்த நீதா அம்பானி, ஆகாஷ் அம்பானி மற்றும் மும்பை இந்தியன்ஸ் குடும்பத்தினர் அனைவருக்கும் நன்றி தெரிவித்துக்கொள்கிறேன். வீரர்கள் மற்றும் பயிற்சிக் குழுவினருடன் இணைந்து பணியாற்றவும், அணியின் பாரம்பரியத்தை மேலும் வலுப்படுத்தவும், இளம் திறமைகளை வளர்க்கவும் ஆவலுடன் காத்திருக்கிறேன். எங்கள் ரசிகர்கள் மேலும் பல வெற்றிகளைக் கொண்டாடும் வகையில் செயல்படுவோம்” என்றார்.

View this post on Instagram

A post shared by Mumbai Indians (@mumbaiindians)

பொல்லார்டை தலைமைப் பயிற்சியாளராக நியமித்திருப்பதன் மூலம், அணியின் வெற்றிப் பாரம்பரியத்தைத் தொடர்ந்து முன்னெடுத்துச் செல்வதிலும், புதிய வீரர்களின் திறமைகளை வளர்ப்பதிலும் மும்பை இந்தியன்ஸ் நிர்வாகம் தனது கவனத்தைச் செலுத்தியுள்ளது.

அணியின் வெற்றிகரமான காலகட்டங்களில் ஓர் அங்கமாக இருந்த பொல்லார்ட், தனது அனுபவத்தின் அடிப்படையில் வீரர்களை வழிநடத்துவார் என எதிர்பார்க்கப்படுகிறது. அதே நேரத்தில், அணியின் ஒற்றுமை, செயல்திறன் மற்றும் களத்துக்கு வெளியேயும் உள்ளேயும் சிறப்பாகச் செயல்படும் திறனை மேம்படுத்துவதும் அவரது பொறுப்புகளில் முக்கியமானதாக இருக்கும்.

Abhishek Sharma: ஐசிசி டி20 ரேங்கிங்கில் மீண்டும் நம்பர் 1 ஆன அபிஷேக் ஷர்மா!

Asianet News — Wed, 28 Oct 2026 16:12:43 +0530

நியூசிலாந்துக்கு எதிரான மின்னல் வேக சதம் மூலம் அபிஷேக் சர்மா டி20 தரவரிசையில் மீண்டும் முதலிடத்தைப் பிடித்தார். டெஸ்ட் போட்டிகளில் ஜடேஜாவின் பல ஆண்டுகால ஆதிக்கத்திற்கு மார்கோ ஜான்சென் முற்றுப்புள்ளி வைத்தார்.

சர்வதேச கிரிக்கெட் கவுன்சில் (ஐசிசி) அறிவித்துள்ள சமீபத்திய டி20 தரவரிசையில், இளம் இந்திய தொடக்க ஆட்டக்காரர் அபிஷேக் சர்மா ஒரு பரபரப்பை ஏற்படுத்தியுள்ளார். நியூசிலாந்துக்கு எதிரான மூன்றாவது டி20 போட்டியில் தனது அபாரமான பேட்டிங்கால் எதிரணி பந்துவீச்சாளர்களுக்கு கடும் சவாலை அளித்த இந்த இளம் நட்சத்திரம், ஐசிசி டி20 பேட்டிங் தரவரிசையில் மீண்டும் முதலிடத்தைப் பிடித்துள்ளார்.

897 மதிப்பீட்டுப் புள்ளிகளுடன் முதலிடத்தில் இருந்த அபிஷேக் ஷர்மா, தனது சக வீரரான இஷான் கிஷனை முந்தி முதலிடத்தைப் பிடித்தார். இதனால், சில நாட்களாக முதலிடத்தில் இருந்த இஷான் கிஷன் 866 புள்ளிகளுடன் மூன்றாம் இடத்திற்குச் சரிந்தார். அதேவேளையில், பாகிஸ்தான் வீரர் சாஹிப்சாதா ஃபர்ஹான் 883 புள்ளிகளுடன் இரண்டாம் இடத்தில் உள்ளார்.

நியூசிலாந்தின் வெலிங்டனில் நடந்த மூன்றாவது டி20 போட்டியில் அபிஷேக் ஷர்மாவின் ஆட்டம், மைதானத்தில் இருந்த அனைவரையும் பிரமிப்பில் ஆழ்த்தியது. வெறும் 35 பந்துகளில் தனது சதத்தை நிறைவு செய்த அபிஷேக், எதிரணி பந்துவீச்சாளர்களை அனைத்து கோணங்களிலிருந்தும் அடித்து நொறுக்கி, மொத்தம் 38 பந்துகளில் 113 ரன்கள் குவித்து, தனது நான்காவது டி20 சதத்தைப் பதிவு செய்தார்.

அவரது வீரதீரச் செயல், இந்தியா 6 விக்கெட் வித்தியாசத்தில் அபார வெற்றி பெற உதவியது. 5 போட்டிகள் கொண்ட தொடரில் இந்தியா 3-0 என்ற கணக்கில் வெற்றி பெற்றதில் அபிஷேக்கின் ஆல்-ரவுண்டர் ஆட்டம் முக்கியப் பங்கு வகித்தது. இந்த அற்புதமான ஆட்டம் அவருக்கு அதிக மதிப்பீட்டுப் புள்ளிகளைப் பெற்றுத் தந்து, அவரை மீண்டும் நம்பர் 1 ராஜாவாக மாற்றியது.

டி20 போட்டிகளில் இந்தியா ஆக்ரோஷமாக விளையாடி வரும் வேளையில், மறுபுறம், இந்திய அணியின் நட்சத்திர ஆல்-ரவுண்டரான ரவீந்திர ஜடேஜா டெஸ்ட் போட்டிகளில் பெரும் அதிர்ச்சியை சந்தித்துள்ளார். நான்கு ஆண்டுகளுக்கும் மேலாக டெஸ்ட் ஆல்-ரவுண்டர்கள் பட்டியலில் மறுக்கமுடியாத நம்பர்-1 இடத்தில் இருந்து வரும் ஜடேஜாவின் ஆதிக்கத்தை, தென்னாப்பிரிக்க வேகப்பந்து ஆல்-ரவுண்டர் மார்கோ ஜான்சென் பாராட்டியுள்ளார்.

கெபெர்ஹாவில் ஆஸ்திரேலியாவுக்கு எதிரான இரண்டாவது டெஸ்ட் போட்டியில், ஜான்சன் முதல் இன்னிங்ஸில் 85 ரன்கள் குவித்து 5 விக்கெட்டுகளை வீழ்த்தி ஆட்டத்தின் போக்கையே மாற்றினார். இதன் மூலம், ஜடேஜாவைப் பின்னுக்குத் தள்ளி டெஸ்ட் ஆல்-ரவுண்டர் தரவரிசையில் முதலிடத்தைப் பிடித்தார்.

தென்னாப்பிரிக்க ஆல்-ரவுண்டர் மார்கோ ஜான்சென் இந்த வாரம் ஐசிசி தரவரிசையில் வரலாறு படைத்துள்ளார். ஆஸ்திரேலியா தொடரில் அவரது அசாதாரணமான ஆட்டம், அவரை ஒரே நேரத்தில் டெஸ்ட் பந்துவீச்சாளர் மற்றும் டெஸ்ட் ஆல்-ரவுண்டர் ஆகிய இரு பிரிவுகளிலும் முதலிடத்திற்கு உயர்த்தியுள்ளது. அவர் டெஸ்ட் பந்துவீச்சு தரவரிசையில் ஐந்து இடங்கள் முன்னேறி, ஆஸ்திரேலியாவின் ஜாம்பவான் மிட்செல் ஸ்டார்க்கை முந்தி முதலிடத்தைப் பிடித்துள்ளார். தனது கிரிக்கெட் வாழ்க்கையில் இந்த இரண்டு பிரிவுகளிலும் ஒரே நேரத்தில் முதலிடத்தை ஜான்சென் அடைவது இதுவே முதல் முறையாகும்.

இந்த வாரம் ஐசிசி வெளியிட்ட தரவரிசைகள், பல்வேறு வடிவங்களில் உள்ள வீரர்களின் தரவரிசையை பெருமளவில் மாற்றியுள்ளன.

• சஞ்சு சாம்சன், அர்ஷ்தீப் சிங்: டி20 போட்டிகளில், சஞ்சு சாம்சன் ஆறு இடங்கள் முன்னேறி 20வது இடத்தையும், பந்துவீச்சாளர் அர்ஷ்தீப் சிங் 15வது இடத்தையும் அடைந்துள்ளனர்.

• ஸ்ரேயஸ் ஐயர்: நியூசிலாந்து தொடரில் தொடர்ச்சியான தோல்விகளைச் சந்தித்ததைத் தொடர்ந்து, இந்திய கேப்டன் ஸ்ரேயஸ் ஐயர் 758 புள்ளிகளுடன் சில இடங்கள் சரிந்து 9வது இடத்திற்கு வந்துள்ளார்.

• டெம்பா பவுமா: ஆஸ்திரேலியாவுக்கு எதிரான போட்டியில் 179 ரன்கள் எடுத்து 'ஆட்ட நாயகன்' விருது பெற்ற தென்னாப்பிரிக்க கேப்டன் டெம்பா பவுமா, டெஸ்ட் பேட்டிங் தரவரிசையில் நான்கு இடங்கள் முன்னேறி இரண்டாம் இடத்தைப் பிடித்துள்ளார். இந்தப் பட்டியலில் இங்கிலாந்து கேப்டன் ஹாரி புரூக் மட்டுமே அவருக்கு முன்னால் உள்ளார்.

Glenn Maxwell: கிரிக்கெட்டுக்கு 'குட்பை' சொன்ன தமிழ்நாட்டு மருமகன்! 'பிக் ஷோ' கிளென் மேக்ஸ்வெல் திடீர் ஒய்வு!

Rayar A — Tue, 03 Nov 2026 11:32:11 +0530

Glenn Maxwell: ஆஸ்திரேலியா ஸ்டார் ஆல்ரவுண்டரும், தமிழ்நாட்டு மருமகனுமான கிளைன் மேக்ஸ்வெல் சர்வதேச கிரிக்கெட்டில் இருந்து ஓய்வு பெறுவதாக அறிவித்துள்ளார். இது தொடர்பான முழு விவரங்களை பார்ப்போம்.

ஆஸ்திரேலிய கிரிக்கெட் அணியின் ஸ்டார் ஆல்ரவுண்டர் கிளென் மேக்ஸ்வெல், சர்வதேச கிரிக்கெட்டிலிருந்து ஓய்வு பெறுவதாக அறிவித்துள்ளார். இதன் மூலம் அவருடைய 14 ஆண்டுகால சர்வதேச கிரிக்கெட் பயணம் நிறைவுக்கு வந்துள்ளது. கடந்த 2012-ஆம் ஆண்டு ஆகஸ்ட் மாதம் ஆப்கானிஸ்தான் அணிக்கு எதிரான ஒருநாள் போட்டியில் முதன்முதலாகக் களமிறங்கிய இவர், தற்போது தனது 38-வது வயதில் ஓய்வு முடிவை அறிவித்துள்ளார்.

20 மற்றும் 50 ஓவர்கள் கொண்ட போட்டிகளில் அதிரடி காட்டிய மேக்ஸ்வெல், டெஸ்ட் போட்டிகளிலும் விளையாடியுள்ளார். 2013-ஆம் ஆண்டு மார்ச் மாதம் இந்தியாவுக்கு எதிரான டெஸ்ட் போட்டியில் இவர் அறிமுகமானார். 2026-ஆம் ஆண்டு பிப்ரவரி மாதம் நடைபெற்ற ஐசிசி டி20 உலகக்கோப்பையில் (ICC Men's T20 World Cup 2026) ஓமன் அணிக்கு எதிராக ஆஸ்திரேலியாவுக்காக அவர் தனது கடைசிப் போட்டியில் விளையாடினார்.

அந்தப் போட்டியில் பந்துவீசி 2 விக்கெட்டுகளை வீழ்த்திய போதிலும், அவருக்கு பேட்டிங் செய்ய வாய்ப்பு கிடைக்கவில்லை. அதுவே ஆஸ்திரேலிய அணிக்காக மேக்ஸ்வெல் விளையாடிய கடைசி சர்வதேசப் போட்டியாக அமைந்தது.

ஆஸ்திரேலியாவுக்காக 149 ஒருநாள் போட்டிகள், 130 டி20 போட்டிகள் மற்றும் 7 டெஸ்ட் போட்டிகளில் மேக்ஸ்வெல் விளையாடியுள்ளார். 2015 மற்றும் 2023-ஆம் ஆண்டுகளின் ஒருநாள் உலகக்கோப்பை, 2021-ஆம் ஆண்டின் டி20 உலகக்கோப்பை என மூன்று ஐசிசி கோப்பைகளை வென்ற ஆஸ்திரேலிய அணியில் இவர் இடம்பெற்றிருந்தார்.

தனிநபராக அதிரடியாக விளையாடி போட்டியின் போக்கையே மாற்றக்கூடிய திறமை படைத்த இவர், 10 ஆண்டுகளுக்கும் மேலாக ஆஸ்திரேலியாவின் வொயிட் பாஅல் கிரிக்கெட்டில் மிக முக்கியமான வீரராகத் திகழ்ந்தார். 2023-ஆம் ஆண்டு ஒருநாள் உலகக்கோப்பையில் ஆப்கானிஸ்தானுக்கு எதிராக இவர் அடித்த இரட்டைச் சதம், இவரது வாழ்க்கையில் மிகச் சிறப்பு வாய்ந்த ஒன்றாகும். அணியின் இக்கட்டான சூழ்நிலையில் களமிறங்கி, ஆட்டமிழக்காமல் 201* (200) ரன்கள் குவித்து ஆஸ்திரேலியாவிற்கு ஒரு பிரம்மாண்ட வெற்றியைப் பெற்றுத் தந்தார்.

உலகக்கோப்பை வரலாற்றிலேயே சிறந்த தனிநபர் இன்னிங்ஸாக அந்த ஆட்டம் பார்க்கப்படுகிறது. அவரின் போராடும் குணம், திறமை மற்றும் மீண்டு வரும் ஆற்றலுக்கு அந்தப் போட்டி ஒரு சிறந்த உதாரணமாகும்.

ஒருநாள் போட்டிகளில் 126.7 என்ற ஸ்ட்ரைக் ரேட்டுடன் 3,990 ரன்களும், டி20 போட்டிகளில் 154.4 என்ற ஸ்ட்ரைக் ரேட்டுடன் 2,897 ரன்களும் குவித்துள்ளார். மூன்று வடிவங்களையும் சேர்த்து சர்வதேச கிரிக்கெட்டில் 10 சதங்களையும், 136 விக்கெட்டுகளையும் வீழ்த்தியுள்ளார். ஐபிஎல் கிரிக்கெட்டிலும் விளையாடியுள்ள மேக்ஸ்வெல், மும்பை இந்தியன்ஸ், பஞ்சாப் கிங்ஸ், டெல்லி கேப்பிட்டல்ஸ் மற்றும் ஆர்சிபி அணிக்காக களமிறங்கி அசத்தியுள்ளார்.

இதற்கு முன்னதாக, 2025-ஆம் ஆண்டு ஜூன் மாதம் ஒருநாள் கிரிக்கெட்டிலிருந்து மேக்ஸ்வெல் ஓய்வு பெற்றார். எனினும், டி20 அணியில் தொடர்ந்து விளையாடி வந்த அவர், டி20 உலகக்கோப்பையிலும் ஆஸ்திரேலியாவுக்காகப் பங்கேற்றார். இருப்பினும், அந்தத் தொடரில் ஆஸ்திரேலிய அணி குரூப் சுற்றைத் தாண்டவில்லை. ஓமன் அணிக்கு எதிரான போட்டியோடு தனது சர்வதேச கிரிக்கெட் வாழ்க்கையை மேக்ஸ்வெல் முடித்துக் கொண்டுள்ளார்.

இந்திய வம்சாவளியைச் சேர்ந்த, தமிழ்நாட்டை பூர்வீகமாகக் கொண்ட வினி ராமன் (Vini Raman) என்பவரை மேக்ஸ்வெல் காதல் திருமணம் செய்துகொண்டார். மெல்போர்னில் மருந்தாளுநராக (Pharmacist) பணியாற்றிய வினி ராமனை 2022-ஆம் ஆண்டு தமிழ் பாரம்பரிய முறைப்படியும், இந்து கலாச்சார சடங்குகளுடனும் மேக்ஸ்வெல் கரம்பிடித்தார்.

தமிழ்நாட்டு பெண்ணை மணந்ததன் மூலம் தமிழக ரசிகர்களின் மனதிற்கு நெருக்கமானவராக மாறிய மேக்ஸ்வெல்லை, இந்திய மற்றும் தமிழக ரசிகர்கள் அன்போடு "தமிழ்நாட்டு மருமகன்" என்று அழைத்து மகிழ்கின்றனர். கிளென் மேக்ஸ்வெல் - வினி ராமன் தம்பதியருக்கு ஒரு குழந்தை உள்ளது. கிரிக்கெட்டுக்கு குட்பை சொன்ன மேக்ஸ்வெல் அதிரடி பேட்டிங், நம்ப முடியாத போட்டி வெற்றிகள் மற்றும் பன்முகத் திறமையால் கிரிக்கெட் ரசிகர்களின் மனதில் இவர் என்றென்றும் நீங்காத இடம் பிடித்திருப்பார்.

IPL Top 5 Trades: ஐபிஎல் வரலாற்றை மாற்றிய 5 மாஸ் டிரேட்ஸ்.. சஞ்சு, ஹர்திக் டீல்ஸ் பாத்தா ஷாக் ஆவீங்க

Asianet News — Thu, 12 Nov 2026 12:43:05 +0530

ஐபிஎல் வரலாற்றில் அணிகளின் தலையெழுத்தையே மாற்றிய டாப் 5 சக்சஸ்ஃபுல் டிரேட்ஸ் சில உள்ளன. சஞ்சு சாம்சன், ஹர்திக் பாண்டியா, குயின்டன் டி காக் போன்ற ஸ்டார் பிளேயர்களின் டிரேட் ரெக்கார்டுகள் உட்பட ஐபிஎல்-ன் டாப் 5 சக்சஸ்ஃபுல் டிரேட்ஸ் விவரங்கள்..

இந்தியன் பிரீமியர் லீக்கின் (ஐபிஎல்) வரலாற்றில் பல சாதனைப் பரிமாற்றங்களும் எதிர்பாராத மாற்றங்களும் நிகழ்ந்துள்ளன. ஒரு அணியின் எதிர்காலத்தை மாற்றுவதில் வீரர் பரிமாற்றங்கள் எப்போதுமே முக்கியப் பங்கு வகித்துள்ளன. சில பரிமாற்றங்கள் அணிகள் வலுவான வீரர் குழுக்களை உருவாக்க உதவியுள்ள நிலையில், மற்றவை வீரர்களின் வாழ்க்கையையே முற்றிலுமாக மாற்றிவிட்டன. ஐபிஎல்-லில் நடந்த பல சாதனைப் பரிமாற்றங்கள் அணிகளுக்கும் வீரர்களுக்கும் பயனளித்துள்ளன. இந்தச் சூழலில், செயல்திறனின் அடிப்படையில் ஐபிஎல் வரலாற்றில் மிகவும் வெற்றிகரமான முதல் 5 பரிமாற்றங்களைப் பார்ப்போம்.

ஐபிஎல் 2026 சீசனில், சஞ்சு சாம்சன் ராஜஸ்தான் ராயல்ஸ் அணியிலிருந்து சென்னை சூப்பர் கிங்ஸ் (சிஎஸ்கே) அணிக்கு ₹18 கோடி என்ற பெரும் தொகைக்கு பரிமாற்றம் செய்யப்பட்டார். இந்த ஒப்பந்தத்தின் ஒரு பகுதியாக, சிஎஸ்கே நட்சத்திர வீரர்களான ரவீந்திர ஜடேஜா மற்றும் சாம் கர்ரன் ஆகியோர் ராஜஸ்தான் ராயல்ஸ் அணிக்கு மாறினர். பல ஆண்டுகளாக அணிக்கு சேவை செய்த ஜடேஜாவை விடுவிப்பது சிஎஸ்கே நிர்வாகத்திற்கு ஒரு கடினமான முடிவாக இருந்தது.

ஆனால், சஞ்சுவின் வருகை சென்னை அணிக்கு ஒரு புதிய பலத்தை அளித்துள்ளது. ஐபிஎல் 2026 தொடருக்கு சில வாரங்களுக்கு முன்பு நடைபெற்ற டி20 உலகக் கோப்பை 2026-ல் சஞ்சு 'தொடரின் சிறந்த வீரர்' விருதை வென்றார். ஐபிஎல் 2026-லும் அதே சிறப்பான ஆட்டத்தைத் தொடர்ந்த அவர், 14 போட்டிகளில் 165 ஸ்டிரைக் ரேட்டில் 477 ரன்கள் எடுத்தார். இதில் இரண்டு அற்புதமான சதங்களும் அடங்கும். சஞ்சு தனது பேட்டிங்கால் அணிக்கு பல வெற்றிகளைப் பெற்றுத் தந்தபோதிலும், சிஎஸ்கே அணியால் பிளேஆஃப் சுற்றுக்குத் தகுதி பெற முடியவில்லை.

ஐபிஎல் 2027 சீசனுக்கு முன்னதாக ஒரு பெரிய வீரர் பரிமாற்ற ஒப்பந்தம் செய்யப்பட்டுள்ளது. இதன் ஒரு பகுதியாக, ஹர்திக் பாண்டியா பஞ்சாப் கிங்ஸ் (பிபிகேஎஸ்) அணியிலும், அர்ஷ்தீப் சிங் மும்பை இந்தியன்ஸ் (எம்ஐ) அணியிலும் இணைவார்கள். இரு வீரர்களின் ஒப்புதலுடன், பஞ்சாப் மற்றும் மும்பை அணிகள் சில நாட்களுக்கு முன்பு பிசிசிஐ-யிடம் தேவையான ஆவணங்களைச் சமர்ப்பித்தன. இதுகுறித்து ஐபிஎல் நவம்பர் 11 அன்று அதிகாரப்பூர்வ அறிக்கை ஒன்றை வெளியிட்டது.

இந்த வர்த்தகம் இரு அணிகளின் பந்துவீச்சு மற்றும் ஆல்-ரவுண்டர் துறைகளை மேலும் வலுப்படுத்தும் என்பதால், இது ஒரு வெற்றியாக அமையும் என எதிர்பார்க்கப்படுகிறது. மும்பை அணியில் அர்ஷ்தீப் சிங், ஜஸ்பிரித் பும்ராவுடன் இணைந்து வேகப்பந்து தாக்குதலை மேலும் கூர்மைப்படுத்துவார். மறுபுறம், ஹர்திக் பாண்டியா வருகையால், பஞ்சாப் கிங்ஸ் ஆல்-ரவுண்டர்கள் அடிப்படையில் மிகவும் வலிமையான அணியாக மாறும். இதுவரை ஒரு சரியான இந்திய ஆல்-ரவுண்டர் இல்லாமல் தவித்து வந்த பஞ்சாப், இந்த ஒப்பந்தத்தின் மூலம் அந்த இடைவெளியை முழுமையாக நிரப்பியுள்ளது.

ஐபிஎல் செயல்திறன் அடிப்படையில் செய்யப்பட்ட மிகச்சிறந்த பரிமாற்றங்களில் ஒன்றை ராயல் சேலஞ்சர்ஸ் பெங்களூரு (RCB) அணி மேற்கொண்டது. 2021 ஐபிஎல் சீசனுக்கு முன்னதாக, டெல்லி கேப்பிட்டல்ஸ் அணியிடமிருந்து டேனியல் சாம்ஸுடன் ஹர்ஷல் பட்டேலையும் RCB பரிமாற்றம் செய்தது. அந்த சீசனில் ஹர்ஷல் பட்டேல் தனது தொழில் வாழ்க்கையின் உச்சகட்ட ஃபார்மை அடைந்தார்.

அவர் 14 சராசரி மற்றும் 8.14 எகானமி ரேட்டுடன் 32 விக்கெட்டுகளை வீழ்த்தி பரபரப்பை ஏற்படுத்தினார். ஒரே ஐபிஎல் சீசனில் அதிக விக்கெட்டுகளுக்கான சர்வகால சாதனையை அவர் சமன் செய்தது மட்டுமல்லாமல், ஆர்சிபி பிளேஆஃப்களுக்குச் செல்வதிலும் முக்கியப் பங்காற்றினார். அடுத்த சீசனில், ஹர்ஷல் தனது வேகத்தைத் தொடர்ந்ததுடன், வெறும் 7.66 எகானமி ரேட்டில் 19 விக்கெட்டுகளை வீழ்த்தி அணிக்குத் தனது மதிப்பை நிரூபித்தார்.

ஐபிஎல் 2020 சீசனுக்கு முன்னதாக, மும்பை இந்தியன்ஸ் அணி, நியூசிலாந்து வேகப்பந்து வீச்சாளர் டிரென்ட் போல்ட்டை டெல்லி கேப்பிட்டல்ஸ் (டிசி) அணியிடமிருந்து முழுப் பணப் பரிவர்த்தனை மூலம் வாங்கியது. போல்ட், கடந்த 2019 சீசனில் வெறும் 5 போட்டிகளில் மட்டுமே விளையாடியிருந்தார். ஆனால், மும்பை அணியில் இணைந்ததிலிருந்து அவர் சிறப்பான ஃபார்மில் இருந்து வருகிறார்.

மும்பை அணி தங்களது பட்டத்தைத் தக்கவைத்துக் கொள்வதில் அவர் முக்கியப் பங்காற்றினார்; 18.28 சராசரி மற்றும் 7.97 எகானமி ரேட்டுடன் 25 விக்கெட்டுகளை வீழ்த்தினார். புதிய பந்தில் ஆரம்பத்திலேயே விக்கெட்டுகளை வீழ்த்தும் போல்ட்டின் திறன், மும்பை அணிக்கு அசைக்க முடியாத முன்னிலையை அளித்தது. மற்றொரு நட்சத்திர வேகப்பந்து வீச்சாளரான ஜஸ்பிரித் பும்ராவுடன் போல்ட் அமைத்த சிறப்பான பார்ட்னர்ஷிப், மும்பை இந்தியன்ஸ் அணியை மீண்டும் ஒருமுறை சாம்பியனாக உருவெடுக்கச் செய்தது.

மும்பை இந்தியன்ஸ் செய்த மற்றொரு சூப்பர் டீல் குயின்டன் டி காக் பரிமாற்றம் ஆகும். ஐபிஎல் 2019 சீசனுக்கு முன்னதாக, மும்பை அணி ராயல் சேலஞ்சர்ஸ் பெங்களூரு அணியிடமிருந்து டி காக்கை முழுப் பணப் பரிவர்த்தனை மூலம் வாங்கியது. அணியில் இணைந்த உடனேயே, டி காக் கேப்டன் ரோஹித் ஷர்மாவுடன் இணைந்து ஒரு அபாயகரமான தொடக்க ஜோடியாக உருவெடுத்தார்.

2019 சீசனில், அவர் 132 ஸ்டிரைக் ரேட்டில் 529 ரன்கள் குவித்து, மும்பை அணி நான்காவது முறையாக கோப்பையை வெல்வதில் முக்கியப் பங்காற்றினார். அடுத்த சீசனில் (2020), டி காக் அதே வேகத்தைத் தொடர்ந்தார் மற்றும் 140 ஸ்டிரைக் ரேட்டில் 503 ரன்கள் எடுத்தார். இதன் விளைவாக, மும்பை அணி தொடர்ச்சியாக இரண்டாவது முறையாக பட்டத்தை வென்றதுடன், ஐபிஎல் வரலாற்றில் யாராலும் சாதிக்க முடியாத சாதனையாக, ஐந்தாவது முறையாக சாம்பியன் ஆனது.

IND vs WI 5th T20: பெங்களூருவில் கொட்டித் தீர்த்த மழை.. இந்தியா - வெஸ்ட் இண்டீஸ் தொடர் 2-2 என சமன்!

Raghupati R — Sat, 17 Oct 2026 22:57:40 +0530

IND vs WI 5th T20: இந்தியா - வெஸ்ட் இண்டீஸ் அணிகள் மோதிய ஐந்தாவது டி20 போட்டியில் ரசிகர்களுக்கு அதிரடி ஆட்டத்தைக் காணும் வாய்ப்பு கிடைத்தும், மழை அதற்குத் தடையாக மாறியது.

பெங்களூருவில் உள்ள சின்னசாமி மைதானத்தில் இந்தியா - வெஸ்ட் இண்டீஸ் அணிகள் மோதிய ஐந்தாவது டி20 போட்டி, பலத்த மழை காரணமாக முடிவின்றி ரத்து செய்யப்பட்டது. ஐந்து போட்டிகள் கொண்ட தொடரில் இரு அணிகளும் தலா இரண்டு வெற்றிகளைப் பெற்றிருந்ததால், இந்த ஆட்டம் தொடரின் வெற்றியாளரைத் தீர்மானிக்கும் முக்கியமான போட்டியாக அமைந்தது. ஆனால், மழை காரணமாகப் போட்டியைத் திட்டமிட்ட நேரத்தில் தொடங்க முடியவில்லை. பின்னர் ஆட்டம் ஒன்பது ஓவர்களாகக் குறைக்கப்பட்டது.

டாஸ் வென்ற வெஸ்ட் இண்டீஸ் அணியின் தலைவர் ஷாய் ஹோப், இந்திய அணியை முதலில் பேட் செய்ய அழைத்தார். இந்திய அணி அதிரடியாக ரன்களைக் குவித்து வந்த நிலையில், மீண்டும் மழை குறுக்கிட்டது. 7.4 ஓவர்களில் ஐந்து விக்கெட்டுகளை இழந்து 118 ரன்கள் எடுத்திருந்தபோது ஆட்டம் நிறுத்தப்பட்டது. தொடர்ந்து மழை பெய்ததால், போட்டியை மேற்கொண்டு நடத்த முடியாத நிலை ஏற்பட்டது. இதையடுத்து நடுவர்கள் ஆட்டத்தை ரத்து செய்வதாக அறிவித்தனர். இதனால் தொடரை வெல்லும் இரு அணிகளின் வாய்ப்பும் முடிவுக்கு வந்தது. இறுதியில் இந்தியா - வெஸ்ட் இண்டீஸ் தொடர் 2-2 என்ற கணக்கில் சமனில் நிறைவடைந்தது.

இந்திய அணியின் தொடக்கம் எதிர்பார்த்தபடி அமையவில்லை. முதல் ஓவரிலேயே அபிஷேக் சர்மா ஆறு ரன்களில் ஆட்டமிழந்தார். அதன்பிறகு களமிறங்கிய இஷான் கிஷன், தொடக்கத்திலிருந்தே அதிரடியாக விளையாடினார். வெறும் 10 பந்துகளைச் சந்தித்த அவர், இரண்டு சிக்ஸர்கள், மூன்று பவுண்டரிகள் உட்பட 30 ரன்கள் எடுத்தார். அவரது வேகமான ஆட்டம் இந்திய அணியின் ரன் வேகத்தை உயர்த்தியது. சஞ்சு சாம்சனும் அதிரடியாக விளையாடி ஏழு பந்துகளில் 16 ரன்கள் சேர்த்தார்.

இரண்டு பவுண்டரிகள், ஒரு சிக்ஸர் அடித்த அவர், ஐந்தாவது ஓவரில் ஷமார் ஸ்ப்ரிங்கர் பந்துவீச்சில் ஆட்டமிழந்தார். கேப்டன் ஷ்ரேயாஸ் ஐயர் 14 பந்துகளில் 22 ரன்கள் எடுத்தார். இந்திய அணியின் ரன் வேகம் உயர்ந்திருந்தாலும், மறுபுறம் விக்கெட்டுகளும் தொடர்ந்து விழுந்தன. திலக் வர்மா ஏழு ரன்களில் வெளியேறினார். வெஸ்ட் இண்டீஸ் அணியின் கீமோ பால் இரண்டு விக்கெட்டுகளை வீழ்த்தினார். குறைந்த ஓவர்கள் கொண்ட போட்டியில் இந்திய அணியின் அதிரடி ஆட்டம் ரசிகர்களுக்கு எதிர்பார்ப்பை ஏற்படுத்தியது.

இந்திய அணியின் ஸ்கோரை உயர்த்துவதில் நமன் திர் முக்கியப் பங்காற்றினார். அவர் ஆறு பந்துகளில் ஆட்டமிழக்காமல் 24 ரன்கள் எடுத்தார். இதில் மூன்று சிக்ஸர்களும் ஒரு பவுண்டரியும் அடங்கும். குறைந்த பந்துகளில் அதிக ரன்களைச் சேர்த்த அவரது ஆட்டம், இந்திய அணிக்கு வலுவான ஸ்கோரைப் பெற்றுத் தந்தது. இருப்பினும், மழை குறுக்கிட்டதால் இந்திய அணியால் தனது இன்னிங்ஸை முழுமையாக முடிக்க முடியவில்லை. இந்தப் போட்டிக்காக இந்திய அணியில் இரண்டு மாற்றங்கள் செய்யப்பட்டிருந்தன. மயங்க் யாதவுக்குப் பதிலாக புவனேஷ்வர் குமார் சேர்க்கப்பட்டார். சிவம் துபேவும் அணியில் இடம்பிடித்தார்; நிதிஷ் குமார் ரெட்டி அணியிலிருந்து நீக்கப்பட்டார்.

மறுபுறம், தொடரின் முந்தைய போட்டியில் வெஸ்ட் இண்டீஸ் அணி சிறப்பான வெற்றியைப் பதிவு செய்திருந்தது. நான்காவது டி20 போட்டியில் ஷாய் ஹோப் ஆட்டமிழக்காமல் 102 ரன்கள் எடுத்தார். அந்த ஆட்டத்தில் வெஸ்ட் இண்டீஸ் 247 ரன்கள் குவித்தது. இந்திய அணி 223 ரன்கள் மட்டுமே எடுத்து தோல்வியடைந்தது. இதனால் ஐந்தாவது போட்டியில் வெற்றி பெற்று தொடரைக் கைப்பற்ற வேண்டும் என்ற முனைப்புடன் இரு அணிகளும் களமிறங்கின. ஆனால், பெங்களூரு மழை அவர்களின் திட்டங்களைத் தகர்த்தது. ஐந்தாவது போட்டி ரத்தானதால் தொடரில் எந்த அணிக்கும் தனிப்பட்ட வெற்றி கிடைக்கவில்லை. ரசிகர்கள் எதிர்பார்த்த தீர்க்கமான முடிவும் கிடைக்காமல் போனது. இஷான் கிஷன் மற்றும் நமன் திர் போன்ற வீரர்களின் அதிரடி ஆட்டம் இருந்தபோதிலும், இறுதியில் இந்தத் தொடரின் முக்கியச் செய்தியாக மழையின் குறுக்கீடே அமைந்தது.

Sanju Samson Watch Jailer 2: ஜெயிலர் 2 படம் பார்க்க 2 தியேட்டர்களை ஒட்டுமொத்தமா புக் பண்ணிய சஞ்சு சாம்சன்!

Ganesh A — Tue, 20 Oct 2026 14:23:13 +0530

Sanju Samson : வெஸ்ட் இண்டீஸ் தொடர் முடிஞ்ச கையோட, ரஜினிகாந்த் நடிச்ச 'ஜெயிலர் 2' படத்தை பார்க்க டீம் இந்தியா கிரிக்கெட் வீரர் சஞ்சு சாம்சன் ரெண்டு தியேட்டர்களை மொத்தமா புக் பண்ணியிருக்கும் சம்பவம் ரசிகர்களின் கவனத்தை ஈர்த்துள்ளது.

இந்தியா கிரிக்கெட் அணியின் விக்கெட் கீப்பர் சஞ்சு சாம்சன் எப்பவுமே களத்துலயும் சரி, வெளியேயும் சரி ஏதாவது ஒரு விஷயத்துக்காக செய்திகள்ல இடம்பிடிச்சிடுவாரு. கேரளாவுல பிறந்த இவருக்கு இந்தியா முழுக்க பெரிய ரசிகர் பட்டாளமே இருக்கு. சஞ்சு சாம்சன், தமிழ் சினிமாவின் சூப்பர் ஸ்டார் ரஜினிகாந்தோட தீவிர ரசிகர் என்பது ஊருக்கே தெரிஞ்ச விஷயம் தான். இப்போ சமீபத்துல ரிலீசான 'ஜெயிலர் 2' படத்துக்காக ரெண்டு தியேட்டர்களை மொத்தமா புக் பண்ணி, தலைவர் மேல தனக்கு இருக்கிற அன்பை வெளிப்படுத்தியிருக்காரு சஞ்சு.

Jailer 2 Movie Review : சூப்பர்ஸ்டாரின் ஜெயிலர் 2 டாப் கிளாஸா? டம்மி பீஸா? முழு விமர்சனம் இதோ

வெஸ்ட் இண்டீஸ் அணிக்கு எதிரான டி20 தொடர் முடிஞ்ச உடனே, தன்னோட குடும்பம், நண்பர்கள், சக வீரர்களோட சேர்ந்து ஜெயிலர் 2 படம் பார்க்க தியேட்டரையே மொத்தமா புக் பண்ணி எல்லார் கவனத்தையும் ஈர்த்திருக்காரு சஞ்சு சாம்சன். இதுபத்தி பேசின சஞ்சு, 'எனக்கு ரஜினிகாந்த் படம் பார்க்கிறதுனா ரொம்ப பிடிக்கும். ஒவ்வொரு முறையும் ரஜினி படம் எப்போ ரிலீஸ் ஆகும்னு ரொம்ப ஆர்வமா காத்துட்டு இருப்பேன். இந்த முறை ஒரு நாள் லேட் ஆகிடுச்சு. நேத்து டெல்லியில ஒரு நிகழ்ச்சி இருந்ததால படம் பார்க்க முடியல,' அப்படின்னு சொல்லியிருக்காரு.

Jailer 2 : வெற்றியில் அனிருத் - காவ்யா... ரோகிணியில் தனுஷ் - ஐஸ்வர்யா! ஜோடியாக ஜெயிலர் 2 பார்த்த பிரபலங்கள்

'இன்னைக்கு என் அதிர்ஷ்டம், தியேட்டரையே மொத்தமா புக் பண்ண முடிஞ்சது. என் நண்பர்களை இன்னைக்கு படம் பார்க்க கூப்பிட்டு இருக்கேன். என் மனைவியும் என் கூட படம் பார்க்க வராங்க. பெரிய ஸ்கிரீன்ல ரஜினிகாந்த் படத்தை பார்க்க ரொம்பவே ஆர்வமா காத்துட்டு இருக்கேன்,' அப்படின்னு சஞ்சு சாம்சன் சொல்லியிருக்காரு. டீம் இந்தியாவுல இருக்கிற நிறைய வீரர்களுக்கு தமிழ் நல்லாவே புரியும். அதனால, அணியில இருக்கிற வீரர்களுக்கும், சப்போர்ட் ஸ்டாஃப்களுக்கும் இந்த ஜெயிலர் படத்தை பார்க்க வரச் சொல்லி அழைப்பு விடுத்திருக்காராம் சஞ்சு சாம்சன்.

Rajinikanth: 75 வயசுலயும் இப்படி ஒரு எனர்ஜியா? 'சூப்பர் ஸ்டார்' ரஜினியின் ஃபிட்னஸ் சீக்ரெட் என்ன தெரியுமா?

நெல்சன் திலீப்குமார் இயக்கத்துல வந்திருக்கிற ஜெயிலர் 2 படம், 2023-ல ரிலீசான ஜெயிலர் படத்தோட இரண்டாம் பாகம். இந்த படத்துல ரஜினிகாந்த் மறுபடியும் தன்னோட ஐகானிக் கேரக்டரான 'டைகர் முத்துவேல் பாண்டியன்' ரோல்ல நடிச்சிருக்காரு. ரிட்டயர்டு போலீஸ் அதிகாரியான அவரு, தவிர்க்க முடியாத காரணத்தால மறுபடியும் களத்துல இறங்க வேண்டியிருக்கு. அதிரடி ஆக்‌ஷன் காட்சிகள், ரஜினிகாந்தின் மாஸ் ஸ்டைல், இந்தியா முழுக்க இருக்கிற ரசிகர்களை கட்டிப்போடுற சூப்பரான மியூசிக்னு இந்த படம் பட்டைய கிளப்புது. ரிலீசான முதல் அஞ்சு நாள்லயே ஜெயிலர் 2 படம் பாக்ஸ் ஆபிஸ்ல வசூல் மழை பொழிஞ்சிட்டு இருக்கு.

Jailer 2 Memes : ஜெயிலர் 2 ட்ரெண்டிங் மீம்ஸ்..ரஜினி முதல் நெல்சனின் காமெடி வரை இணையத்தில் தெறிக்கும் கலாய்!

IND vs NZ: 15 பந்துகள்… 42 ரன்கள்! கடைசி நேரத்தில் நியூசிலாந்தை அதிரவைத்த இந்திய வீரர் நமன் தீர்..

Asianet News — Thu, 22 Oct 2026 19:06:46 +0530

India vs New Zealand T20: 226 ரன்கள் என்ற இமாலய இலக்கை விரட்டி, நியூசிலாந்து மண்ணில் இந்திய அணி வரலாற்றுச் சாதனை படைத்துள்ளது. 15 பந்துகளில் 42 ரன்கள் விளாசிய நமன் தீரின் அதிரடியால், கடைசி நிமிடத்தில் ஆட்டமே பரபரப்பான திருப்பத்தைச் சந்தித்தது.

இந்திய கிரிக்கெட் ரசிகர்களுக்கு டி20 போட்டிகள் என்றாலே அதிரடிக்கும் பரபரப்புக்கும் பஞ்சமிருக்காது. அதிலும், 200 ரன்களைக் கடந்த இலக்கைத் துரத்தும்போது ஒவ்வொரு பந்தும் ஆட்டத்தின் போக்கையே மாற்றக்கூடும். அப்படியொரு விறுவிறுப்பான ஆட்டத்தில், நியூசிலாந்து நிர்ணயித்த 226 ரன்கள் இலக்கை இந்தியா வெற்றிகரமாக சேஸ் செய்தது.

கிறைஸ்ட்சர்ச்சில் உள்ள ஹாக்லி ஓவல் மைதானத்தில் நடைபெற்ற இந்தப் போட்டியில், முதலில் பேட்டிங் செய்த நியூசிலாந்து அணி 20 ஓவர்களில் 4 விக்கெட் இழப்புக்கு 225 ரன்கள் எடுத்தது. இதையடுத்து, 226 ரன்கள் எடுத்தால் வெற்றி என்ற கடினமான இலக்குடன் இந்திய அணி களமிறங்கியது.

பெரிய இலக்கு என்பதால் தொடக்கத்திலேயே விக்கெட்டுகளை இழக்காமல் ரன் குவிப்பது இந்திய அணிக்கு மிகவும் அவசியமாக இருந்தது. அந்தப் பொறுப்பைத் தொடக்க வீரர்கள் சிறப்பாகக் கையாண்டனர்.

இலக்கைத் துரத்தக் களமிறங்கிய அபிஷேக் சர்மாவும், சஞ்சு சாம்சனும் ஆரம்பம் முதலே அதிரடியாக விளையாடினர். நியூசிலாந்து பந்துவீச்சாளர்களுக்குச் சவால் அளித்த இந்த ஜோடி, முதல் விக்கெட்டுக்கு 93 ரன்கள் விளாசி இந்திய அணிக்கு வலுவான அடித்தளத்தை அமைத்து கொடுத்தனர்.

அபிஷேக் சர்மா வெறும் 12 பந்துகளில் 29 ரன்கள் எடுத்து அதிரடி தொடக்கத்தை வழங்கினார். அவரைத் தொடர்ந்து சஞ்சு சாம்சனும் தனது அதிரடியைத் தொடர்ந்தார்.

Sanju Samson 67(33) vs New Zealand

1st T20 2026-Christchurch

Ball by Ball Highlights https://t.co/N908WWlKeR

— cricket4you (@crick4you) October 22, 2026

33 பந்துகளை எதிர்கொண்ட சஞ்சு சாம்சன் 67 ரன்கள் குவித்து அரைசதம் அடித்தார். பெரிய இலக்கைத் துரத்தும்போது அவருடைய அதிரடி ஆட்டம் இந்திய அணிக்கு நம்பிக்கையைக் கொடுத்தது.

ஆனால், அடுத்தடுத்த விக்கெட்டுகள் இந்திய அணிக்குச் சிக்கலை ஏற்படுத்தின. திலக் வர்மா 11 பந்துகளில் 6 ரன்களும், இஷான் கிஷன் 1 ரன்னும் எடுத்து ஆட்டமிழந்ததாகக் கொடுக்கப்பட்டுள்ள தகவல் தெரிவிக்கிறது. இதனால் இந்திய அணி 122 ரன்களுக்குள் 4 விக்கெட்டுகளை இழந்து அழுத்தமான நிலைக்குத் தள்ளப்பட்டது.

தொடக்கத்தில் இந்தியாவின் ரன் வேகம் சிறப்பாக இருந்தாலும், அடுத்தடுத்து விக்கெட்டுகள் விழுந்ததால் வெற்றி வாய்ப்பு குறித்த கேள்விகள் எழுந்தன. இத்தகைய சூழலில் நடுவரிசை வீரர்கள் நிதானத்துடன் விளையாடி ரன் வேகத்தையும் தக்கவைக்க வேண்டியிருந்தது.

அப்போது ஸ்ரேயஸ் ஐயர் மற்றும் அக்சர் படேல் இணைந்து அணியை மீண்டும் ஆட்டத்துக்குள் கொண்டுவர முயன்றனர்.

ஐந்தாவது விக்கெட்டுக்கு இந்த ஜோடி 24 பந்துகளில் 45 ரன்கள் சேர்த்தது. அக்சர் படேல் 14 பந்துகளில் 24 ரன்கள் எடுத்தார். மறுபுறம், ஸ்ரேயஸ் ஐயர் 28 பந்துகளில் 42 ரன்கள் சேர்த்து அணியின் ஸ்கோரை உயர்த்தினார்.

இருப்பினும், ஸ்ரேயஸ் ஐயர் ஆட்டமிழந்ததும் போட்டியில் மீண்டும் பரபரப்பு அதிகரித்தது. இலக்கை எட்ட இன்னும் ரன்கள் தேவைப்பட்ட நிலையில், இந்திய அணி கடைசி கட்டத்தில் அதிரடியாக விளையாட வேண்டிய கட்டாயம் ஏற்பட்டது.

போட்டியின் கடைசிக் கட்டத்தில் இந்திய அணிக்கு அதிரடி ஆட்டம் மிகவும் அவசியமாக இருந்தது. அப்போது களமிறங்கிய நமன் தீர், பந்துவீச்சாளர்களுக்கு நெருக்கடி கொடுக்கும் வகையில் அதிரடியாக ரன்களைக் குவித்தார்.

வெறும் 15 பந்துகளை எதிர்கொண்ட அவர், ஆட்டமிழக்காமல் 42 ரன்கள் விளாசினார். அவரது அதிரடி ஆட்டத்தில் 5 பவுண்டரிகளும் 2 சிக்ஸர்களும் இடம்பெற்றது.

. .

Naman Dhir, take a bow

#INDvsNZ https://t.co/xmtTOZNYMF

— S P Gautam (@Shubhprakash372) October 22, 2026

குறைந்த பந்துகளில் அதிக ரன்கள் தேவைப்படும் சூழலில், நமன் தீர் போன்ற வீரர்களின் அதிரடி ஆட்டம் போட்டியின் போக்கையே மாற்றக்கூடும். பந்துகளை வீணாக்காமல் ரன் குவித்ததன் மூலம் இந்திய அணியின் வெற்றி இலக்கை எட்டுவதற்கு அவர் முக்கியப் பங்காற்றினார்.

இறுதியில், இந்திய அணி 19.4 ஓவர்களில் 6 விக்கெட் இழப்புக்கு இலக்கை எட்டியது. இதன்படி, இன்னும் 2 பந்துகள் மீதமிருந்த நிலையில் இந்தியா வெற்றி பெற்றது.

IPL 2027: கலீல் அகமது, எல்லிஸை தூக்கிய SRH... பதிலுக்கு CSK வாங்கிய 2 வீரர்கள்! கடுப்பில் ரசிகர்கள்.. பின்னணி என்ன?

Rayar A — Thu, 05 Nov 2026 16:12:25 +0530

IPL 2027: ஐபிஎல் 2027 சீசனுக்காக சிஎஸ்கே அணி கலீல் அகமது, நாதன் எல்லிஸை சன்ரைசர்ஸ் ஹைதராபாத் அணிக்கு கொடுத்து விட்டு லியாம் லிவிங்ஸ்டன், ஜாக் எட்வர்ட்ஸ்ஸை வாங்கியுள்ளது. இதற்கு ரசிகர்கள் கடும் அதிருப்தியை வெளிப்படுத்தியுள்ளனர்.

ஐபிஎல் 2027 தொடரில் களமிறங்குவதற்காக அனைத்து அணிகளும் இப்போதே ஆயத்தமாகி வருகின்றனர். தங்களுக்கு பிடித்தமான அணிகளை மற்ற அணிகளிடம் பேச்சுவார்த்தை நடத்தி டிரேட் செய்து வருகின்றனர். அந்த வகையில் ஐபிஎல் 2027 சீசனுக்கு முன்னதாக சென்னை சூப்பர் கிங்ஸ் (CSK) மற்றும் சன்ரைசர்ஸ் ஹைதராபாத் (SRH) அணிகள் 4 வீரர்களை தங்களுக்குள் மாற்றிக்கொண்டுள்ளன.

இங்கிலாந்து ஆல்-ரவுண்டர் லியாம் லிவிங்ஸ்டன் மற்றும் ஆஸ்திரேலிய வேகப்பந்து வீச்சு ஆல்-ரவுண்டர் ஜாக் எட்வர்ட்ஸ் ஆகியோர் சென்னை அணிக்கு வருகின்றனர். அதேசமயம், இடதுகை வேகப்பந்து வீச்சாளர் கலீல் அகமது மற்றும் ஆஸ்திரேலிய வேகப்பந்து வீச்சாளர் நாதன் எல்லிஸ் ஆகியோர் சன்ரைசர்ஸ் ஹைதராபாத் அணிக்கு செல்கின்றனர்.

ஐபிஎல் 2026 சீசனுக்கு முன்பு லிவிங்ஸ்டனை ரூ.13 கோடிக்கு சன்ரைசர்ஸ் ஹைதராபாத் அணி வாங்கியது. இப்போது அவர் ரூ.6 கோடி என்ற குறைக்கப்பட்ட விலையில் சிஎஸ்கேவில் இணைகிறார். ரூ.3 கோடிக்கு வாங்கப்பட்ட எட்வர்ட்ஸ் அதே விலையில் சென்னைக்கு வருகிறார். பதிலுக்கு, கலீல் அகமது (ரூ.4.8 கோடி) மற்றும் நாதன் எல்லிஸ் (ரூ.2 கோடி) ஆகியோரை அதே விலையில் சன்ரைசர்ஸ் ஹைதராபாத் அணி பெற்றுள்ளது.

இந்த மாற்றம் மூலம் இரண்டு அணிகளுமே தங்களது பலத்தை அதிகரித்துள்ளன. சிஸ்கே அணிக்கு ஆல்-ரவுண்டர்கள் கிடைத்துள்ளனர். ஹைதராபாத் அணி தனது வேகப்பந்து வீச்சை பலப்படுத்தியுள்ளது. ஆஸ்திரேலிய அணிக்காக அறிமுகமாகும் முன்பே ஹைதராபாத் அணியால் வாங்கப்பட்ட எட்வர்ட்ஸ், கால் காயம் காரணமாக 2026 ஐபிஎல் தொடரில் விளையாடவில்லை.

மறுபுறம், கலீல் அகமது மீண்டும் ஹைதராபாத் அணிக்கே திரும்புகிறார். இவர் 2018 முதல் 2021 வரை அதே அணியில் விளையாடியவர். 2025 ஐபிஎல் தொடரில் சிஎஸ்கேவுக்காக 14 போட்டிகளில் 15 விக்கெட்டுகளை வீழ்த்தினார். ஆனால் 2026 சீசனில் தொடை தசைநார் காயம் காரணமாக 5 போட்டிகளில் மட்டுமே விளையாடினார்.

டெத் ஓவர்களில் சிறப்பாக பந்துவீசும் நாதன் எல்லிஸ், SRH அணியின் வேகப்பந்து வீச்சுக்கு கூடுதல் பலம் சேர்ப்பார். சிஸ்கே அணிக்கு வந்துள்ள இங்கிலாந்தை சேர்ந்த லியாம் லிவிங்ஸ்டன் வலது கை ஸ்பின் பவுலிங்குடன் அதிரடியாக பேட்டிங் செய்யக்கூடியவர். மிக பிரம்மாண்ட சிக்சர்களை பறக்க விடுவதில் வல்லவர். இதேபோல் ஆஸ்திரேலியாவை சேர்ந்த ஜாக் எட்வர்ட்ஸ் மீடியம் பாஸ்ட் பவுலிங் மட்டுமின்றி பேட்டிங்கிலும் அதிரடி காட்டுபவர்.

இவர்கள் இருவரும் திறமைவாய்ந்த வீரர்கள் என்றாலும் கடந்த சில சீசன்களின் சிஎஸ்கே அணிக்காக சூப்பராக பவுலிங் செய்த கலீல் அகமது மற்றும் பாஸ்ட், ஸ்லோ என பவுலிங்கில் நிறைய வேரியேஷன் காட்டி பேட்ஸ்மேன்களை திணறடிக்கும் நாதன் எல்லீஸை சிஎஸ்கே விடுவித்தது சரியான அணுகுமுறை அல்ல என ரசிகர்கள் கடும் அதிருப்தியை வெளிப்படுத்தி வருகின்றனர். ஜாக் எட்வர்ட்ஸ் இன்னும் ஒரு ஐபிஎல் போட்டியில் கூட விளையாடவில்லை.

மறுபக்கம் ஆர்சிபி, பஞ்சாப், ராஜஸ்தான், ஹைதாராத அணிகளுக்காக விளையாடியுள்ள லியாம் லிவிங்ஸ்டன் 51 போட்டிகளில் விளையாடி 7 அரைசதத்துடன் 1066 ரன்கள் எடுத்துள்ளார். அவரது அதிக்கப்பட்சம் 96. பவுலிங்கில் 13 விக்கெட் எடுத்துள்ளார்.

லிவிங்ஸ்டனை பொறுத்தவரை எதாவது ஒரு மேட்ச் கிளிக் ஆனால் மட்டுமே அவரால் ஜொலிக்க முடியும். தொடர்ந்து கன்சஸ்டியாக விளையாடுபவர் அல்ல. அதுவும் ஸ்பின் பவுலிங்கில் அதிகமாக தடுமாறக்கூடியவர். ஏற்கெனவே சென்னை சேப்பாக்கம் ஸ்பின்னுக்கு சாதகமாக இருக்கும் நிலையில், அவரை எடுத்தது சிஎஸ்கேவின் பெரும் தவறு என ரசிகர்கள் விமர்சனம் செய்து வருகின்றனர்.

India vs New Zealand: நியூசிலாந்துக்கு எதிரான 2வது ஒருநாள் போட்டியில் இந்தியா த்ரில் வெற்றி!

Ganesh A — Sat, 07 Nov 2026 16:01:06 +0530

நியூசிலாந்து அணிக்கு எதிரான 2வது ஒருநாள் போட்டியில் இந்திய அணி 4 ரன்கள் வித்தியாசத்தில் த்ரில் வெற்றி பெற்றது. வெலிங்டனில் நடந்த இந்தப் போட்டியில் மழை குறுக்கிட்டதால், டக்வொர்த் லூயிஸ் முறைப்படி இந்தியா வெற்றி பெற்றதாக அறிவிக்கப்பட்டது. 135 ரன்கள் எடுத்தால் வெற்றி என்ற இலக்குடன் களமிறங்கிய இந்திய அணி, 26 ஓவர்களில் 7 விக்கெட் இழப்புக்கு 113 ரன்கள் எடுத்திருந்த போது மழை வந்தது. அதன்பிறகு ஆட்டத்தை தொடர முடியவில்லை. இதனால் டக்வொர்த் லூயிஸ் விதிப்படி இந்திய அணி 4 ரன்கள் வித்தியாசத்தில் வெற்றி பெற்றதாக அறிவிக்கப்பட்டது. இதன் மூலம் 5 போட்டிகள் கொண்ட ஒருநாள் தொடரில் இந்தியா 2-0 என்ற கணக்கில் முன்னிலை வகிக்கிறது.

முன்னதாக டாஸ் தோற்று முதலில் பேட்டிங் செய்த நியூசிலாந்து அணி, 41 ஓவர்களில் 134 ரன்களுக்கு ஆல் அவுட் ஆனது. அந்த அணியில் அதிகபட்சமாக டேரில் மிட்செல் 55 ரன்கள் அடித்தார். இந்திய அணி தரப்பில் அபாரமாக பந்துவீசிய குர்னூர் பிரார் 4 விக்கெட்டுகளை வீழ்த்தினார். ஆகிப் நபி, அக்சர் படேல், அன்ஷுல் கம்போஜ் ஆகியோர் தலா 2 விக்கெட்டுகளை எடுத்தனர். இதைத் தொடர்ந்து பேட்டிங் செய்த இந்திய அணியில் ஷ்ரேயாஸ் ஐயர் 30 ரன்களும், கே.எல் ராகுல் ஆட்டமிழக்காமல் 26 ரன்களும் எடுத்து அணியை மீட்டனர். கேப்டன் ரோகித் சர்மா (23), நமன் திர் (12) ஆகியோரும் ஓரளவு ரன்கள் சேர்த்தனர்.

பேட்டிங்கில் சொதப்பிய நியூசிலாந்து

ராகுலுடன் ஆகிப் நபி (1) இறுதிவரை ஆட்டமிழக்காமல் களத்தில் இருந்தார். சுப்மன் கில் (0), விராட் கோலி (7), அக்சர் படேல் (7), அன்ஷுல் கம்போஜ் (1) ஆகியோர் அடுத்தடுத்து அவுட் ஆகி ஏமாற்றம் அளித்தனர். நியூசிலாந்து தரப்பில் ஜேக்கப் டஃபி, கைல் ஜேமிசன் ஆகியோர் தலா 3 விக்கெட்டுகளையும், மேத்யூ ஃபிஷர் ஒரு விக்கெட்டையும் வீழ்த்தினர். நியூசிலாந்து அணியில் மிட்செலுக்கு அடுத்தபடியாக மிட்செல் சான்ட்னர் (31), ஹென்றி நிக்கோல்ஸ் (11) மட்டுமே இரட்டை இலக்க ரன்களை தொட்டனர். தொடக்கமே அந்த அணிக்கு பெரும் அதிர்ச்சியாக அமைந்தது.

ஆட்டத்தின் 2வது ஓவரிலேயே டிம் சீஃபெர்ட்டை (0) டக் அவுட் ஆக்கினார் நபி. அடுத்ததாக வில் யங்கையும் நபி வெளியேற்றினார். நிக்கோல்ஸை கம்போஜ் கிளீன் போல்டாக்கினார். டாம் லாதம் (7), க்ளென் பிலிப்ஸ் (0) இருவரையும் ஒரே ஓவரில் பிரார் பெவிலியன் அனுப்பினார். இதனால் 20 ஓவர்களில் 53 ரன்களுக்கு 5 விக்கெட்டுகளை இழந்து நியூசிலாந்து தத்தளித்தது.

பின்னர் மிட்செல் - சான்ட்னர் ஜோடி சேர்ந்து 59 ரன்கள் பார்ட்னர்ஷிப் அமைத்து அணியை சரிவில் இருந்து மீட்டனர். ஆனால் மிட்செலின் விக்கெட்டை வீழ்த்தி அக்சர் படேல் இந்தியாவுக்கு பிரேக் த்ரூ கொடுத்தார். கடைசி 4 விக்கெட்டுகளை வெறும் 22 ரன்களுக்குள் நியூசிலாந்து இழந்தது. சான்ட்னரை தொடர்ந்து நாதன் ஸ்மித் (3), கைல் ஜேமிசன் (7), பிளேர் டிக்னர் (2) ஆகியோரும் அடுத்தடுத்து ஆட்டமிழந்தனர். இரு அணிகளின் பிளேயிங் லெவன் விவரம்:

நியூசிலாந்து: வில் யங், டிம் சீஃபெர்ட், ஹென்றி நிக்கோல்ஸ், டேரில் மிட்செல், டாம் லாதம், க்ளென் பிலிப்ஸ், மிட்செல் சான்ட்னர், நாதன் ஸ்மித், கைல் ஜேமிசன், ஜேக்கப் டஃபி, பிளேர் டிக்னர்.

இந்தியா: ரோகித் சர்மா, சுப்மன் கில், விராட் கோலி, ஷ்ரேயாஸ் ஐயர், கே.எல். ராகுல், அக்சர் படேல், நமன் திர், அன்ஷுல் கம்போஜ், ஆகிப் நபி, குர்னூர் பிரார், அர்ஷ்தீப் சிங்.

IND vs NZ 3rd T20: அதிவேக சதம்.. அதிவேக பவர்பிளே ரன்.. ஒரே போட்டியில் பல ரிக்கார்டுகளை உடைத்த இந்தியா!

Rayar A — Tue, 27 Oct 2026 17:10:52 +0530

IND vs NZ 3rd T20: நியூசிலாந்துக்கு எதிரான டி20 தொடரை இந்தியா கைப்பற்றியுள்ளது. அபிஷேக் சர்மா 35 பந்துகளில் சதம் விளாசிய நிலையில், அதிவேக சதம், அதிவேக பவர்பிளே ரன்கள் என ஒரே போட்டியில் பல்வேறு ரிக்கார்டுகளை உடைத்து இந்திய அணி சாதனை படைத்துள்ளது.

நியூசிலாந்துக்கு எதிரான டி20 தொடரின் முதல் 3 போட்டிகளிலும் இந்திய அணி அபார வெற்றி பெற்றுள்ளது. இதன் மூலம் இன்னும் 2 போட்டிகள் மீதமுள்ள நிலையிலேயே தொடரை இந்தியா கைப்பற்றியுள்ளது. இன்று வெலிங்டனில் உள்ள ஹென்றி மைதானத்தில் நடந்த 3வது டி20 போட்டியில் இந்திய அணி 6 விக்கெட் வித்தியாசத்தில் வெற்றி பெற்றது.

இந்த போட்டியில் முதலில் பேட்டிங் செய்த நியூசிலாந்து அணி 3 விக்கெட் இழப்புக்கு 198 ரன்கள் எடுத்தது. டேரில் மிட்செல் சிறப்பாக விளையாடி 52 பந்துகளில் தலா 5 பவுண்டரி மற்றும் சிக்ஸர்களுடன் 89 ரன்கள் குவித்து ஆட்டமிழக்காமல் இருந்தார். ஃபின் ஆலன் 25 பந்துகளில் 5 சிக்சர்களுடன் 40 ரன்கள் எடுத்தார்.

பின்பு 199 ரன்கள் என்ற இமாலய இலக்கை துரத்திய இந்திய அணி தொடக்க வீரர்களான அபிஷேக் சர்மா மற்றும் வைபவ் சூர்யவன்ஷி ஆகியோரின் அதிரடி ஆட்டத்தால் இந்தியா எளிதாக வென்றது. 13.2 ஓவர்களில் 4 விக்கெட்டுகளை மட்டும் இழந்து வெற்றியை ருசித்தது.

நியூசிலாந்து பவுலர்களை கதற விட்ட அபிஷேக் சர்மா வெறும் 15 பந்துகளி அரைசதம் விளாசினார். வெறும் 35 பந்துகளில் சதம் விளாசி சாதனை படைத்தார். இறுதிவரை அதிரடியாக விளையாடிய அபிஷேக் சர்மா 38 பந்துகளில் 113 ரன்கள் குவித்து ஆட்டமிழந்தார். மொத்தம் 9 பவுண்டரிகள் மற்றும் 11 சிக்ஸர்களை பறக்க விட்டு அசத்தினார்.

மற்றொரு பக்கம் இளம் வீரர் 15 வயதான வைபவ் சூர்யவன்ஷி 4 பவுண்டரி, 4 சிக்சர்களுடன் 19 பந்துகளில் 45 ரன்கள் விளாசி அவுர் ஆனார். இந்திய அணி வெறும் 13.2 ஓவரில் 4 விக்கெட் இழப்பிற்கு 199 ரன்கள் எடுத்து மாபெரும் வெற்றி பெற்றது. தொடரையும் அசத்தலாக வென்றுள்ளது.

நியூசிலாந்து மண்ணில் இந்திய அணி இந்த அளவுக்கு ஆதிக்கம் செலுத்துவது இதுவே முதல் முறை. பந்துவீச்சாளர்கள் பெரிய அளவில் சோபிக்கவில்லை என்றாலும், பேட்ஸ்மேன்களின் சிறப்பான ஆட்டத்தால் தொடர் வெற்றி உறுதியானது. மீதமுள்ள 2 போட்டிகளிலும் வென்று நியூசிலாந்தை ஒயிட்வாஷ் செய்வதே இப்போது இந்தியாவின் இலக்காக உள்ளது.

நியூசிலாந்தை அதன் சொந்த மண்ணில் கதற விட்ட இந்திய அணி ஒரே போட்டியில் பல்வேறு சாதனைகளை தகர்த்தெறிந்துள்ளது. அதாவது பேட்டிங்கின்போது வெறும் 2.2 ஓவர்களில் 50 ரன்களை தொட்ட இந்திய அணி 14 பந்துகளில் அதிவேகமாக 50 ரன்களை தொட்ட முதல் அணி என்ற சாதனையை படைத்தது. இதேபோல் வெறும் 5 ஓவர்களில் அதாவது 30 பந்துகளில் 100 ரன்களை தொட்ட முதல் அணி என்ற சாதனையையும் இந்தியா பெற்றுள்ளது.

இதுமட்டுமின்றி அபிஷேக் சர்மா மற்றும் வைபவ் சூர்யவன்ஷியின் காட்டடியால் பவர்பிளேயின் 6 ஓவர்களில் இந்திய அணி விக்கெட் இழப்பிற்கு 118 ரன்கள் எடுத்தது. இதன்மூலம் சர்வதேச டி20 கிரிக்கெட்டில் பவர்பிளேயில் அதிக ரன்கள் எடுத்த முதல் அணி என்ற உலக சாதனையையும் இந்திய அணி படைத்தது.

இன்றைய சதத்துடன் 11 டி20 சதங்களை அடித்துள்ள அபிஷேக் சர்மா, விராட் கோலியின் 10 டி20 சதங்களை முறியடித்து சாதனை படைத்துள்ளார் என்பதும் குறிப்பிடத்தக்கது.

IND vs PAK: 80 பந்துகளில் மிரட்டல் சதம்.. பாக்.க்கு தண்ணி காட்டிய U19 புயல்.. யார் இந்த ராஜ்புத்?

Asianet News — Sun, 08 Nov 2026 17:45:55 +0530

பாகிஸ்தானுக்கு எதிரான அண்டர்-19 ஆசியக் கோப்பை போட்டியில் இந்திய அணி விக்கெட்டுகளை இழந்து தவித்தபோது, வெறும் 80 பந்துகளில் சதம் விளாசி மிரட்டியுள்ளார் அர்ஜுன் ராஜ்புத். பஞ்சாப்பைச் சேர்ந்த இந்த 19 வயது ஆல்ரவுண்டரைப் பற்றி விரிவாகப் பார்ப்போம்.

2026 ஏசிசி ஆண்கள் 19 வயதுக்குட்பட்ட ஆசியக் கோப்பையின் 'ஏ' பிரிவு ஆட்டத்தில், பாகிஸ்தானுக்கு எதிராக இந்தியா தடுமாறியபோது, பஞ்சாபின் 19 வயது ஆல்-ரவுண்டர் அர்ஜுன் ராஜ்புத் தனது அபாரமான எதிர் தாக்குதல் சதத்தால் ஜொலித்தார். அல் அமராத் கிரிக்கெட் மைதானத்தில் நடந்த இந்த பரபரப்பான போட்டியில், கடும் அழுத்தத்தின் கீழ் களமிறங்கி மிகுந்த தைரியத்துடன் விளையாடிய அர்ஜுன், பாகிஸ்தானின் பந்துவீச்சுத் தாக்குதலை முறியடித்தார்; இதில் பாகிஸ்தானின் முன்னணி வரிசை பேட்ஸ்மேன்கள் படுதோல்வி அடைந்தனர்.

டாஸ் வென்று பேட்டிங்கைத் தீர்மானித்த லக்ஷ்யா ராஜ்சந்தானி தலைமையிலான இந்திய அணி, ஆரம்பத்திலிருந்தே பெரும் நெருக்கடியைச் சந்தித்தது. பாகிஸ்தானின் புதிய பந்துவீச்சாளர்களின் அழுத்தத்தால், இந்தியா வெறும் 42 ரன்களுக்கு 4 விக்கெட்டுகளை இழந்தது. பாகிஸ்தான் வேகப்பந்துவீச்சாளர்கள் இன்னிங்ஸில் ஆதிக்கம் செலுத்திக் கொண்டிருந்தபோது, ஐந்தாவது விக்கெட்டுக்காகக் களமிறங்கிய அர்ஜுன் ராஜ்புத், தன் ஆட்டத்தை சற்றும் தளர்த்தவில்லை. அவர் எதிர்த்தாக்குதல் ஷாட்கள் மூலம் எதிரணி பந்துவீச்சாளர்களுக்கு எதிராகக் கிளர்ச்சி செய்தார். அவர் தனது சதத்தை வெறும் 80 பந்துகளில் நிறைவு செய்தார்.

தனி ஒருவராகப் போராடிய அர்ஜுன் ராஜ்புத், 85 பந்துகளில் 107 ரன்கள் குவித்து அணிக்கு பெரும் உத்வேகத்தை அளித்தார். அவர் களத்தின் அனைத்து மூலைகளிலிருந்தும் பவுண்டரிகளையும் சிக்ஸர்களையும் அடித்து பாகிஸ்தான் பந்துவீச்சாளர்களை திணறடித்தார். ரிஸ்வானுல்லாவின் பந்துவீச்சில் ஃபர்ஹானிடம் கேட்ச் ஆகி 7-வது விக்கெட்டுக்கு அர்ஜுன் ஓய்வு பெற்றபோது, இந்திய அணி ஒரு பாதுகாப்பான நிலையை அடைந்தது. மனால் சௌஹானுடன் ஒரு மதிப்புமிக்க கூட்டணியை அமைத்த அர்ஜுன், இந்திய இன்னிங்ஸின் வேகத்தை திடீரென மாற்றினார்.

இந்தப் போட்டியில் அர்ஜுனின் அதிரடி ஆட்டத்தைப் பார்த்த வர்ணனையாளர்கள், அவரை இந்திய அணியின் ஜாம்பவான் யுவராஜ் சிங்குடன் ஒப்பிட்டனர். இடது கையால் பேட் செய்வது, மிடில் ஓவர்களில் விரைவாக ரன்கள் சேர்ப்பது, மற்றும் முக்கியமான நேரங்களில் ஆஃப்-ஸ்பின் மூலம் விக்கெட்டுகளை வீழ்த்துவது என்பதே அர்ஜுனின் பாணியாகும். யுவராஜ் சிங்கைப் போலவே, களத்தில் ஷாட்களைத் தேர்ந்தெடுத்து பவுண்டரிகளை அடிக்கும் திறன் அர்ஜுனுக்கும் உள்ளது.

பஞ்சாபின் ஜலந்தரைச் சேர்ந்த அர்ஜுன் ராஜ்புத், தனது தொடர்ச்சியான சிறப்பான ஆட்டங்களால் உள்ளூர் கிரிக்கெட்டில் தனக்கென ஒரு பெயரைப் பெற்றுள்ளார். கூச் பெஹார் மற்றும் வினூ மங்கட் கோப்பைகளில் பஞ்சாப் வயதுப் பிரிவு அணிக்காக விளையாடியதன் மூலம் அவர் தேர்வாளர்களின் கவனத்தை ஈர்த்தார். பின்னர், ஷேர்-இ-பஞ்சாப் டி20 கோப்பையில் லூதியானா லயன்ஸ் அணிக்காக மிடில் ஆர்டரில் விளையாடியபோது, மொஹாலிக்கு எதிராக 46 பந்துகளில் 78 ரன்கள் குவித்து தனது அதிரடி பேட்டிங் திறமையை வெளிப்படுத்தினார்.

உள்ளூர் போட்டிகளில் அவர் காட்டிய இந்த சிறப்பான ஆட்டம், அவருக்கு இந்திய 19 வயதுக்குட்பட்டோர் அணியில் இடத்தைப் பெற்றுத் தந்தது. இலங்கை மற்றும் ஆஸ்திரேலியாவுக்கு எதிரான இளையோர் ஒருநாள் தொடர்களில், சுழற்பந்து வீச்சை எளிதாக எதிர்கொண்டும், ஆட்டத்தின் இறுதியில் வேகத்தை மாற்றியும் ஒற்றை ரன்களை எடுப்பதில் தனது திறமையை நிரூபித்தார். அவர் பேட்டிங்கில் மட்டுமல்ல, பந்துவீச்சிலும் ஜொலிக்கிறார். இந்தத் தொடரின் முதல் போட்டியில், நேபாளத்திற்கு எதிராக 5.3 ஓவர்களில் வெறும் 8 ரன்களுக்கு 3 விக்கெட்டுகளை வீழ்த்தி தனது சிறப்பான பந்துவீச்சை வெளிப்படுத்தினார்.

இந்திய மூத்த கிரிக்கெட் அணியில் தற்போது ஒரு இடது கை மிடில் ஆர்டர் பேட்ஸ்மேன் மற்றும் ஒரு பகுதி நேர ஆஃப்-ஸ்பின் பந்துவீச்சு ஆல்-ரவுண்டர் பற்றாக்குறை உள்ளது. அர்ஜுன் ராஜ்புத் இந்தத் தகுதிக்கு கச்சிதமாகப் பொருந்துகிறார். மிடில் ஓவர்களில் களத்தில் நிலைத்து நிற்கும் திறன் மட்டுமல்லாமல், அதிரடி ஷாட்கள் மூலம் ஒரு போட்டியின் முடிவையே மாற்றும் திறனும் அவரிடம் உள்ளது.

இன்னும் ஒரு மாதத்தில் ஐபிஎல் ஏலம் நடைபெற உள்ள நிலையில், பாகிஸ்தானுக்கு எதிராக அர்ஜுன் ராஜ்புத் அடித்த இந்த அபாரமான சதம் அவரைச் செய்திகளில் இடம்பெறச் செய்துள்ளது. இது போன்ற ஒரு இன்னிங்ஸுடன், வரவிருக்கும் ஐபிஎல் ஏலத்தில் ஃபிரான்சைஸ்கள் அர்ஜுனைக் குறிவைக்கும் என்பதில் சந்தேகமில்லை.

IND vs NZ 1st ODI: முதல் ஒருநாள் போட்டியில் இந்தியா அபார வெற்றி.. கோலி அதிரடி!

Asianet News — Wed, 04 Nov 2026 17:06:44 +0530

Virat Kohli: நியூசிலாந்துக்கு எதிரான ஒருநாள் தொடரை இந்திய அணி வெற்றியுடன் தொடங்கியது. மழை காரணமாக ஆட்டம் பலமுறை நிறுத்தப்பட்ட போதிலும், இந்திய வீரர்கள் எந்தவித அழுத்தமும் இன்றி இலக்கை விரட்டிப் பிடித்தனர்.

இந்திய அணியின் முன்னாள் கேப்டனும் நட்சத்திர பேட்ஸ்மேனுமான விராட் கோலி, நவம்பர் 4, புதன்கிழமை அன்று ஆக்லாந்தில் உள்ள ஈடன் பார்க்கில் நியூசிலாந்துக்கு எதிரான ஐந்து போட்டிகள் கொண்ட ஒருநாள் தொடரின் முதல் போட்டியில், பேட்டிங்கில் மேலும் ஒரு மைல்கல்லை எட்டியுள்ளார்.

டெஸ்ட் மற்றும் டி20 போட்டிகளிலிருந்து ஓய்வு பெற்ற விராட் கோலி, இந்தியாவின் 50 ஓவர் அணியில் தனது தனித்துவமான இடத்தில் நிலைத்து நின்று, இன்னிங்ஸை வலுப்படுத்துவதில் முக்கியப் பங்காற்றி வருகிறார். கடந்த அக்டோபரில் மேற்கிந்தியத் தீவுகளுக்கு எதிரான மூன்று போட்டிகள் கொண்ட ஒருநாள் தொடரில் கடைசியாக விளையாடிய பிறகு, போட்டி கிரிக்கெட்டிற்குத் திரும்பிய இந்த மூத்த வீரர், அந்த வரலாற்றுச் சாதனையை எட்டுவதற்கு வெறும் 12 ரன்கள் மட்டுமே தேவைப்பட்ட நிலையில் இந்தப் போட்டியில் களமிறங்கினார்.

ஆக்லாந்தில் பலமுறை மழை காரணமாக ஆட்டம் தாமதமானதைத் தொடர்ந்து, DLS முறையின் கீழ் 32 ஓவர்களில் 143 ரன்களாக இலக்கு திருத்தப்பட்ட நிலையில், இந்தியா 186 ரன்களைத் துரத்தியது. ரோஹித் சர்மா தொடக்கத்திலேயே ஆட்டமிழந்த பிறகு களமிறங்கிய கோலி, தனது புகழ்பெற்ற ஒருநாள் கிரிக்கெட் வாழ்க்கையில் 3-வது இடத்தில் பேட்டிங் செய்து, தேவையான ரன்களை அடித்து 13,000 ரன்கள் என்ற மைல்கல்லை எட்டினார்.

10 ஆண்டுகளுக்கும் மேலாக, இந்திய பேட்டிங் வரிசையில் 3-வது இடம் என்பது தரத்தை நிர்ணயிக்கும் நிலைத்தன்மைக்கு மறுபெயராக இருந்து வருகிறது. மேலும், ஒருநாள் கிரிக்கெட் வரலாற்றில் 3-வது இடத்தில் பேட்டிங் செய்து 13,000 ரன்களைக் குவித்த முதல் பேட்ஸ்மேன் என்ற வரலாற்றுச் சாதனையை விராட் கோலி படைத்துள்ளார்.

வெறும் 251 இன்னிங்ஸ்களில், கோலி இந்த வரலாற்றுச் சிறப்புமிக்க ஒருநாள் பேட்டிங் மைல்கல்லை எட்டிய அதிவேக வீரர் என்ற மகத்தான சாதனையை நிகழ்த்தியுள்ளார். முன்னாள் ஆஸ்திரேலிய கேப்டன் ரிக்கி பாண்டிங் 330 ஒருநாள் இன்னிங்ஸ்களில் 3-வது இடத்தில் பேட்டிங் செய்து 12,662 ரன்களைக் குவித்த நிலையில், விராட் கோலியின் 13,000 ரன்கள் என்ற மைல்கல், அவரை விட மிக வேகமாக, 79 இன்னிங்ஸ்கள் குறைவாகவே எட்டப்பட்டது.

மேலும், ஒரே பேட்டிங் வரிசையில் அதிக ஒருநாள் ரன்கள் எடுத்ததில், விராட் கோலி தனது முன்னாள் இந்திய சக வீரரும் பேட்டிங் ஜாம்பியுமான சச்சின் டெண்டுல்கருக்குப் பின்னால் உள்ளார். டெண்டுல்கர் 385 ஒருநாள் இன்னிங்ஸ்களில் 2-வது இடத்தில் பேட்டிங் செய்து 13,685 ரன்களைக் குவித்து, எல்லாக் காலத்திற்குமான பட்டியலில் முதலிடத்தில் உள்ளார்.

விராட் கோலி ஒரே இடத்தில் பேட்டிங் செய்து 251 இன்னிங்ஸ்களில் 13,000 ரன்களைக் கடந்திருப்பது, அந்தப் புகழ்பெற்ற பேட்ஸ்மேனின் ஈடு இணையற்ற நிலைத்தன்மை, திறமை மற்றும் ரன் குவிப்பதில் உள்ள தீராத தாகத்தை எடுத்துக்காட்டுகிறது. சராசரியாக, கோலி இந்த இடத்தில் ஒரு இன்னிங்ஸிற்கு 51 ரன்களுக்கு மேல் எடுத்திருக்கக்கூடும்; அவர் 48 சதங்களையும் கிட்டத்தட்ட 70 அரை சதங்களையும் குவித்துள்ளார்.

மேலும், 3-வது இடத்தில் 5,000 ரன்களுக்கு மேல் எடுத்த அனைத்து பேட்ஸ்மேன்களிலும், கோலியின் 61-க்கும் மேற்பட்ட பேட்டிங் சராசரியே மிக உயர்ந்ததாகும். 13,000 ரன்கள் என்ற மைல்கல்லைக் கடந்த நேரத்தில், அவரது சராசரி 61.61 என்ற வியக்கத்தக்க அளவில் இருந்தது. இது ரிக்கி பாண்டிங் (42.48), குமார் சங்கக்கார (44.71), ஜாக் காலிஸ் (45.72) மற்றும் கேன் வில்லியம்சன் (51.61) போன்ற மற்ற ஜாம்பவான்களின் சராசரியை விட மிகவும் அதிகமாகும்.

2009-ஆம் ஆண்டு முதல், விராட் கோலி தனது மூன்றாவது ஒருநாள் போட்டி பேட்டிங் இடத்தை தனக்கு மிகவும் பிடித்தமான களமாக நிலைநிறுத்திக் கொண்டார். உலகெங்கிலும் உள்ள அனைத்து விதமான ஆடுகளச் சூழல்களிலும், எதிரணி பந்துவீச்சை குறிப்பிடத்தக்க சீரான தன்மையுடன் அவர் ஆதிக்கம் செலுத்தி வருகிறார். இந்த அனுபவமிக்க இந்திய பேட்ஸ்மேன், உலக கிரிக்கெட் வரலாற்றில் மிகவும் நம்பகமான டாப்-ஆர்டர் தூண்களில் ஒருவராக வளர்ந்துள்ளார்.

virat kohli 74(51) BBB vs NZ ❤️ https://t.co/tfGlDKOq4Z

— (@__jaisball) November 4, 2026

ஒருநாள் போட்டிகளில் 3-வது இடத்தில் பேட்டிங் செய்யும்போது கோலி எட்டிய 13,000 ரன்கள் என்ற மைல்கல்லை இரண்டு பகுதிகளாகப் பிரிக்கலாம். 37 வயதான இவர், ஜூன் 2017-ல் 127 இன்னிங்ஸ்களில் 56.47 சராசரியில் 6000 ரன்களை நிறைவுசெய்தார். பின்னர், 7000 ரன்கள் என்ற இந்த வரலாற்றுச் சாதனையை எட்ட மேலும் 124 இன்னிங்ஸ்களை எடுத்துக்கொண்டார். இது, 9-வது இடத்தில் பேட்டிங் செய்யும்போது ஆண்டுதோறும் அவர் காட்டும் அபாரமான நிலைத்தன்மையை நிரூபிக்கிறது.

ஜூன் 2017 முதல் ஆண்டுதோறும், விராட் கோலி ஒருநாள் போட்டிகளில் 60-க்கும் மேற்பட்ட அபாரமான சராசரியைப் பராமரித்து வருகிறார். அவர் விளையாடிய ஏறக்குறைய ஒவ்வொரு முழு ஆட்டக்கால அளவிலும் தொடர்ந்து 750 ரன்களுக்கு மேல் எடுத்துள்ளார். ஒரு கேப்டனாக, கோலி 83 போட்டிகளில் 75.98 சராசரியில், 20 சதங்கள் மற்றும் 25 அரைசதங்கள் உட்பட 5091 ரன்களைக் குவித்துள்ளார்.

கேப்டனாக மூன்றாவது இடத்தில் பேட்டிங் செய்து 5000-க்கும் மேற்பட்ட ஒருநாள் ரன்களைக் குவித்த ஒரே வீரர் இந்த அனுபவமிக்க இந்திய பேட்ஸ்மேன் ஆவார். கேப்டன் அல்லாத நிலையில், விராட் 171 போட்டிகளில் 55.28 சராசரியில் 7961 ரன்கள் எடுத்துள்ளார்; இதில் 28 சதங்களும் 45 அரைசதங்களும் அடங்கும்.

நியூசிலாந்துக்கு எதிரான முதல் ஒருநாள் போட்டியில் கோலி 51 பந்துகளில் 13 பவுண்டரிகள் மற்றும் ஒரு சிக்ஸருடன் 74 ரன்கள் எடுத்தார். இதன் மூலம், ஒருநாள் போட்டிகளில் 3-வது இடத்தில் பேட்டிங் செய்து 254 போட்டிகளில் அவர் எடுத்த மொத்த ரன்களின் எண்ணிக்கை 13062 ஆக உயர்ந்தது. இதில் 48 சதங்கள் மற்றும் 71 அரைசதங்கள் அடங்கும். அவரது சராசரி 61.61 ஆகும்.

மூத்த பேட்ஸ்மேனான விராட் கோலி, முறையே 2024 மற்றும் 2025-ல் டி20 மற்றும் டெஸ்ட் ஃபார்மட்களில் இருந்து ஓய்வு பெற்றதால், அவர் இந்தியாவின் டி20 மற்றும் டெஸ்ட் அணிகளில் இடம்பெறவில்லை. தென்னாப்பிரிக்கா, ஜிம்பாப்வே மற்றும் தென்னாப்பிரிக்கா இணைந்து நடத்தும் 2027 உலகக் கோப்பை வரை தனது புகழ்பெற்ற சர்வதேச கிரிக்கெட்டை நீட்டிக்கும் நோக்கில், அவர் ஒருநாள் போட்டிகளில் மட்டுமே முழுமையாக கவனம் செலுத்தி வருகிறார்.

டெஸ்ட் போட்டிகளிலிருந்து ஓய்வு பெற்ற பிறகு, 37 வயதான அவர், ஆஸ்திரேலியா (வெளிநாட்டில்), தென்னாப்பிரிக்கா (உள்நாட்டில்), நியூசிலாந்து (உள்நாட்டில்), இங்கிலாந்து (வெளிநாட்டில்), ஆப்கானிஸ்தான் (உள்நாட்டில்), மற்றும் மேற்கிந்திய தீவுகள் (உள்நாட்டில்) ஆகிய அணிகளுக்கு எதிரான தொடர்கள் உட்பட, தற்போது நியூசிலாந்துக்கு (வெளிநாட்டில்) எதிரான தொடர் உட்பட அனைத்து ஒருநாள் தொடர்களிலும் விளையாடி, தனது சிறப்பான ஆட்டத்தை வெளிப்படுத்தி, வழக்கமான ஆதிக்கத்துடன் இந்தியாவின் மத்திய வரிசையைத் தாங்கி வருகிறார்.

அக்டோபர் 2025 முதல் தனது கடைசி 16 ஒருநாள் போட்டிகளில், கோலி 4 சதங்கள் மற்றும் 6 அரைசதங்கள் உட்பட 1002 ரன்களை, நம்பமுடியாத 77.07 சராசரி மற்றும் 115.17 ஸ்டிரைக் ரேட்டுடன் குவித்துள்ளார். இது, அவரது பிற்கால வாழ்க்கையில் ஏற்பட்ட வியக்கத்தக்க எழுச்சியையும், பெரிய ஸ்கோர்களை அடிப்பதில் அவருக்குப் புத்துயிர் அளித்த வேட்கையையும் எடுத்துக்காட்டுகிறது. இதுவே, 50 ஓவர் வடிவத்தில் அவர் முழு கவனம் செலுத்துவதற்குக் காரணமாக அமைந்துள்ளது.

தனது ஒருநாள் சர்வதேசப் போட்டிகளில், விராட் கோலி 318 போட்டிகளில் விளையாடி, 55 சதங்கள் மற்றும் 80 அரைசதங்கள் உட்பட, 58.84 சராசரியில் 15183 ரன்களைக் குவித்துள்ளார்.

IPL 2027 Auction: ரூ.14 கோடி பிளேயரை கழட்டிவிடும் சிஎஸ்கே.. தோனியின் மாஸ்டர் பிளான்!

Asianet News — Mon, 02 Nov 2026 21:49:41 +0530

ஐபிஎல் 2027 ஏலத்திற்கு முன்னதாக, சென்னை சூப்பர் கிங்ஸ் அணி பெரிய மாற்றங்களை செய்ய உள்ளது. ரூ. 14.2 கோடி மதிப்பிலான ஆல்-ரவுண்டர் பிரஷாந்த் வீரை அணியிலிருந்து விடுவிக்க அவர்கள் திட்டமிட்டுள்ளதாகத் தெரிவிக்கப்படுகிறது. தோனியின் அணி என்ன திட்டமிடுகிறது?

ஐபிஎல் 2027 மினி ஏலத்திற்கு முன்னதாக, சென்னை சூப்பர் கிங்ஸ் (சிஎஸ்கே) அணி ஒரு பரபரப்பான முடிவுக்குத் தயாராகி வருவதாகத் தெரிகிறது. கடந்த சீசனில் ரூ.14.2 கோடிக்கு வாங்கப்பட்ட ஆல்-ரவுண்டர் பிரசாந்த் வீரை விடுவிக்க அந்த அணி திட்டமிட்டுள்ளது. பிரபல விளையாட்டுத் தளமான கிரிக்பஸ்ஸின் அறிக்கையின்படி, ஏலத்தில் தங்களிடம் உள்ள நிதியின் அளவை அதிகரிப்பதற்காக நிர்வாகம் இந்தத் திசையில் நடவடிக்கைகளை எடுத்து வருகிறது.

ஐந்து முறை சாம்பியனான சென்னை சூப்பர் கிங்ஸ் அணி, கடைசியாக 2023-ல் பிளேஆஃப் சுற்றுக்குத் தகுதி பெற்றது. அதன்பிறகு, தொடர்ந்து மூன்று ஆண்டுகளாக அவர்களால் பிளேஆஃப் சுற்றுக்குத் தகுதி பெற முடியவில்லை. சிஎஸ்கே அணியின் வரலாற்றில், தொடர்ந்து மூன்று சீசன்களாக நாக்-அவுட் சுற்றுக்குத் தகுதி பெறாதது இதுவே முதல் முறையாகும். இந்தச் சூழலில், வரவிருக்கும் சீசனுக்காக ஒரு திடமான திட்டத்துடன் அணியை மீண்டும் கட்டமைக்க நிர்வாகம் முடிவு செய்துள்ளது.

கடந்த ஏலத்தில், சிஎஸ்கே நிர்வாகம் அறிமுக வீரர்களான இருவர் மீது பெருமளவில் முதலீடு செய்தது. அவர்கள் உத்தரப் பிரதேசத்தைச் சேர்ந்த இடது கை சுழற்பந்து ஆல்-ரவுண்டரான பிரசாந்த் வீரை ரூ. 14.2 கோடிக்கு வாங்கினர். மேலும், விக்கெட் கீப்பர்-பேட்ஸ்மேனான கார்த்திக் ஷர்மாவையும் அதே தொகைக்கு, அதாவது ரூ. 14.2 கோடிக்கு வாங்கினர். ரவீந்திர ஜடேஜாவிற்குப் பதிலாக பிரசாந்த் வீர் அணியில் சேர்க்கப்பட்டார்.

இருப்பினும், பிரசாந்த் வீரால் தனது முழுத் திறமைக்கு ஏற்ப செயல்பட முடியவில்லை. கடந்த சீசனில் 6 போட்டிகளில் 5 இன்னிங்ஸ்களில் பேட்டிங் செய்து 90 ரன்கள் மட்டுமே எடுத்தார். ராயல் சேலஞ்சர்ஸ் பெங்களூரு (RCB) அணிக்கு எதிராக அவர் எடுத்த 43 ரன்களே அவரது அதிகபட்ச ஸ்கோராக இருந்தது. மறுபுறம், அவர் 2 ஓவர்கள் மட்டுமே பந்துவீசி ஒரு விக்கெட்டைக் கூட எடுக்கவில்லை.

மற்றொரு பெரிய ஒப்பந்த வீரரான கார்த்திக் ஷர்மா, பிரஷாந்தை விட சற்று சிறப்பாக செயல்பட்டுள்ளார். ஒரு விக்கெட் கீப்பர்-பேட்ஸ்மேனாக, கார்த்திக் ஷர்மா 11 போட்டிகளில் 136.57 ஸ்டிரைக் ரேட்டில் 295 ரன்கள் எடுத்துள்ளார். இதில் 2 அரை சதங்களும் அடங்கும். இதனால், கார்த்திக் ஷர்மாவை விடுவிப்பதற்கான வாய்ப்பு குறைவாகவே தெரிகிறது. இருப்பினும், சிஎஸ்கே அணி நிச்சயமாக பிரஷாந்த் வீரை விடுவித்து, தனது நிதியை அதிகரிக்கவே பார்க்கிறது.

தற்போது, சென்னை சூப்பர் கிங்ஸ் அணியிடம் ரூ. 2.4 கோடி மட்டுமே உள்ளது. ஆண்டு ஊதிய உயர்வின் கீழ் கிடைக்கும் ரூ. 5 கோடியைச் சேர்த்தால், அது ரூ. 7.4 கோடியாக உயரும். இப்போது பிரசாந்த் வீர் விடுவிக்கப்பட்டால், சிஎஸ்கே-யின் மொத்தத் தொகை ரூ. 21.6 கோடியாக அதிகரிக்கும். டிசம்பர் 16-ஆம் தேதி கோவாவில் நடைபெறவிருக்கும் ஏலத்தில் நல்ல தரமான வீரர்களை வாங்குவதற்கு இது சிஎஸ்கே-க்கு மிகவும் பயனுள்ளதாக இருக்கும்.

மேலும், சிஎஸ்கே பிரசாந்த் வீரை முழுமையாகக் கைவிடத் திட்டமிடவில்லை என்றும் தகவல்கள் தெரிவிக்கின்றன. அந்த அணி ஏலத்தில் அவரை குறைந்த விலைக்கு மீண்டும் வாங்க முயற்சிக்கும் என எதிர்பார்க்கப்படுகிறது. பிசிசி நிர்ணயித்த காலக்கெடுவின்படி, அணிகள் தாங்கள் தக்கவைத்துக் கொண்ட மற்றும் விடுவித்த வீரர்களின் பட்டியலை நவம்பர் 15-க்குள் அறிவிக்க வேண்டும்.

கடந்த ஏலத்தில் சிஎஸ்கே தேர்ந்தெடுத்த வீரர்கள் மீது பல விமர்சனங்கள் எழுந்தன. குறிப்பாக, வேகப்பந்து வீச்சுத் துறை கொஞ்சமும் சோபிக்கவில்லை. பேட்டிங் துறையிலும்கூட, சஞ்சு சாம்சன் மற்றும் ருதுராஜ் கெய்க்வாட் போன்ற நட்சத்திர வீரர்கள் இருந்தபோதிலும், அவர்கள் எதிர்பார்த்த அதிரடி பலம் அவர்களுக்குக் கிடைக்கவில்லை.

இந்தச் சூழலில், வரவிருக்கும் சீசனுக்காக சிஎஸ்கே தனது பயிற்சி ஊழியர்களை முழுமையாக மாற்றியமைத்துள்ளது. ஜாகீர் கான் அணியின் புதிய தலைமைப் பயிற்சியாளராகவும், ஆல்பி மோர்கல் உதவிப் பயிற்சியாளராகவும், மோஹித் சர்மா பந்துவீச்சுப் பயிற்சியாளராகவும் பொறுப்பேற்றுள்ளனர். இந்தப் புதிய ஊழியர்களின் வழிகாட்டுதலின் கீழ், சென்னை சூப்பர் கிங்ஸ் ஐபிஎல் 2027-ல் ஒரு வலுவான மீள்வருகையைச் செய்ய உறுதியாக உள்ளது.