Asianet News Tamil

ஆரஞ்சு பழம் வாங்கிய 2 நாளிலேயே அழுகிடுதா? நீண்ட நாள் ஃப்ரெஷ்ஷாக வைக்க சூப்பர் டிப்ஸ்!

Rayar A — Tue, 03 Nov 2026 13:34:56 +0530

How to Store Oranges Fresh: ஆரஞ்சு பழம் வாங்கிய இரண்டு நாளிலேயே வாடிப் போகுதா இல்ல அழுகிடுதா? ஆரஞ்சு பழத்தை ரொம்ப நாள் ஃப்ரெஷ்ஷாக வைக்கும் டிப்ஸ் குறித்து இந்த செய்தியில் பார்க்கலாம்.

ஆரஞ்சு பழம் சுவைமிக்கதாகவும் சாறு நிறைந்ததாகவும் இருக்கும். ஆனால், அதனை நீண்ட நாட்களுக்குப் ஃப்ரெஷ்ஷாக வைத்திருப்பது சற்று கடினமான விஷயமாகும். சரியாகச் சேமித்து வைக்கவில்லை என்றால், பழம் விரைவில் வாடிவிடும், அதிக மென்மையாகிவிடும் அல்லது அதன் மேல் ஃபங்கஸ் உருவாகிவிடும். அதிக அளவில் ஆரஞ்சு பழங்களை வாங்குபவர்கள், அதனை எவ்வாறு சரியாகச் சேமிப்பது என்பதை விரிவாக பார்ப்போம்.

ஃப்ரிட்ஜ்ஜில் வைக்க வேண்டும்

ஆரஞ்சு பழத்தை நீண்ட நாட்களுக்குப் புதியதாக வைத்திருக்கக் ஃப்ரிட்ஜ்ஜில் வைப்பதே சிறந்த வழிமுறையாகும். குளிர்ந்த வெப்பநிலையில் பழத்தின் ஈரப்பதம் விரைவில் குறையாது. இதனால் பழம் நீண்ட நாட்களுக்கு நன்முறையில் இருக்கும். ஃப்ரிட்ஜ்ஜில் வைத்தால் சுமார் 2 முதல் 3 வாரங்கள் வரை ஆரஞ்சு பழம் புதியதாக இருக்கும்.

பழங்களை வாங்கியவுடனே கழுவிச் சேமிப்பதைத் தவிர்க்க வேண்டும். தோலின் மேல் தண்ணீர் தங்கிவிட்டால், ஈரப்பதம் அதிகமாகிப் பூஞ்சை காளான் வர வாய்ப்புகள் அதிகம்.

காற்றோட்டமான பையில் வைக்க வேண்டும்

காற்று புகாத பிளாஸ்டிக் பைகளில் ஆரஞ்சு பழத்தை அடைத்து வைக்கக் கூடாது. உள்ளேயே ஈரப்பதம் தங்கிப் பழம் விரைவில் அழுகிவிடும். அதற்குப் பதிலாக, வலைப்பை, துணிப்பை அல்லது சிறிய துளைகள் கொண்ட பைகளைப் பயன்படுத்தலாம்.

சுற்றியுள்ள பொருட்களின் வாசனையை ஆரஞ்சு பழம் எளிதில் ஈர்த்துக் கொள்ளும். எனவே வெங்காயம், பூண்டு போன்ற அடர்ந்த வாசனை கொண்ட பொருட்களின் அருகில் இதனை வைத்தால், பழத்தின் வாசனையும் சுவையும் மாறிவிடும்.

இரண்டு நாட்களுக்கு ஒருமுறை பழங்களைச் சரிபார்க்க வேண்டும். ஏதேனும் ஒரு பழம் அதிக மென்மையாகியிருந்தாலோ, அழுகியிருந்தாலோ அல்லது பூஞ்சை வந்திருந்தாலோ, அதனை உடனடியாகத் தனியாக எடுத்துவிட வேண்டும். இல்லையெனில் மற்ற பழங்களும் விரைவில் கெட்டுப்போய்விடும்.

பேப்பர் டவல் பயன்படுத்த வேண்டும்

ஆரஞ்சு பழத்தை ஒரு கிண்ணம் அல்லது பெட்டியில் சேமிப்பதாக இருந்தால், உள்ளே ஒரு காய்ந்த தாள் துடைப்பானை வைக்கலாம். இது மேலதிகமாக இருக்கும் ஈரப்பதத்தை உறிஞ்சிவிடும். இதனால் பூஞ்சை வருவது குறையும்.

ஃப்ரிட்ஜ்ஜில் வைக்க விருப்பமில்லை என்றால், வெயில் படாத ஒரு குளிர்ந்த இடத்தில் பழங்களை வைக்க வேண்டும். கேஸ் ஸ்டவ் மைக்ரோவேவ் ஓவன் போன்ற சூடான இடங்களின் அருகில் வைத்தால் பழம் விரைவில் வாடிவிடும்.

ஆரஞ்சு பழங்களை ஒன்றன் மேல் ஒன்றாக அதிக உயரத்தில் அடுக்கி வைத்தால், அடியில் இருக்கும் பழங்கள் நசுங்கிவிடும். இதனால் விரைவில் கெட்டுப்போய்விடும். முடிந்தவரை பழங்களை ஒரே அடுக்காகப் பரப்பி வைக்க வேண்டும்.

வாழைப்பழம் மற்றும் ஆப்பிளில் இருந்து வெளிவரும் எத்திலீன் வாயு, மற்ற பழங்களை விரைவில் பழுக்க வைத்துவிடும். எனவே, ஆரஞ்சு பழத்தை அவற்றோடு சேர்த்து வைத்தால் விரைவில் கெட்டுப்போய்விடும். அனைத்துப் பழங்களையும் ஒரே கூடையில் வைக்கும் பழக்கம் இருந்தால், ஆரஞ்சை மட்டும் தனியாக வைப்பது நல்லது.

அதிகளவில் பழங்கள் ஃப்ரீஸரில் வைக்கலாம்

அதிக அளவில் ஆரஞ்சு பழங்களை வாங்கி வந்து, அவற்றை விரைவில் சாப்பிட முடியவில்லை என்றால், ஃப்ரீஸரில் சேமிக்கலாம். இதற்குப் பழத்தின் தோல் மற்றும் விதைகளை நீக்கிவிட்டு, சுளைகளை மட்டும் தனியாகப் பிரித்துக் கொள்ள வேண்டும். பின்னர் காற்று புகாத பெட்டி அல்லது ஜிப்லாக் பையில் போட்டு உறைவிக்கச் செய்தால் நீண்ட நாட்களுக்குப் பயன்படுத்தலாம்.

Sweet Sev Recipe : இனிப்பு சேவு ரெசிபி..கடலை மாவில் சர்க்கரைப் பாகு சேர்த்து மொறுமொறுனு செய்யலாம்!

Vishnupriya — Wed, 04 Nov 2026 20:21:46 +0530

Sweet Sev Recipe : கடலை மாவு, அரிசி மாவு கொண்டு மொறுமொறுப்பான இனிப்பு சேவு செய்வது எப்படி? சரியான சர்க்கரைப் பாகு பதம், தேவையான பொருட்கள், எளிய செய்முறை மற்றும் சுவை மாறாமல் சேமிக்கும் குறிப்புகளை தெரிந்து கொண்டு வீட்டிலேயே செய்து அசத்துங்கள்.

தீபாவளி, பண்டிகை நாட்கள் அல்லது வீட்டில் ஏதாவது இனிப்பு சாப்பிட வேண்டும் என்று தோன்றும்போது, கடையில் வாங்கும் பலகாரங்களை விட வீட்டிலேயே செய்து சாப்பிடும் பலகாரங்களுக்கு தனி ருசி உண்டு. அந்த வகையில், மொறுமொறுப்பான சேவுடன் இனிப்பான சர்க்கரைப் பாகு கலந்து தயாரிக்கப்படும் இனிப்பு சேவு சிறியவர்கள் முதல் பெரியவர்கள் வரை அனைவரும் விரும்பி சாப்பிடக்கூடிய பாரம்பரியமான பலகாரம்.

கடலை மாவு, அரிசி மாவு கொண்டு எளிமையாக தயாரிக்கப்படும் இந்த இனிப்பு சேவு, சரியான பதத்தில் சர்க்கரைப் பாகு சேர்த்தால் கடைகளில் வாங்குவது போன்ற சுவையுடன் இருக்கும். தேநீர் நேரத்தில் சாப்பிடவும், பண்டிகை நாட்களில் உறவினர்களுக்கு பரிமாறவும் ஏற்ற இந்த இனிப்பு சேவை வீட்டிலேயே சுலபமாக செய்து அசத்தலாம்.

கடலை மாவு - 2 கப்
அரிசி மாவு - 1\2 கப்
உப்பு - 1\4 முதல் 1\2 தேக்கரண்டி
சூடான எண்ணெய் - 2 தேக்கரண்டி
தண்ணீர் - தேவையான அளவு
சர்க்கரை - 1 1\4 கப்
ஏலக்காய் தூள் - 1\4 தேக்கரண்டி
எண்ணெய் - பொரிக்க தேவையான அளவு

முதலில் ஒரு அகலமான பாத்திரத்தில் கடலை மாவு மற்றும் அரிசி மாவை சேர்த்து நன்றாக கலந்து கொள்ளவும். அதனுடன் சிறிதளவு உப்பு சேர்க்கவும்.
பின்னர் 2 தேக்கரண்டி சூடான எண்ணெயை மாவில் ஊற்றி நன்றாக கலந்து கொள்ளவும். இது சேவு மொறுமொறுப்பாக வர உதவும்.
இப்போது சிறிது சிறிதாக தண்ணீர் சேர்த்து, கெட்டியாகவும் மென்மையாகவும் இருக்கும் மாவாக பிசைந்து கொள்ளவும். மாவு மிகவும் தளர்வாகவோ அல்லது அதிகமாக கெட்டியாகவோ இருக்கக்கூடாது.

சேவு பிழிந்து பொரிப்பது

ஒரு கடாயில் எண்ணெய் ஊற்றி மிதமான தீயில் சூடாக்கவும்.
முறுக்கு அச்சில் சிறிய துளைகள் உள்ள அச்சை பொருத்தி, தயாரித்து வைத்துள்ள மாவை அதில் நிரப்பவும்.
எண்ணெய் சூடானதும் மாவை நேரடியாக எண்ணெயில் வட்டமாகப் பிழிந்து விடவும். சேவு பொன்னிறமாகவும் மொறுமொறுப்பாகவும் வரும் வரை பொரித்து எடுக்கவும்.

இதேபோல் மீதமுள்ள மாவையும் பிழிந்து பொரித்து, எண்ணெய் வடிந்த பிறகு ஒரு தட்டில் எடுத்து வைக்கவும்.

இதற்கு பதிலாக மாவை சப்பாத்தி போன்று வட்டமாக திரட்டி கத்தியால் நீளமாக வெட்டி எடுத்து எண்ணெயில் போட்டு பொரித்து எடுக்கலாம்.

சர்க்கரைப் பாகு தயாரிப்பது

ஒரு பாத்திரத்தில் சர்க்கரையை சேர்த்து, அது மூழ்கும் அளவிற்கு தண்ணீர் ஊற்றவும். மிதமான தீயில் வைத்து சர்க்கரை கரையும் வரை கிளறவும். சர்க்கரை கரைந்ததும் பாகு சிறிது கெட்டியாகும் வரை கொதிக்க விடவும்.

பாகு கம்பி பதம் அல்லது விரல்களுக்கு இடையில் தொட்டுப் பார்த்தால் லேசாக ஒட்டும் பதம் வந்தால் போதுமானது. இப்போது ஏலக்காய் தூள் சேர்த்து கலந்து கொள்ளவும்.

இனிப்பு சேவு தயார் செய்வது

பொரித்து வைத்துள்ள சேவுகளை சிறிய துண்டுகளாக உடைத்து சர்க்கரைப் பாகில் சேர்க்கவும். சேவு முழுவதும் பாகு படும்படி மெதுவாக கலந்து விடவும். நன்றாகக் கிளறினால் சர்க்கரை சேவுடன் சேர்ந்து மொறுமொறுப்பான இனிப்பு சேவு தயாராகிவிடும்.

இப்போது அடுப்பை அணைத்து சில நிமிடங்கள் அப்படியே வைக்கவும். பாகு சேவின் மீது படிந்து, ஆறியதும் இனிப்பு சேவு மொறுமொறுப்பாக மாறும்.

மாவில் சூடான எண்ணெய் சேர்ப்பது சேவு மொறுமொறுப்பாக வர உதவும்.
மாவை மிகவும் தளர்வாக பிசைய வேண்டாம். அப்படி செய்தால் சேவு எண்ணெயை அதிகமாக உறிஞ்சும்.
எண்ணெய் அதிகமாக சூடாக இருந்தால் சேவு வெளிப்புறம் மட்டும் சிவந்து உள்ளே வேகாமல் போகலாம்.
சர்க்கரைப் பாகு மிகவும் கெட்டியாகிவிட்டால் சேவு மீது படிவது கடினமாகும்.
பாகு மிகவும் தண்ணீராக இருந்தால் சேவு மொறுமொறுப்பு குறையலாம்.
சேவு பொரித்த பிறகு எண்ணெய் நன்றாக வடிந்திருக்க வேண்டும்.
பாகு சேர்த்த பிறகு சேவை அதிகமாக கிளறாமல் மெதுவாக கலந்து கொள்ளவும்.

முடிவாக கடலை மாவு, அரிசி மாவு மற்றும் சர்க்கரைப் பாகு கொண்டு எளிமையாக தயாரிக்கப்படும் இனிப்பு சேவு, வீட்டிலேயே செய்யக்கூடிய சுவையான பாரம்பரிய பலகாரம். மொறுமொறுப்பான சேவுடன் இனிப்பான சர்க்கரைப் பாகு கலந்து கிடைக்கும் இந்த ருசியை ஒருமுறை செய்து பார்த்தால், மீண்டும் மீண்டும் செய்து சாப்பிடத் தோன்றும்

Kadamba Chutney : இட்லி, தோசைக்கு செம காம்பினேஷன்... டேஸ்டியான செட்டிநாடு கதம்ப சட்னி செஞ்சு பாருங்க!

Ganesh A — Tue, 03 Nov 2026 17:08:22 +0530

Kadamba Chutney Recipe : இட்லி, தோசைக்கு தேங்காய் சட்னி, தக்காளி சட்னி என வழக்கமான சட்னிகளை சாப்பிட்டு சலித்துவிட்டதா, நீங்க கதம்ப சட்னியை டிரை பண்ணி பாருங்க.

காலையில் இட்லி, தோசை சாப்பிடும்போது சட்னி, சாம்பார் அல்லது இட்லி பொடியைத் தொட்டுக்கொள்வது பலருடைய வழக்கமாக இருக்கிறது. குறிப்பாக, அவசரமான காலை நேரங்களில் எளிதாகத் தயாரிக்கக்கூடிய உணவுகளையே பெரும்பாலானோர் விரும்புகின்றனர். ஆனால், வழக்கமாகச் சாப்பிடும் உணவுகளுடன் சத்துக்கள் நிறைந்த காய்கறிகள், கீரைகள் மற்றும் மூலிகை இலைகளையும் சேர்த்துக்கொண்டால் உடலுக்குத் தேவையான ஊட்டச்சத்துக்களைப் பெற உதவும்.

அந்த வகையில், வீட்டில் எளிதாகக் கிடைக்கும் கொத்தமல்லி, புதினா, கறிவேப்பிலை ஆகிய மூன்று இலைகளைப் பயன்படுத்தி சுவையான கதம்ப சட்னி தயாரிக்கலாம். இந்த இலைகளில் பல்வேறு வைட்டமின்கள், தாதுக்கள் மற்றும் நார்ச்சத்துக்கள் உள்ளன. குறிப்பாக, கறிவேப்பிலை, புதினா, கொத்தமல்லி போன்றவற்றை அன்றாட உணவில் சேர்த்துக்கொள்வது உணவின் சுவையையும் ஊட்டச்சத்து மதிப்பையும் அதிகரிக்க உதவும்.

மேலும், இந்த இலைகளுடன் பருப்பு வகைகள், தக்காளி, வெங்காயம் மற்றும் தேங்காய் சேர்த்து தயாரிக்கப்படும் கதம்ப சட்னி, இட்லி, தோசைக்கு நல்ல சுவையான துணை உணவாக அமையும். வெறும் சில நிமிடங்களில் வீட்டிலேயே தயாரிக்கக்கூடிய இந்த சட்னியை எப்படி செய்வது என்று பார்க்கலாம்.

மூன்று வகையான இலைகள் சேர்த்து தயாரிக்கப்படும் சுவையான சட்னி

- கொத்தமல்லி – ஒரு கைப்பிடி

- புதினா – ஒரு கைப்பிடி

- கறிவேப்பிலை – ஒரு கைப்பிடி

- உளுத்தம் பருப்பு – 1 தேக்கரண்டி

- கடலைப் பருப்பு – 1 தேக்கரண்டி

- சீரகம் – ½ தேக்கரண்டி

- வரமிளகாய் – 3 முதல் 4

- இஞ்சி – சிறிய துண்டு

- பூண்டு – 3 முதல் 4 பல்

- தக்காளி – 1

- சின்ன வெங்காயம் – 5 முதல் 6

- தேங்காய் துருவல் – 2 தேக்கரண்டி

- புளி – சிறிய துண்டு

- கடுகு – ½ தேக்கரண்டி

- எண்ணெய் – தேவையான அளவு

- உப்பு – தேவையான அளவு

முதலில் கொத்தமல்லி, புதினா, கறிவேப்பிலை ஆகியவற்றைத் தனித்தனியாக எடுத்துக்கொண்டு தண்ணீரில் நன்றாக அலச வேண்டும். இலைகளில் இருக்கும் தூசி மற்றும் அழுக்குகளை நீக்கிய பிறகு, அவற்றை பொடியாக நறுக்கி வைத்துக்கொள்ளவும். ஒரு கடாயில் சிறிதளவு எண்ணெய் ஊற்றி சூடாக்கவும். அதில் உளுத்தம் பருப்பு, கடலைப் பருப்பு, சீரகம் மற்றும் வரமிளகாய் சேர்த்து மிதமான தீயில் வறுக்க வேண்டும். பருப்புகள் பொன்னிறமாக மாறும் வரை வறுத்தால் சட்னிக்கு நல்ல மணமும் சுவையும் கிடைக்கும்.

பருப்புகள் வறுபட்டதும், அதனுடன் இஞ்சி, பூண்டு மற்றும் சின்ன வெங்காயத்தைச் சேர்த்து வதக்கவும். வெங்காயம் ஓரளவு மென்மையானதும் தக்காளியைச் சேர்த்து நன்றாக வதக்க வேண்டும். தக்காளி நன்றாக மசிந்து, வெங்காயம் வதங்கியதும் அடுத்த கட்டத்திற்குச் செல்லலாம். இப்போது சுத்தம் செய்து நறுக்கி வைத்துள்ள கொத்தமல்லி, புதினா மற்றும் கறிவேப்பிலையை கடாயில் சேர்க்க வேண்டும். அதனுடன் தேங்காய் துருவல், சிறிய துண்டு புளி மற்றும் தேவையான அளவு உப்பு சேர்த்து நன்றாகக் கிளறவும்.

இலைகள் மென்மையாக வதங்கும் வரை மிதமான தீயில் வைத்திருக்க வேண்டும். அதிக நேரம் வதக்காமல், இலைகள் நன்றாகச் சுருங்கியதும் அடுப்பை அணைக்கலாம். வதக்கிய கலவை முழுமையாக ஆறிய பிறகு, அதை மிக்ஸி ஜாரில் போட்டு தேவையான அளவு தண்ணீர் சேர்த்து அரைக்கவும். சட்னியை மிகவும் நீர்த்துப் போகாமல், கெட்டியான பதத்தில் அரைத்தால் இட்லி, தோசைக்கு தொட்டுக்கொள்ள ஏற்றதாக இருக்கும். இறுதியாக ஒரு சிறிய தாளிப்பு கரண்டியில் எண்ணெய் ஊற்றி கடுகு சேர்த்து தாளிக்கவும். இந்தத் தாளிப்பை அரைத்த சட்னியில் சேர்த்துக் கிளறினால் சுவையான கதம்ப சட்னி தயார்.

கீரைகள் மற்றும் மூலிகை இலைகளில் இரும்புச்சத்து இருப்பதால், அவற்றை உணவில் சேர்த்துக்கொள்வது நல்லது. இருப்பினும், இந்த கதம்ப சட்னியை மட்டும் சாப்பிடுவதால் இரும்புச்சத்து குறைபாடு அல்லது ரத்தசோகை முழுமையாக சரியாகிவிடும் என்று கூற முடியாது. உடலுக்குத் தேவையான இரும்புச்சத்தைப் பெற கீரைகள், பருப்பு வகைகள், பயறு வகைகள் மற்றும் இரும்புச்சத்து நிறைந்த பிற உணவுகளையும் சேர்த்துக்கொள்ள வேண்டும்.

மேலும், தாவர உணவுகளில் உள்ள இரும்புச்சத்தை உடல் உறிஞ்சுவதற்கு வைட்டமின் சி உதவுகிறது. எனவே, உணவுடன் எலுமிச்சை, நெல்லிக்காய் அல்லது வைட்டமின் சி நிறைந்த காய்கறிகளைச் சேர்த்துக்கொள்வது பயனுள்ளதாக இருக்கும். ரத்தசோகை இருப்பவர்கள் உணவுப் பழக்கத்தில் மாற்றம் செய்வதுடன், மருத்துவரின் ஆலோசனையையும் பெற வேண்டும்.

Fishermen Pizza : மீனவர்களின் பீட்சா... வடசென்னையின் ஸ்பெஷல் அட்லாப்பம்! அதே டேஸ்டில் நம்ம வீட்டுல செய்யலாம்!

Arun Mozhi Varman — Wed, 04 Nov 2026 07:00:39 +0530

Fishermen Pizza : வடசென்னையின் காசிமேடு பகுதியில் பிரபலமான அட்லாப்பத்தை வீட்டிலேயே செய்யலாம். அரிசி மாவு, ரவை, தேங்காய், முந்திரி, முட்டை உள்ளிட்ட பொருட்களை வைத்து இந்த வித்தியாசமான உணவைத் தயாரிக்கும் முறை இதோ!

பீட்சா போல முக்கோணத் துண்டுகளாக வெட்டி சாப்பிடக்கூடிய வடசென்னையின் பாரம்பரிய உணவுதான் அட்லாப்பம். காசிமேடு பகுதியுடன் தொடர்புடைய இந்த உணவு, அரிசி மாவு, ரவை, தேங்காய், முந்திரி, உலர் திராட்சை உள்ளிட்ட பொருட்களைக் கொண்டு தயாரிக்கப்படுகிறது. முட்டை மற்றும் நெய் சேர்ப்பதால் இதற்கு தனித்துவமான சுவையும் மணமும் கிடைக்கின்றன. வெளிப்புறம் நன்றாக வெந்தும் உட்புறம் மென்மையாகவும் இருக்கும் இந்த உணவை வீட்டிலேயே கடாயைப் பயன்படுத்திச் செய்யலாம். இதற்குப் பெரிய அளவில் சமையல் அனுபவமும் தேவையில்லை.

இதையும் படிங்க : Bank Holidays : நவம்பர் மாதம் வங்கி விடுமுறை நாட்கள் இதோ! மாநில வாரியான விடுமுறை பட்டியல்!

அட்லாப்பம் செய்ய ஒரு கப் அரிசி மாவு, அரை கப் ரவை, அரை கப் சர்க்கரை, இரண்டு முட்டைகள், அரை கப் துருவிய தேங்காய், இரண்டு மேசைக்கரண்டி கடலைப்பருப்பு, முந்திரி மற்றும் உலர் திராட்சை தலா இரண்டு மேசைக்கரண்டி எடுத்துக்கொள்ளுங்கள். மேலும், ஒரு சிட்டிகை ஏலக்காய்த் தூள், சோம்புத்தூள், ஜாதிக்காய்த் தூள், பட்டைத்தூள், ஒரு சிட்டிகை பேக்கிங் சோடா, தேவையான அளவு உப்பு, இரண்டு முதல் நான்கு மேசைக்கரண்டி நெய் ஆகியவை தேவை. மாவைக் கரைப்பதற்குத் தேவையான அளவு தண்ணீரையும் தயாராக வைத்துக்கொள்ளுங்கள்.

இதையும் படிங்க : Kitchen Tips : சமையலறையில் இடமே இல்லையா? இடத்தை மிச்சப்படுத்தும் 7 எளிய வழிகள்!

முதலில் ரவையை ஒரு கடாயில் லேசாக வறுத்து எடுத்துக்கொள்ளுங்கள். ஒரு அகலமான பாத்திரத்தில் அரிசி மாவு, வறுத்த ரவை, சர்க்கரை, உப்பு, ஏலக்காய்த் தூள், சோம்புத்தூள், ஜாதிக்காய்த் தூள், பட்டைத்தூள் ஆகியவற்றைச் சேர்த்துக் கலக்கவும். பின்னர் தண்ணீரைச் சிறிது சிறிதாக ஊற்றி கட்டிகள் இல்லாமல் கரைத்துக்கொள்ளுங்கள். மற்றொரு கடாயில் நெய் சேர்த்து கடலைப்பருப்பு, முந்திரி, உலர் திராட்சை, தேங்காயை லேசாக வறுக்கவும். இவற்றை மாவில் சேர்த்து, முட்டைகளையும் பேக்கிங் சோடாவையும் கலந்து நன்றாகக் கிளறுங்கள். இப்போது அட்லாப்பம் செய்வதற்கான மாவு தயார்.

இதையும் படிங்க : Old Photos : உங்கள் வீட்டுப் பழைய போட்டோக்களில் மறைந்திருக்கும் 7 சுவாரஸ்யமான விஷயங்கள்!

அடிக்கனமான கடாயில் அல்லது பேனில் சிறிதளவு நெய் தடவுங்கள். தயாரித்த மாவை அதில் ஊற்றி, கடாயை மூடி மிகக் குறைந்த தீயில் வேகவிடுங்கள். அடிப்பகுதி கருகாமல் இருக்க அவ்வப்போது கவனிக்க வேண்டும். மாவின் அளவு மற்றும் கடாயின் தன்மையைப் பொறுத்து சுமார் 20 முதல் 25 நிமிடங்கள் வரை ஆகலாம். நடுப்பகுதியில் கத்தி அல்லது குச்சியால் குத்திப் பார்க்கும்போது மாவு ஒட்டாமல் வந்தால் வெந்துவிட்டது என்று தெரிந்துகொள்ளலாம். தேவைப்பட்டால் இன்னும் சில நிமிடங்கள் வேகவிடுங்கள்.

இதையும் படிங்க : Bamboo Petrol : இனி பெட்ரோல்-டீசல் வேண்டாம்... வரப்போகுது மூங்கில் பெட்ரோல்! ஒரு லிட்டர் 65 ரூபாய்தானா?

அட்லாப்பம் முழுமையாக வெந்ததும் அடுப்பை அணைத்து, சிறிது நேரம் ஆறவிடுங்கள். பின்னர் கவனமாக வெளியே எடுத்து பீட்சா போல முக்கோணத் துண்டுகளாக வெட்டிப் பரிமாறலாம். தேங்காய், முந்திரி, உலர் திராட்சை ஆகியவற்றின் சுவையுடன் ஏலக்காய் மற்றும் நெய்யின் மணமும் சேர்ந்து இந்த உணவுக்கு வித்தியாசமான சுவையைத் தரும். மாலை நேரத்தில் தேநீருடன் சாப்பிடவும், வீட்டில் அனைவருடனும் பகிர்ந்துகொள்ளவும் ஏற்றது. முதல் முறை செய்பவர்கள் குறைந்த தீயில் வேகவைத்து, நடுப்பகுதி முழுமையாக வெந்துள்ளதா என்பதை உறுதிப்படுத்திக்கொள்ளுங்கள்.

இதையும் படிங்க : 2027 Holidays : 2027-ல் எத்தனை அரசு விடுமுறைகள்? லாங் வீக்கெண்ட் எத்தனை? பொங்கல் முதல் தீபாவளி வரை முழு விவரம்!

Cooker Adhirasam : குக்கர்ல 3 விசில் விட்டா போதும்... டேஸ்டான தீபாவளி அதிரசம் வீட்டிலேயே ஈஸியா செய்யலாம்

Ganesh A — Wed, 04 Nov 2026 16:55:13 +0530

Diwali Sweet Adhirasam Recipe : தீபாவளிக்கு ஏராளமான ஸ்வீட்கள் வீட்டிலேயே செய்வார்கள், அதில் அனைவருக்கும் பிடித்த ஸ்வீட் என்றால் அது அதிரசம் தான். அது ஈஸியா வீட்டிலேயே செய்வது எப்படி என்பதை பார்க்கலாம்.

தீபாவளி பண்டிகை என்றாலே புத்தாடைகள், பட்டாசுகள் மட்டுமின்றி வீட்டில் தயாரிக்கப்படும் பலகாரங்களுக்கும் தனி இடம் உண்டு. குறிப்பாக அதிரசம், முறுக்கு, லட்டு, மைசூர் பாக் போன்ற பாரம்பரிய இனிப்பு மற்றும் கார வகைகளைச் செய்து குடும்பத்தினருடன் பகிர்ந்து சாப்பிடுவது பலருக்கும் மகிழ்ச்சியான விஷயமாக இருக்கும். அந்த வகையில், தீபாவளி பலகாரங்களில் முக்கியமான இடத்தைப் பிடிப்பது அதிரசம்.

ஆனால், அதிரசம் செய்வதில் பலருக்கும் இருக்கும் மிகப்பெரிய சந்தேகம் வெல்லப்பாகு பதம்தான். பாகு சரியான பதத்தில் வந்தால்தான் அதிரசம் மென்மையாகவும் சுவையாகவும் கிடைக்கும். பாகு பதம் தவறினால் அதிரசம் கல்லைப் போலக் கடினமாகிவிடும் அல்லது எண்ணெயில் பிரிந்து போகும். இதனால் பலரும் வீட்டில் அதிரசம் செய்வதற்குத் தயங்குவார்கள்.

ஆனால், இனி அந்தக் கவலை வேண்டாம். குக்கரில் வெறும் மூன்று விசில் விட்டாலே அதிரசத்திற்குத் தேவையான வெல்லப்பாகை எளிமையாகத் தயாரித்துவிடலாம். பெரிய சிரமம் இல்லாமல், சரியான முறையைப் பின்பற்றினால் கடைகளில் கிடைப்பதைப் போலவே மென்மையான அதிரசத்தை வீட்டிலேயே செய்ய முடியும். அந்த ஈஸியான செய்முறையைப் பற்றி இங்கே பார்க்கலாம்.

அதிரசம் செய்யத் தேவையான பொருட்கள்!

- பச்சரிசி – 1 டம்ளர்

- வெல்லம் – முக்கால் டம்ளர்

- தண்ணீர் – தேவையான அளவு

- ஏலக்காய் – 4 முதல் 5

- சுக்கு – சிறிய துண்டு (விருப்பத்திற்கு)

- பொரிப்பதற்குத் தேவையான எண்ணெய்

- நெய் – சிறிதளவு

முதலில், அதிரசம் செய்வதற்கு இரண்டு மணி நேரத்திற்கு முன்பாக ஒரு டம்ளர் அளவு பச்சரிசியை எடுத்துத் தண்ணீரில் நன்றாகக் கழுவி ஊற வைக்க வேண்டும். ரேஷன் அரிசியைப் பயன்படுத்துபவர்கள் அதில் இருக்கும் தூசிகளை நீக்கி நன்றாகச் சுத்தம் செய்த பிறகு ஊற வைக்கலாம்.

ஊற வைத்த அரிசியை ஒரு வடிகட்டியில் மாற்றி, அதிலுள்ள தண்ணீர் முழுவதும் வெளியேறும் வரை சுமார் 10 முதல் 15 நிமிடங்கள் வைத்திருக்க வேண்டும். பின்னர், அரிசியை மிக்ஸி ஜாரில் போட்டு அதனுடன் 4 அல்லது 5 ஏலக்காய்களைச் சேர்த்து நைசாக அரைத்துக் கொள்ளலாம். விருப்பமுள்ளவர்கள் சிறிதளவு சுக்கையும் சேர்த்துக் கொள்ளலாம். அரைத்த மாவை நன்றாகச் சலித்து எடுத்துக் கொள்ள வேண்டும். இவ்வாறு செய்வதால் மாவில் இருக்கும் பெரிய துகள்கள் நீங்கி, அதிரசம் மென்மையாகக் கிடைக்கும்.

அடுத்ததாக, அடுப்பில் ஒரு குக்கரை வைத்து, அதில் முக்கால் டம்ளர் அளவு வெல்லத்தைச் சேர்க்க வேண்டும். இதனுடன் கால் டம்ளருக்கும் சற்று குறைவான தண்ணீர் ஊற்றி லேசாகக் கலக்க வேண்டும். வெல்லம் முழுவதுமாகக் கரைய வேண்டும் என்ற அவசியம் இல்லை. வெல்லம் லேசாகக் கரையும் அளவுக்குக் கலந்துவிட்டு குக்கரை மூடிவிடலாம். பின்னர் மிதமான தீயில் வைத்து மூன்று விசில் வரும் வரை காத்திருக்க வேண்டும்.

மூன்று விசில் வந்ததும் அடுப்பை அணைத்துவிட்டு, குக்கரில் உள்ள பிரஷர் தானாகவே வெளியேற அனுமதிக்க வேண்டும். பிரஷரைத் தனியாக வெளியேற்றக் கூடாது. அது முழுமையாகக் குறைந்த பிறகு குக்கரைத் திறந்தால் அதிரசத்திற்குத் தேவையான வெல்லப்பாகு தயாராக இருக்கும். வெல்லத்தில் மண் அல்லது தூசு கலந்திருந்தால், தயாரான பாகை வடிகட்டி வேறு பாத்திரத்தில் மாற்றிக் கொள்ளலாம்.

இப்போது ஏற்கனவே தயாரித்து வைத்திருக்கும் அரிசி மாவை வெல்லப்பாகில் கொஞ்சம் கொஞ்சமாகச் சேர்க்க வேண்டும். ஒரே நேரத்தில் மாவு முழுவதையும் கொட்டிவிடாமல், சிறிது சிறிதாகச் சேர்த்து மரக்கரண்டியால் நன்றாகக் கிளற வேண்டும். மாவிலும் பாகிலும் கட்டிகள் இல்லாமல் ஒன்றோடு ஒன்று கலக்கும்படி பார்த்துக் கொள்ள வேண்டும். இந்த முறையில் மாவு முழுவதையும் சேர்த்து நன்றாகக் கலந்து கொள்ளலாம்.

மாவை உயர்த்தி ஊற்றிப் பார்க்கும்போது தொடர்ச்சியாக விழும் அளவுக்கு இருக்க வேண்டும். மிகவும் கெட்டியாகவோ அல்லது அதிகத் தண்ணீராகவோ இருக்கக் கூடாது. மாவின் அளவுக்கு ஏற்ப வெல்லப்பாகின் அளவைச் சரிசெய்து கொள்ள வேண்டும். பின்னர் தயாரான அதிரச மாவை மற்றொரு பாத்திரத்தில் மாற்றி மூடி வைக்க வேண்டும். குறைந்தது இரண்டு நாட்கள் அப்படியே ஊற விட வேண்டும். இந்த இடைவெளியில் மாவு வெல்லப்பாகை நன்றாக உறிஞ்சி, இறுகிய பதத்திற்கு வந்துவிடும்.

இரண்டு நாட்களுக்குப் பிறகு மாவைத் திறந்து பார்த்தால், முன்பைவிட இறுக்கமான பதத்தில் இருக்கும். இப்போது மாவை கைகளால் லேசாகப் பிசைந்து ஒன்றாகச் சேர்த்துக் கொள்ள வேண்டும். பின்னர், தேவையான அளவு மாவை எடுத்து உருண்டையாக உருட்டிக் கொள்ளலாம். பொதுவாக ஒரு எலுமிச்சம்பழ அளவுக்கு மாவு எடுத்தால் சரியான அளவில் அதிரசம் கிடைக்கும்.

ஒரு பட்டர் ஷீட், வாழை இலை அல்லது பாலித்தீன் கவரில் சிறிதளவு நெய் அல்லது எண்ணெய் தடவிக் கொள்ள வேண்டும். அதேபோல் கைகளிலும் லேசாக எண்ணெய் அல்லது நெய் தடவிக் கொண்டு மாவை வட்டமாகத் தட்ட வேண்டும். அதிரசத்தின் நடுப்பகுதியில் சிறிய துளை போடலாம். விருப்பமில்லாதவர்கள் துளை போடாமலும் செய்யலாம். மாவு எல்லா இடங்களிலும் ஒரே அளவிலான தடிமனுடன் இருக்கும்படி பார்த்துக் கொள்வது அவசியம்.

அடுப்பில் ஒரு கடாயை வைத்து தேவையான அளவு எண்ணெய் ஊற்றி நன்றாகச் சூடாக்க வேண்டும். எண்ணெய் சூடானதும் அடுப்பை மிகவும் குறைந்த தீயில் மாற்றிவிட்டு, தட்டி வைத்திருக்கும் அதிரசத்தை மெதுவாக எண்ணெயில் போட வேண்டும். வெல்லம் சேர்த்திருப்பதால் அதிகமான தீயில் பொரித்தால் அதிரசம் விரைவாகக் கருகிவிடும். ஆனால் உள்ளே சரியாக வேகாமல் போக வாய்ப்புள்ளது. எனவே, குறைந்த தீயிலேயே பொறுமையாகப் பொரிக்க வேண்டும்.

அதிரசம் எண்ணெயில் போட்டதும் இரண்டு பக்கங்களிலும் நன்றாக உப்பி வரும். இருபுறமும் பொன்னிறமாக மாறியதும் வெளியே எடுத்து எண்ணெயை வடித்துக் கொள்ளலாம். அவ்வளவுதான்! சாஃப்டான, சுவையான அதிரசம் தயாராகிவிடும். இந்தத் தீபாவளிக்கு நீங்களும் வீட்டிலேயே இந்த முறையைப் பின்பற்றி அதிரசம் செய்து குடும்பத்தினருக்கு வழங்கிப் பாருங்கள்!

Thakkali Thanni Chutney : கோவை ஸ்பெஷல் தக்காளி தண்ணி சட்னி.. இட்லி, தோசைக்கு இப்படிச் செய்து பாருங்க!

Vishnupriya — Wed, 04 Nov 2026 16:47:37 +0530

Thakkali Thanni Chutney : கோயம்புத்தூர் ஸ்பெஷல் தக்காளி தண்ணி சட்னியை வீட்டிலேயே ஹோட்டல் சுவையில் செய்வது எப்படி? நீர்த்த பதத்தில் தயாரிக்கும் இந்த சுவையான சட்னியின் தேவையான பொருட்கள், எளிய செய்முறை மற்றும் ரகசிய குறிப்புகள் இதோ.

கோவை ஹோட்டல்களில் இட்லி, தோசையுடன் பரிமாறப்படும் அந்தச் சூடான, காரசாரமான தக்காளி தண்ணி சட்னியின் சுவையை வீட்டிலேயே கொண்டு வரலாம்.

வழக்கமான கெட்டியான சட்னியை விட, தக்காளியின் புளிப்பும், பூண்டு, வெங்காயத்தின் மணமும், மசாலாவின் காரமும் கலந்து நீர்த்த பதத்தில் இருக்கும் இந்தக் கொங்கு ஸ்பெஷல் சட்னி, இட்லி தோசைக்கு மட்டுமல்லாமல் ஊத்தப்பம், பணியாரம் ஆகியவற்றுக்கும் அட்டகாசமாக இருக்கும்.

குறிப்பாக, தக்காளியை வேகவைத்த தண்ணீரையே சட்னியில் சேர்ப்பதால் அதன் இயற்கையான சுவை வீணாகாமல், ஹோட்டல் பாணியில் ருசியான தக்காளி தண்ணி சட்னி கிடைக்கும். வாங்க, இதை எளிமையாக வீட்டிலேயே செய்து பார்ப்போம்.

நன்கு பழுத்த தக்காளி - 4
பெரிய வெங்காயம் - 2
பூண்டு - 6 பல்
பச்சை மிளகாய் - 2
வரமிளகாய் - 2
கடுகு - 1\2 தேக்கரண்டி
உளுத்தம் பருப்பு - 1 தேக்கரண்டி
சீரகம்- 1\2 தேக்கரண்டி
மஞ்சள் தூள்- 1\4 தேக்கரண்டி
மிளகாய்த்தூள் - 1\2 தேக்கரண்டி
மல்லித்தூள் - 1 தேக்கரண்டி
பெருங்காயத்தூள்- 1 சிட்டிகை
கறிவேப்பிலை - 1 கொத்து
கொத்தமல்லி - இலை சிறிதளவு
எண்ணெய் - 2-3 தேக்கரண்டி
உப்பு - தேவையான அளவு
தண்ணீர் - தேவையான அளவு

தக்காளியை வேகவைத்து அரைத்தல்

முதலில் தக்காளியை நன்றாகக் கழுவி, அதன் மேல் பகுதியில் லேசாகக் கீறிக் கொள்ளவும்.
ஒரு பாத்திரத்தில் தக்காளி மூழ்கும் அளவுக்குத் தண்ணீர் ஊற்றி கொதிக்க வைக்கவும்.
தண்ணீர் கொதித்ததும் தக்காளியைச் சேர்த்து 5–8 நிமிடங்கள் வேகவைக்கவும்.
தக்காளியின் தோல் வெடித்து, உள்ளே நன்றாக வெந்ததும் அடுப்பை அணைக்கவும்.
தக்காளியைத் தனியாக எடுத்து ஆறவிட்டு, அதன் தோலை நீக்கவும்.
பின்னர் மிக்ஸியில் போட்டு மென்மையான விழுதாக அரைத்துக் கொள்ளவும்.
தக்காளியை வேகவைத்த தண்ணீரைத் தனியாக எடுத்து வைக்கவும். இதுதான் சட்னிக்கு நல்ல சுவையைக் கொடுக்கும்.

தாளித்து வெங்காயம், பூண்டு வதக்குதல்

ஒரு வாணலியில் எண்ணெய் ஊற்றி சூடாக்கவும்.
கடுகு சேர்த்து வெடித்ததும் உளுத்தம் பருப்பு, சீரகம், வரமிளகாய் சேர்த்துத் தாளிக்கவும்.
கறிவேப்பிலை மற்றும் பொடியாக நறுக்கிய பூண்டு சேர்த்து லேசாக வதக்கவும்.
இப்போது பொடியாக நறுக்கிய வெங்காயம் மற்றும் கீறிய பச்சை மிளகாய் சேர்க்கவும்.
வெங்காயம் மென்மையாகி, லேசாகப் பொன்னிறமாகும் வரை நன்றாக வதக்கவும்.
குறிப்பு: வெங்காயத்தை நன்றாக வதக்கினால் சட்னிக்கு இனிப்பான சுவையும் நல்ல மணமும் கிடைக்கும்.

மசாலா சேர்த்துக் கொதிக்கவைத்தல்

வெங்காயம் வதங்கியதும் மஞ்சள் தூள், மிளகாய்த்தூள், மல்லித்தூள், பெருங்காயத்தூள் மற்றும் தேவையான அளவு உப்பு சேர்க்கவும்.
மசாலாவின் பச்சை வாசனை போகும் வரை குறைந்த தீயில் கிளறவும்.
இப்போது தக்காளியை வேகவைத்த தண்ணீரில் சிறிதளவு ஊற்றி மசாலாவுடன் நன்றாகக் கலக்கவும்.
மசாலா நன்கு கொதித்து, அதன் சுவை தண்ணீரில் இறங்கும் வரை 2-3 நிமிடங்கள் வேகவிடவும்.

தக்காளி விழுது சேர்த்து சட்னி தயாரித்தல்

அரைத்து வைத்துள்ள தக்காளி விழுதை வாணலியில் சேர்த்து நன்றாகக் கலக்கவும்.
மீதமுள்ள தக்காளி வேகவைத்த தண்ணீரையும் தேவையான அளவு சேர்க்கவும்.
சட்னி கெட்டியாக இல்லாமல், தண்ணீர் பதத்தில் இருக்குமாறு பார்த்துக் கொள்ளவும்.
மிதமான தீயில் 5-7 நிமிடங்கள் நன்றாகக் கொதிக்க விடவும்.
சட்னியின் மேல் லேசாக எண்ணெய் பிரிந்து வரும்போது, நறுக்கிய கொத்தமல்லி இலைகளைத் தூவி அடுப்பை அணைக்கவும். அவ்ளோதான் சுவையான தக்காளி தண்ணி சட்னி தயார்.

தக்காளி தேர்வு: நன்கு பழுத்த, சாறு நிறைந்த தக்காளியைப் பயன்படுத்தினால் சட்னி நல்ல நிறத்திலும் சுவையிலும் இருக்கும்.

தண்ணீர் பதம்: இது கெட்டியான சட்னி அல்ல. இட்லியில் ஊற்றிச் சாப்பிடும் அளவுக்கு நீர்த்த பதத்தில் இருக்க வேண்டும்.

பூண்டு மணம்: பூண்டைச் சிறிது அதிகமாகச் சேர்த்தால் கொங்கு பாணி சுவை இன்னும் சிறப்பாக இருக்கும்.

காரம்: பச்சை மிளகாய், வரமிளகாய், மிளகாய்த்தூள் ஆகியவற்றின் அளவை உங்கள் விருப்பத்திற்கேற்ப மாற்றிக்கொள்ளலாம்.

சுவை அதிகரிக்க: தக்காளியை வேகவைத்த தண்ணீரை முழுமையாகப் பயன்படுத்துவது சட்னியின் சுவையை அதிகரிக்கும்.

கடைசி கொதி: கொத்தமல்லி தூவிய பிறகு ஒரு நிமிடம் கொதிக்கவிட்டு இறக்கினால் அதன் மணம் சட்னியில் நன்றாகக் கலக்கும்.

இந்த கோயம்புத்தூர் ஸ்பெஷல் தக்காளி தண்ணி சட்னியை,

சூடான இட்லி
மொறுமொறுப்பான தோசை
ஊத்தப்பம்
குழிப்பணியாரம்
ரவா தோசை ஆகியவற்றுடன் சூடாகப் பரிமாறலாம்.

இட்லியை ஒரு தட்டில் வைத்து, அதன் மேல் இந்தத் தக்காளி தண்ணி சட்னியை ஊற்றி, சிறிதளவு நல்லெண்ணெய் சேர்த்துச் சாப்பிட்டுப் பாருங்கள். கோவை ஹோட்டல் பாணியில் அட்டகாசமான காலை உணவு தயார்.

காரம், புளிப்பு, பூண்டு மணம் என அனைத்தும் கலந்து வரும் இந்த எளிமையான கொங்கு ஸ்பெஷல் தக்காளி தண்ணி சட்னி, வீட்டில் அனைவரும் விரும்பிச் சாப்பிடும் வகையில் இருக்கும்.

Porivilangai Urundai : பாட்டி காலத்து பொரிவிளங்காய் உருண்டை.. ஒரு முறை செய்தால் பல நாட்கள் சுவைக்கலாம்!

Vishnupriya — Tue, 03 Nov 2026 21:55:33 +0530

Porivilangai Urundai : பாரம்பரியப் பொரிவிளங்காய் உருண்டை செய்வது எப்படி? சரியான வெல்லப்பாகு பதம், மணக்கும் சுக்கு, ஏலக்காய் வாசனையுடன் நீண்ட நாட்கள் கெடாமல் சேமிக்கும் ரெசிபி இதோ.

நம் முன்னோர்கள் காலத்தில் பண்டிகை நாட்கள், விசேஷங்கள் மட்டுமின்றி வீட்டில் எப்போதும் வைத்திருந்து சாப்பிடும் வகையில் தயாரிக்கப்பட்ட பாரம்பரிய இனிப்புகளில் ஒன்றுதான் பொரிவிளங்காய் உருண்டை.

அரிசி, பாசிப்பருப்பு, வெல்லம், வேர்க்கடலை, எள் என சத்தான பொருட்களை ஒன்றாகச் சேர்த்து செய்யப்படும் இந்த உருண்டை, நீண்ட நாட்கள் கெடாமல் வைத்துச் சாப்பிடக்கூடிய ஒரு பழமையான சிற்றுண்டியாகும்.

கடைகளில் வாங்கும் இனிப்புகளை விட வீட்டிலேயே வறுத்து, அரைத்து, வெல்லப்பாகு சேர்த்து கையால் உருண்டை பிடித்து செய்யும் பொரிவிளங்காய் உருண்டைக்கு தனி ருசி உண்டு. அதிலும் சுக்கு, ஏலக்காய் சேர்த்து தயாரித்தால் வீடு முழுவதும் மணக்கும்.

குழந்தைகள் முதல் பெரியவர்கள் வரை விரும்பிச் சாப்பிடும் இந்த பாரம்பரிய ரெசிபியை வீட்டிலேயே எளிதாகச் செய்து பார்ப்போம்.

புழுங்கல் அரிசி - 1 கப்
பாசிப்பருப்பு - 1\2 கப்
வெல்லம் - 1 கப்
வேர்க்கடலை - 1\4 கப்
பொட்டுக்கடலை - 1\4 கப்
தேங்காய்ப் பல் - 1\4 கப்
எள் - 2 டேபிள்ஸ்பூன்
நெய் - 2 டேபிள்ஸ்பூன்
ஏலக்காய்த்தூள் - 1\2 டீஸ்பூன்
சுக்குத்தூள் - 1\4 டீஸ்பூன்
தண்ணீர் - தேவையான அளவு

அரிசியை வறுத்து மாவாக்குதல்

முதலில் புழுங்கல் அரிசியை நன்றாகக் கழுவி, தண்ணீரை வடித்து நிழலில் உலர்த்திக் கொள்ளவும். அரிசி ஈரமில்லாமல் உலர்ந்ததும், ஒரு வாணலியில் சேர்த்து மிதமான தீயில் நன்றாக வறுக்கவும்.

அரிசி லேசாகப் பொன்னிறமாகி, கையில் எடுத்துப் பார்த்தால் மொறுமொறுப்பாக இருக்கும் வரை வறுக்க வேண்டும். பின்னர் ஆறவைத்து மிக்ஸியில் அல்லது மாவு அரைக்கும் இயந்திரத்தில் நைசாக அரைத்துக் கொள்ளவும். அரைத்த மாவை சல்லடையில் சலித்து, பெரிய துகள்களை மீண்டும் அரைத்துச் சேர்க்கவும்.

பாசிப்பருப்பை வறுத்து அரைத்தல்

அதே வாணலியில் பாசிப்பருப்பைச் சேர்த்து மிதமான தீயில் நல்ல வாசனை வரும் வரை வறுக்கவும். பருப்பு பொன்னிறமாக மாறியதும் அடுப்பை அணைத்து ஆறவிடவும். பின்னர் இதையும் நைசாக அரைத்துச் சலித்து, புழுங்கல் அரிசி மாவுடன் கலந்து வைக்கவும்.

வேர்க்கடலை, தேங்காயை வறுத்தல்

வேர்க்கடலையை வறுத்து, தோலை நீக்கி இரண்டாக உடைத்துக் கொள்ளவும். பொட்டுக்கடலையை லேசாக வறுத்துக் கொள்ளவும். எள்ளை தனியாக வறுத்து எடுத்துக் கொள்ளவும். தேங்காய்ப் பல்லை சிறிதளவு நெய் சேர்த்து பொன்னிறமாகும் வரை வறுக்கவும்.

மாவுடன் பொருட்களைச் சேர்த்தல்

ஒரு பெரிய பாத்திரத்தில் அரைத்த அரிசி மாவு, பாசிப்பருப்பு மாவு ஆகியவற்றைச் சேர்க்கவும். இதனுடன் வறுத்த வேர்க்கடலை, பொட்டுக்கடலை, தேங்காய்ப் பல், எள் ஆகியவற்றையும் சேர்த்துக் கலக்கவும். பின்னர் ஏலக்காய்த்தூள், சுக்குத்தூள் மற்றும் நெய்யைச் சேர்த்து நன்றாகக் கலந்து வைக்கவும்.

வெல்லப்பாகு தயாரித்தல்

வெல்லத்தை ஒரு பாத்திரத்தில் சேர்த்து, அது மூழ்கும் அளவுக்குத் தண்ணீர் ஊற்றி மிதமான தீயில் காய்ச்சவும். பொரிவிளங்காய் உருண்டைக்கு வெல்லப்பாகு மிகவும் முக்கியம். பாகு சரியான பதத்தில் வந்தால் மட்டுமே உருண்டை நன்றாகப் பிடிக்கும்.

பாகு பதம் கண்டறிவது எப்படி?

ஒரு சிறிய கிண்ணத்தில் தண்ணீர் ஊற்றி, அதில் சிறிதளவு வெல்லப்பாகை விடவும். பாகு தண்ணீரில் கரையாமல் உருண்டையாகத் திரண்டு வந்தால் சரியான பதம் வந்துவிட்டது.

அந்த உருண்டையை விரலால் அழுத்திப் பார்த்தால் கடினமாகவும், உடைத்தால் மொறுமொறுப்பாகவும் இருக்க வேண்டும். இதுவே பொரிவிளங்காய் உருண்டைக்கான சரியான பாகு பதம்.

உருண்டை பிடித்தல்

தயார் செய்த வெல்லப்பாகை உடனடியாக மாவுக் கலவையில் சிறிது சிறிதாக ஊற்றிக் கொண்டே நன்றாகக் கலக்கவும். கலவை சூடாக இருக்கும்போதே கைகளில் சிறிதளவு நெய் தடவிக் கொண்டு, தேவையான அளவு எடுத்து இறுக்கமாக உருண்டை பிடிக்கவும்.

உருண்டை பிடிக்கும்போது கலவை உதிர்ந்தால், சிறிதளவு சூடான வெல்லப்பாகைச் சேர்த்துக் கலக்கலாம். அனைத்து கலவையையும் உருண்டைகளாகப் பிடித்து அரிசி மாவில் பிரட்டி எடுத்து ஆறியதும் காற்றுப் புகாத டப்பாவில் சேமித்து வைக்கவும்.

அரிசி, பாசிப்பருப்பு இரண்டையும் நன்றாக வறுத்தால் உருண்டைக்கு நல்ல வாசனையும் சுவையும் கிடைக்கும்.
மாவு நைசாக அரைக்கப்பட்டிருக்க வேண்டும். அப்போதுதான் உருண்டை பிடிக்கும்போது நன்றாக ஒன்றுசேரும்.
தேங்காய்ப் பல்லை நெய்யில் நன்றாக வறுத்துச் சேர்க்க வேண்டும். ஈரப்பதம் இருந்தால் உருண்டை விரைவில் கெட வாய்ப்புள்ளது.
வெல்லப்பாகு சரியான பதத்தில் இருக்க வேண்டும். பாகு குறைவாக இருந்தால் உருண்டை பிடிக்காது; அதிகமாகக் காய்ச்சினால் மிகவும் கடினமாகிவிடும்.
பாகு ஊற்றியதும் கலவை சூடாக இருக்கும்போதே உருண்டை பிடிக்க வேண்டும்.
உருண்டைகள் முழுவதும் ஆறிய பிறகு மட்டுமே டப்பாவில் போட்டு மூட வேண்டும்.

பொரிவிளங்காய் உருண்டையின் சிறப்புகள்

புழுங்கல் அரிசி, பாசிப்பருப்பு, வேர்க்கடலை, எள், பொட்டுக்கடலை போன்ற பொருட்கள் சேர்வதால் இந்த உருண்டையில் கார்போஹைட்ரேட், புரதம் மற்றும் கொழுப்பு உள்ளிட்ட ஊட்டச்சத்துகள் கிடைக்கின்றன. வெல்லம் இனிப்புச் சுவையைத் தருகிறது. சுக்கு, ஏலக்காய் சேர்ப்பதால் பாரம்பரிய மணமும் கிடைக்கிறது.

வீட்டிலேயே வறுத்து, அரைத்து, வெல்லப்பாகு சேர்த்து செய்யும் இந்தப் பொரிவிளங்காய் உருண்டை, பழைய காலத்து சுவையையும் பாரம்பரியத்தையும் மீண்டும் நினைவூட்டும் அருமையான சிற்றுண்டி. பண்டிகை நாட்களிலும், பயணங்களிலும் எடுத்துச் செல்ல ஏற்ற இந்த இனிப்பை நீங்களும் செய்து சுவைத்துப் பாருங்கள்.

Tandoori Egg : ஹோட்டல் ஸ்டைல் முட்டை தந்தூரி .. சுவை அள்ளும் ஈஸி ரெசிபி!

Vishnupriya — Tue, 03 Nov 2026 17:24:38 +0530

Tandoori Egg : முட்டையை எப்போதும் ஒரே மாதிரி சாப்பிட்டு போர் அடித்துவிட்டதா? தயிர், காரசாரமான மசாலா சேர்த்து கடாயிலேயே ஹோட்டல் ஸ்டைல் முட்டை தந்தூரி செய்வது எப்படி? எளிய செய்முறை, தேவையான பொருட்கள் மற்றும் சுவை கூடும் டிப்ஸ் இதோ.

முட்டையை எப்போதும் ஒரே மாதிரி வேகவைத்தோ, ஆம்லெட் போட்டோ சாப்பிட்டு போர் அடித்துவிட்டதா? அப்படியென்றால், இந்த முறை கொஞ்சம் வித்தியாசமாகவும், காரசாரமாகவும் முட்டை தந்தூரி செய்து பாருங்கள்.

தயிர், மசாலா பொடிகள், இஞ்சி-பூண்டு பேஸ்ட் என அசத்தலான சுவை தரும் பொருட்களில் முட்டையை ஊறவைத்து, கடாயிலேயே பொன்னிறமாக வறுத்து எடுத்தால் போதும். வெளிப்புறம் மசாலா படிந்து சுவையாகவும், உள்ளே மென்மையாகவும் இருக்கும் இந்த முட்டை தந்தூரி, மாலை நேர ஸ்நாக்ஸ் முதல் பார்ட்டி ஸ்டார்டர் வரை அனைவரையும் கவரும்.

ஹோட்டலில் சாப்பிடும் தந்தூரி சுவையை வீட்டிலேயே, தந்தூரி அடுப்பு இல்லாமல் எப்படி செய்வது என்று இப்போது பார்க்கலாம்.

முட்டை - 4
கெட்டியான தயிர் - 4 டேபிள்ஸ்பூன்
மல்லித்தூள் - 1 டீஸ்பூன்
மிளகாய்த்தூள் - 1 டீஸ்பூன்
மஞ்சள்தூள் - 1\4 டீஸ்பூன்
மிளகுத்தூள்- 1\2 டீஸ்பூன்
கரம் மசாலா - 1\2 டீஸ்பூன்
இஞ்சி-பூண்டு பேஸ்ட் 1 டீஸ்பூன்
எலுமிச்சை சாறு - 1 டீஸ்பூன்
கஸ்தூரி மேத்தி - 1\2 டீஸ்பூன்
கடுகு எண்ணெய் - தேவையான அளவு
உப்பு - தேவையான அளவு
கொத்தமல்லி இலை - சிறிதளவு

முதலில் முட்டைகளை வேகவைத்து, ஆறியதும் ஓடுகளை நீக்கிக் கொள்ளவும். பின்னர் முட்டையின் மேற்பரப்பில் கத்தியால் லேசாகக் கீறல்கள் போடவும் அல்லது ஒரு ஸ்போர்க் ஸ்பூன் (Spork) வைத்து மெதுவாகக் குத்திக் கொள்ளலாம். இதனால் மசாலா முட்டையின் உள்ளே நன்றாகப் பிடித்து சுவை அதிகரிக்கும்.

தந்தூரி மசாலா தயார் செய்யவும்

ஒரு அகலமான பாத்திரத்தில் தயிர், மல்லித்தூள், மிளகாய்த்தூள், மஞ்சள்தூள், மிளகுத்தூள், கரம் மசாலா ஆகியவற்றைச் சேர்க்கவும்.

இதனுடன் இஞ்சி - பூண்டு பேஸ்ட், எலுமிச்சை சாறு, தேவையான உப்பு, பொடியாக நறுக்கிய கொத்தமல்லி இலை மற்றும் கஸ்தூரி மேத்தி சேர்க்கவும். அனைத்தையும் நன்றாகக் கலந்து, கட்டிகள் இல்லாத மசாலா கலவையாகத் தயார் செய்யவும்.

முட்டைகளை மசாலாவில் ஊற வைக்கவும்

வேகவைத்து தோலுரித்த முட்டைகளை மசாலா கலவையில் சேர்த்து, எல்லா பக்கங்களிலும் மசாலா நன்றாகப் படும்படி மெதுவாகப் புரட்டவும். இதனை 10 முதல் 15 நிமிடங்கள் வரை ஊற வைக்கவும்.

கடாயில் தந்தூரி முட்டையை வறுக்கவும்

ஒரு தோசைக்கல் அல்லது அகலமான கடாயில் கடுகு எண்ணெய் ஊற்றி மிதமான தீயில் சூடாக்கவும்.ஊறவைத்த முட்டைகளை நீளமான குச்சியில் சொருகிக் கொள்ளலாம். குச்சி இல்லையென்றால் நேரடியாகக் கடாயிலும் வறுக்கலாம்.

முட்டைகளை கடாயில் வைத்து, அவ்வப்போது திருப்பி அனைத்து பக்கங்களிலும் மசாலா பொன்னிறமாகவும், லேசாக கருகிய தந்தூரி தோற்றத்திலும் வரும் வரை வறுக்கவும். மசாலா எளிதில் கருகிவிடும் என்பதால், மிதமான தீயில் வைத்து கவனமாக வறுப்பது அவசியம். தேவையெனில் சிறிதளவு எண்ணெய் தெளித்துக் கொள்ளலாம்.

சுவையான முட்டை தந்தூரி தயார்

வறுத்த முட்டைகளை ஒரு தட்டில் எடுத்து, மேலே சிறிதளவு சாட் மசாலா மற்றும் பொடியாக நறுக்கிய கொத்தமல்லி இலை தூவவும். சூடான முட்டை தந்தூரியை புதினா சட்னி, வெங்காயத் துண்டுகள் மற்றும் எலுமிச்சை சில்லுகளுடன் பரிமாறினால் சுவை இன்னும் அருமையாக இருக்கும்.முட்டை தந்தூரி சுவையாக வர சில டிப்ஸ்

தயிர் தண்ணீராக இல்லாமல் கெட்டியாக இருந்தால் மசாலா முட்டையில் நன்றாகப் பிடிக்கும்.
கஸ்தூரி மேத்தியை உள்ளங்கைகளில் நசுக்கிச் சேர்த்தால் நல்ல மணம் கிடைக்கும்.
கடுகு எண்ணெயை சூடாக்கிய பிறகு தீயைக் குறைத்து முட்டைகளை வறுக்கவும்.
தந்தூரி சுவை அதிகமாக வேண்டும் என்றால், இறுதியில் சிறிதளவு வெண்ணெய் தடவலாம்.

சூடான, காரசாரமான முட்டை தந்தூரி தயார். எளிமையான வேகவைத்த முட்டையை இப்படி மசாலா சேர்த்து வறுத்தால், வீட்டிலேயே ஹோட்டல் ஸ்டைல் ஸ்டார்டர் கிடைத்துவிடும். மாலை நேரத்தில் டீயுடன் சாப்பிடவும், விருந்தினர்களுக்கு பரிமாறவும் ஏற்ற ரெசிபி இது.

Broken Heart Syndrome: கெட்ட செய்தி கேட்டதும் மாரடைப்பு வருமா? இது சினிமா இல்லை நிஜம்!

Vedarethinam Ramalingam — Tue, 03 Nov 2026 13:13:15 +0530

யாரோ இறந்த செய்தியை கேட்டதும், அதிர்ச்சியில் மாரடைப்பு வந்து இறந்துவிட்டார்கள் என நாம் கேள்விப்பட்டிருப்போம். இதை கேட்கும்போது கொஞ்சம் ஓவராக இருக்கிறதே என தோன்றும். ஆனால் இது 100% உண்மை, இதற்கு பின்னால் அறிவியல் காரணங்கள் உள்ளன என மருத்துவர்கள் சொல்கிறார்கள்.

உடலில் உண்மையில் என்ன நடக்கிறது?

நெருக்கமானவர்களின் இறப்பு, பெரிய இழப்பு, விபத்து அல்லது கடுமையான சண்டை போன்ற மோசமான செய்திகளை நீங்கள் திடீரென கேட்கும்போது, உங்கள் மூளையில் கடுமையான அழுத்தம் (ஸ்ட்ரெஸ்) ஏற்படுகிறது.

இந்த நேரத்தில், அட்ரினலின் மற்றும் நார்-அட்ரினலின் ஹார்மோன்கள் உடலில் வேகமாக சுரக்கின்றன. இதை 'ஸ்ட்ரெஸ் ஹார்மோன்களின் வெள்ளம்' என்று சொல்வார்கள்.

இந்த அதிகப்படியான அட்ரினலின் நேரடியாக இதயத்தை தாக்குகிறது:

*1. கரோனரி தமனி சுருங்குதல்:* இதயத்தின் ரத்த நாளங்கள் திடீரென சுருங்கி, ரத்த ஓட்டம் தடைபடுகிறது.

*2. இதய தசை செயலிழப்பு:* இதயத்தின் இடது கீழ் பகுதி (Left Ventricle) திடீரென பலூன் போல வீங்கி, ரத்தத்தை பம்ப் செய்வதை நிறுத்திவிடுகிறது. ஜப்பானில் மீன் பிடிக்க பயன்படுத்தும் 'டகோட்சுபோ' பானை போல இந்த வடிவம் இருப்பதால், இதற்கு *Takotsubo Cardiomyopathy* அல்லது *Broken Heart Syndrome* என்று பெயர்.

இதன் அறிகுறிகள் மாரடைப்பை போலவே இருக்கும் - கடுமையான நெஞ்சு வலி, மூச்சுத் திணறல், வாந்தி, மயக்கம். ஈசிஜி (ECG) எடுத்தாலும் மாரடைப்பு போலவே காட்டும்.

அப்படியானால் இது மாரடைப்பா?

இல்லை, சாதாரண மாரடைப்புக்கும் இதற்கும் வித்தியாசம் உள்ளது. கொலஸ்ட்ரால் சேர்ந்து ரத்த நாளங்கள் அடைபடுவதால் சாதாரண மாரடைப்பு வருகிறது. ஆனால் ப்ரோக்கன் ஹார்ட் சின்ட்ரோம் எந்த அடைப்பும் இல்லாமல், ஸ்ட்ரெஸ் ஹார்மோன்களால் மட்டுமே வருகிறது. அதனால், சரியான நேரத்தில் மருத்துவமனைக்கு சென்றால் இதை முழுமையாக குணப்படுத்திவிடலாம். ஆனால் தாமதமானால் உயிரிழப்பு கூட ஏற்படலாம்.

யாருக்கு அதிக ஆபத்து?

50 வயதுக்கு மேற்பட்ட பெண்களுக்கு இந்த சின்ட்ரோம் அதிகம் வருவதாக ஆய்வுகள் சொல்கின்றன. மெனோபாஸுக்குப் பிறகு ஈஸ்ட்ரோஜன் ஹார்மோன் குறைவதால், இதயத்தின் ஸ்ட்ரெஸ் தாங்கும் திறன் குறைகிறது. இதுதவிர, ஏற்கனவே உயர் ரத்த அழுத்தம், சர்க்கரை நோய், பதற்றம் அல்லது மனச்சோர்வு உள்ளவர்களுக்கு இதன் ஆபத்து அதிகம்.

கெட்ட செய்தி கேட்டால் என்ன செய்ய வேண்டும்?

1. நோயாளியை படுக்க வைத்து, கால்களை சற்று உயர்த்தி வைக்கவும்.

2. அவர்களை சத்தமாக அழவோ, உணர்ச்சிவசப்படவோ விடாதீர்கள். அமைதியாக பேசுங்கள்.

3. நெஞ்சு வலி அல்லது மூச்சுத் திணறல் இருந்தால், கேஸ் ட்ரபிள் அல்லது டென்ஷன் என நினைத்து வீட்டில் இருக்க வேண்டாம். உடனே மருத்துவமனைக்கு அழைத்துச் செல்லுங்கள்.

4. ஏற்கனவே இதய நோயாளியாக இருந்தால், அவர்களின் மருந்துகளை கையில் வைத்திருக்கவும்.

துக்கம் என்பது வாழ்க்கையின் ஒரு அங்கம். ஆனால் அந்த துக்கம் இன்னொரு உயிரை பறிக்காமல் பார்த்துக்கொள்வது அவசியம். அதனால், கெட்ட செய்திகளை சொல்லும்போது குடும்பத்தினர் அனைவரும் சேர்ந்து, மெதுவாகவும் அமைதியாகவும் சொல்லுங்கள். தனியாக இருக்கும் ஒருவருக்கு திடீரென பெரிய அதிர்ச்சியை கொடுக்காதீர்கள்.

Onion Storage Tips: இரவே வெங்காயத்தை உரித்து ஃப்ரிட்ஜில் வைக்கிறீங்களா? விஷமாகும் உரித்த வெங்காயம்?

Asianet News — Tue, 03 Nov 2026 20:05:10 +0530

காலையில் சட்னி அரைக்க வசதியாக முந்தைய நாள் இரவே வெங்காயத்தை உரித்து ஃப்ரிட்ஜில் வைக்கிறீர்களா? அப்படிச் செய்வதால் பாதிப்பு ஏற்படுமா அல்லது மறுநாள் தாராளமாகப் பயன்படுத்தலாமா? வெங்காயத்தைச் சரியாகச் சேமிக்கும் முறை குறித்து தெரிந்துகொள்ளுங்கள்.

காலையில் அவசர அவசரமாக காலை உணவு தயாரிக்கும்போது வெங்காயம் உரிப்பது பலருக்கும் கூடுதல் வேலையாக இருக்கும். குறிப்பாக, சட்னி அரைக்கும்போது வெங்காயம் தேவைப்படுவதால், சிலர் முந்தைய நாள் இரவே வெங்காயத்தை உரித்து ஃப்ரிட்ஜில் வைத்துவிடுவார்கள். இதனால் காலையில் சமையல் வேலை எளிதாகிவிடும்.

ஆனால், இப்படி முன்கூட்டியே வெங்காயத்தை உரித்து வைப்பது சரியான முறையா? இரவு முழுவதும் ஃப்ரிட்ஜில் வைத்த வெங்காயத்தை மறுநாள் சட்னியில் பயன்படுத்தலாமா? இதைப் பற்றி தெரிந்துகொள்ள வேண்டிய சில முக்கியமான விஷயங்கள் உள்ளன.

உரித்த வெங்காயத்தை ஃப்ரிட்ஜில் வைக்கலாமா?

நிச்சயமாக வைக்கலாம். வெங்காயத்தை உரித்துவிட்டால் அதில் வெளிப்புற பாதுகாப்பு அடுக்கு நீங்கிவிடும். இதனால் வெங்காயம் சுற்றுப்புறத்தில் உள்ள ஈரப்பதம், வாசனை மற்றும் நுண்ணுயிர்களுடன் தொடர்பு கொள்ள அதிக வாய்ப்பு உள்ளது.

எனவே, உரித்த வெங்காயத்தை அப்படியே சமையலறை மேடையிலோ அல்லது திறந்த தட்டிலோ வைத்துவிடுவது நல்லதல்ல. அதற்குப் பதிலாக, சுத்தமான காற்று புகாத டப்பாவில் போட்டு ஃப்ரிட்ஜில் வைப்பது சிறந்தது.

வெங்காயத்தை முதல் நாளே உரித்து வைத்தால் அது விஷமாக மாறிவிடும், அதில் நச்சுத்தன்மை உருவாகும் என்ற கருத்து பலரிடம் உள்ளது. ஆனால், இதற்கு அறிவியல் ஆதாரம் இல்லை.

உரித்த அல்லது நறுக்கிய வெங்காயத்தைச் சரியான முறையில் ஃப்ரிட்ஜில் வைத்திருந்தால் மறுநாள் பயன்படுத்துவதில் பொதுவாகப் பிரச்சினை இல்லை. வெங்காயத்தை வெட்டி வைத்தால் அதில் பாக்டீரியாக்கள் வேகமாகப் பெருகி ஆபத்தானதாகிவிடும் என்ற கருத்தும் தவறானது. முக்கியமானது அதன் சேமிப்பு முறைதான்.

காலையில் சட்னி அரைப்பதற்காக முந்தைய நாள் இரவே வெங்காயத்தை உரித்து வைக்க விரும்பினால் இந்த முறைகளைப் பின்பற்றுங்கள்.

1. சுத்தமான கைகள்: முதலில் கைகளை நன்றாகக் கழுவிவிட்டு வெங்காயத்தை உரிக்க வேண்டும்.

2. காற்று புகாத டப்பா: உரித்த வெங்காயத்தை சுத்தமான, ஈரமில்லாத, மூடி போடக்கூடிய டப்பாவில் வைக்க வேண்டும்.

3. உடனடியாக ஃப்ரிட்ஜில் வைக்கவும்: உரித்த வெங்காயத்தை நீண்ட நேரம் வெளியே வைக்காமல் ஃப்ரிட்ஜில் வைக்க வேண்டும்.

4. தனியாகச் சேமிக்கவும்: வெங்காயத்தின் வாசனை மற்ற உணவுப் பொருட்களில் பரவாமல் இருக்க தனி டப்பாவில் வைப்பது நல்லது.

5. விரைவாகப் பயன்படுத்தவும்: அடுத்த நாள் காலையிலேயே பயன்படுத்துவது சிறந்தது. நீண்ட நாட்கள் வைத்திருக்க வேண்டாம்.

தேசிய வெங்காயச் சங்கத்தின் வழிகாட்டுதலின்படி, முழுமையாக உரிக்கப்பட்ட வெங்காயத்தை 4.4 டிகிரி செல்சியஸ் அல்லது அதற்குக் குறைவான வெப்பநிலையில் ஃப்ரிட்ஜில் சேமிக்க வேண்டும்.

உரித்த வெங்காயம், நறுக்கிய வெங்காயம் ஆகியவற்றைச் சரியான குளிர்பதன நிலையில் சேமித்தால் பல நாட்கள் வரை பயன்படுத்த முடியும். நறுக்கிய வெங்காயத்தை காற்றுப் புகாத டப்பாவில் ஃப்ரிட்ஜில் அதிகபட்சம் 7 நாட்கள் வரை வைத்திருக்கலாம் என்று சில உணவுப் பாதுகாப்பு வழிகாட்டுதல்கள் தெரிவிக்கின்றன. இருப்பினும், அதன் சுவை, மணம் மற்றும் தரம் குறையாமல் இருக்க விரைவாகப் பயன்படுத்துவது நல்லது.

முக்கியம்: ஃப்ரிட்ஜில் வைத்திருந்தாலும் வெங்காயத்தில் பூஞ்சை, வழக்கத்திற்கு மாறான நிறமாற்றம், வழுவழுப்பான தன்மை அல்லது அழுகிய வாசனை இருந்தால் பயன்படுத்த வேண்டாம்.

சட்னிக்காக வெங்காயத்தை எப்போது உரிப்பது சிறந்தது?

சட்னிக்காக வெங்காயத்தைப் பயன்படுத்தும்போது, முடிந்தவரை அரைப்பதற்கு முன்பாகவே உரித்துப் பயன்படுத்துவது சிறந்தது. இதனால் அதன் இயற்கையான மணமும் சுவையும் நன்றாக இருக்கும்.

ஆனால், காலையில் நேரமின்மை காரணமாக முந்தைய நாள் இரவே உரித்து வைக்க வேண்டிய சூழல் இருந்தால் கவலைப்படத் தேவையில்லை. சரியான முறையில் ஃப்ரிட்ஜில் சேமித்தால் மறுநாள் தாராளமாகப் பயன்படுத்தலாம்.

எனவே, இரவே வெங்காயத்தை உரித்து வைப்பது தவறல்ல; அதை எப்படி சேமிக்கிறோம் என்பதுதான் முக்கியம்! வெங்காயம் உரித்தால் விஷமாகிவிடும் என்ற வதந்திகளை நம்ப வேண்டாம்.

Mushroom Soup : பூண்டு, இஞ்சி மணத்தில் காரசாரமான காளான் சூப்.. ஈஸியான செய்முறை இதோ!

Vishnupriya — Wed, 04 Nov 2026 22:08:19 +0530

Mushroom Soup : சூடாகவும் காரசாரமாகவும் காளான் சூப் குடிக்க ஆசையா? காளான், பூண்டு, இஞ்சி, பச்சை மிளகாய் சேர்த்து ஹோட்டல் சுவையில் வீட்டிலேயே சூப் தயாரிப்பது எப்படி? தேவையான பொருட்கள் மற்றும் எளிய செய்முறை இதோ.

மழைக்கால மாலை நேரம் என்றாலே சூடாக ஏதாவது குடிக்க வேண்டும் என்று தோன்றும். அதுவும் காளானின் மணமும், பூண்டு, இஞ்சி, பச்சை மிளகாயின் காரமும் சேர்ந்து தயாராகும் காளான் சூப் கிடைத்தால் சொல்லவே வேண்டாம். சுவையும் மணமும் ஆளையே மயக்கிவிடும். உடலுக்கு இதமான சூடான பானமாக மட்டுமின்றி, காளானின் சத்துக்களையும் உணவில் சேர்த்துக்கொள்ள இந்த சூப் ஒரு நல்ல தேர்வாக இருக்கும்.

வீட்டில் இருக்கும் எளிய பொருட்களை வைத்தே ஹோட்டல் ஸ்டைலில் காரசாரமான காளான் சூப்பை எப்படி தயாரிப்பது என்று இங்கே பார்க்கலாம்.

காளான் - 200 கிராம்
பெரிய வெங்காயம்- 1
பூண்டு - 4 பல்
இஞ்சி - 1 சிறிய துண்டு
பச்சை மிளகாய் - 1
வெண்ணெய் அல்லது எண்ணெய் - 1 1\2 டேபிள்ஸ்பூன்
மஞ்சள் தூள் - 1\4 டீஸ்பூன்
மிளகுத் தூள் - 1\2 டீஸ்பூன்
சீரகத் தூள்- 1\4 டீஸ்பூன்
மைதா மாவு - 1 டேபிள்ஸ்பூன்
தண்ணீர் - 3 கப்
உப்பு - தேவையான அளவு
கொத்தமல்லி தழை - சிறிதளவு

காளானை சுத்தம் செய்து நறுக்கவும்

முதலில் காளான்களை தண்ணீரில் விரைவாகக் கழுவி, ஈரத்தைத் துடைத்து சுத்தம் செய்துகொள்ளவும். பின்னர் சிறிய துண்டுகளாக நறுக்கி வைக்கவும். வெங்காயத்தையும் பொடியாக நறுக்கிக்கொள்ளவும்.

இஞ்சி, பூண்டு மசாலா தயார் செய்யவும்

மிக்ஸி ஜாரில் இஞ்சி, பூண்டு மற்றும் பச்சை மிளகாயைச் சேர்த்து கொரகொரப்பாக அரைத்துக்கொள்ளவும். இதனை விழுதாக அரைக்காமல் சற்று கொரகொரப்பாக அரைத்தால் சூப்புக்கு நல்ல மணம் கிடைக்கும்.

மசாலாவை வதக்கவும்

ஒரு பாத்திரத்தில் வெண்ணெய் அல்லது எண்ணெய் சேர்த்து சூடாக்கவும். அதில் பொடியாக நறுக்கிய வெங்காயத்தைச் சேர்த்து லேசாக வதக்கவும். பின்னர் அரைத்து வைத்துள்ள இஞ்சி, பூண்டு, பச்சை மிளகாய் கலவையைச் சேர்த்து பச்சை வாசனை போகும் வரை வதக்கவும்.

காளானை சேர்த்து வதக்கவும்

இப்போது நறுக்கி வைத்துள்ள காளான்களைச் சேர்த்து மிதமான தீயில் வதக்கவும். காளானில் இருந்து தண்ணீர் வெளியேறி, அதன் பச்சை வாசனை நீங்கி நன்றாக வெந்ததும் மஞ்சள் தூள் மற்றும் சீரகத் தூள் சேர்த்து கிளறவும்.

சூப்பை கொதிக்க விடவும்

இதனுடன் 3 கப் தண்ணீர் சேர்த்து தேவையான அளவு உப்பு போட்டு நன்றாகக் கலக்கவும். பாத்திரத்தை மூடி வைத்து சுமார் 8 முதல் 10 நிமிடங்கள் மிதமான தீயில் கொதிக்க விடவும்.

சூப்புக்கு கெட்டியான பதம் கொடுக்கவும்

ஒரு சிறிய கிண்ணத்தில் மைதா மாவுடன் சிறிதளவு தண்ணீர் சேர்த்து கட்டியில்லாமல் கரைத்துக்கொள்ளவும்.இந்தக் கலவையை கொதித்துக்கொண்டிருக்கும் சூப்பில் மெதுவாக ஊற்றி தொடர்ந்து கிளறவும். 2 முதல் 3 நிமிடங்கள் கொதிக்க விடும்போது சூப் சற்று கெட்டியான பதத்திற்கு வரும்.

இறுதியாக மணம் சேர்க்கவும்

கடைசியாக மிளகுத் தூள் மற்றும் பொடியாக நறுக்கிய கொத்தமல்லி தழையைச் சேர்த்து ஒரு நிமிடம் கொதிக்க விடவும். அடுப்பை அணைத்துவிட்டு சூடாகப் பரிமாறவும். மணம் மணக்கும் காரசாரமான காளான் சூப் தயார்.

காளான்களை அதிக நேரம் தண்ணீரில் ஊறவைக்க வேண்டாம்.
காளானை நன்றாக வதக்கினால் அதன் தனித்துவமான மணம் சூப்பில் அதிகமாக இருக்கும்.
காரம் அதிகம் வேண்டுமெனில் பச்சை மிளகாய் அல்லது மிளகுத் தூளின் அளவை அதிகரிக்கலாம்.
மைதா மாவுக்கு பதிலாக சோள மாவையும் பயன்படுத்தலாம்.
இன்னும் கிரீமியான சுவை வேண்டுமெனில் இறுதியில் சிறிதளவு பால் சேர்க்கலாம்.
சூப்பை நீண்ட நேரம் கொதிக்க விடாமல், தயாரித்தவுடன் சூடாகப் பரிமாறுவது சிறந்தது.

காளானில் புரதம், நார்ச்சத்து, சில பி வகை வைட்டமின்கள் மற்றும் தாதுக்கள் உள்ளன. காளானை உணவில் சேர்ப்பது சத்தான உணவுப் பழக்கத்திற்கு உதவும். பூண்டு, இஞ்சி, மிளகு ஆகியவை சேர்வதால் சூப்புக்கு நல்ல மணமும் சுவையும் கிடைக்கிறது.

Gongura Chicken : ஆந்திரா ஸ்பெஷல் கோங்குரா சிக்கன்..காரமும் புளிப்பும் கலந்த அட்டகாசமான சுவை!

Vishnupriya — Wed, 04 Nov 2026 17:54:09 +0530

Gongura Chicken : ஆந்திராவின் புகழ்பெற்ற கோங்குரா சிக்கன் செய்வது எப்படி? புளிச்ச கீரையின் தனித்துவமான புளிப்பும், காரமான மசாலாக்களும் சேர்ந்து சுவை அள்ளும் இந்த சிக்கன் ரெசிபி, சாதம், சப்பாத்திக்கு அட்டகாசமான காம்பினேஷன்.

சிக்கன் என்றாலே ஒரே மாதிரியான கிரேவியா? கொஞ்சம் ஆந்திரா ஸ்டைலில் காரசாரமாக, நாவில் எச்சில் ஊற வைக்கும் புளிப்பு கலந்த சுவையில் சிக்கன் செய்து பாருங்கள்.

ஆந்திராவின் புகழ்பெற்ற கோங்குரா (புளிச்சக்கீரை) கீரையின் தனித்துவமான புளிப்பும், மிளகாயின் காரமும், மசாலாக்களின் மணமும் சேர்ந்து உருவாகும் இந்த கோங்குரா சிக்கன், சாதம், சப்பாத்தி, தோசை என அனைத்திற்கும் அட்டகாசமான காம்பினேஷன்.

வழக்கமான சிக்கன் குழம்பை விட வித்தியாசமான சுவையை விரும்புபவர்கள் இந்த ஆந்திரா ஸ்பெஷல் கோங்குரா சிக்கனை ஒருமுறை செய்து பாருங்கள். வீட்டிலேயே ஹோட்டல் ஸ்டைலில் இந்த சுவையான சிக்கனை எளிதாக தயாரிக்கலாம்.

சிக்கனை ஊறவைக்க

சிக்கன் - 500 கிராம்
மஞ்சள் தூள் - ¼ தேக்கரண்டி
மிளகாய்த்தூள் - 1 தேக்கரண்டி
இஞ்சி பூண்டு விழுது - 1 தேக்கரண்டி
உப்பு - தேவையான அளவு
தயிர் - 2 தேக்கரண்டி
எலுமிச்சைச் சாறு - 1 தேக்கரண்டி
கோங்குரா கீரை

சிக்கன் கிரேவி தயாரிக்க

பெரிய வெங்காயம் - 2 (பொடியாக நறுக்கியது)
பிரிஞ்சி இலை
பட்டை
கிராம்பு
ஏலக்காய்
சோம்பு
தக்காளி - 1
இஞ்சி பூண்டு விழுது - 1 தேக்கரண்டி
மிளகாய்த்தூள் - 1 தேக்கரண்டி
மல்லித்தூள் - 1 1\2 தேக்கரண்டி
சீரகத்தூள் - 1\2 தேக்கரண்டி
கரம் மசாலா - 1\2 தேக்கரண்டி
மிளகுத்தூள் - 1\2 தேக்கரண்டி
சீரகம் - 1\2 தேக்கரண்டி
கறிவேப்பிலை - 1 கொத்து
எண்ணெய் - 3 முதல் 4 தேக்கரண்டி
உப்பு - தேவையான அளவு
தண்ணீர் - தேவையான அளவு
கொத்தமல்லித்தழை - சிறிதளவு

சிக்கனை ஊறவைக்கவும்

முதலில் சிக்கனை நன்றாகக் கழுவி தண்ணீரை வடித்து எடுத்துக்கொள்ளவும். அதில் மஞ்சள் தூள், மிளகாய்த்தூள், இஞ்சி பூண்டு விழுது, தயிர், எலுமிச்சைச் சாறு மற்றும் தேவையான அளவு உப்பு சேர்த்து நன்றாகக் கலந்து கொள்ளவும்.

இந்தக் கலவையை குறைந்தது 30 நிமிடங்கள் ஊறவைக்கவும். இதனால் சிக்கனில் மசாலா நன்றாக இறங்கி, சமைக்கும்போது சுவையாகவும் மென்மையாகவும் இருக்கும்.

கோங்குரா கீரையை வதக்கவும்

கோங்குரா கீரையை இலைகளாகப் பிரித்து, நன்றாகக் கழுவி தண்ணீரை வடித்து எடுத்துக்கொள்ளவும். ஒரு வாணலியில் 2 தேக்கரண்டி எண்ணெய் ஊற்றி சூடானதும் கோங்குரா கீரையைச் சேர்த்து மிதமான தீயில் வதக்கவும். கீரை நன்றாகச் சுருங்கி மென்மையாகும் வரை சமைக்கவும்.

கீரையில் உள்ள புளிப்புச் சுவை வெளிப்பட்டு, கீரை நன்றாக வெந்ததும் அடுப்பை அணைத்து ஆறவிடவும்.

வெங்காயம், தக்காளி வதக்கவும்

ஒரு கடாயில் எண்ணெய் ஊற்றி சூடானதும், பிரிஞ்சி இலை, பட்டை, கிராம்பு, ஏலக்காய் மற்றும் சோம்பு தாளிக்கவும்.
அதனுடன் பொடியாக நறுக்கிய வெங்காயம், கீறிய பச்சை மிளகாய் மற்றும் வரமிளகாய் சேர்த்து வெங்காயம் பொன்னிறமாகும் வரை வதக்கவும்.
இஞ்சி பூண்டு விழுது சேர்த்து பச்சை வாசனை போகும் வரை வதக்கவும்.
நறுக்கிய தக்காளி சேர்த்து அது குழைந்து வரும் வரை வதக்கவும்

மசாலா சேர்த்து சிக்கனை வதக்கவும்

பிறகு மல்லித்தூள், மிளகாய் தூள், மஞ்சள் தூள், கரம் மசாலா, மிளகுத்தூள், சீரகத்தூள் சேர்த்து எண்ணெய் பிரியும் வரை கிளறவும்.
ஊறவைத்த சிக்கனைச் சேர்த்து 5 முதல் 7 நிமிடங்கள் நன்றாக வதக்கவும். சிக்கனில் இருந்து தண்ணீர் வெளியேறி மசாலாவுடன் கலந்து வரும்.
தேவையான அளவு தண்ணீர் சேர்த்து மூடி வைத்து மிதமான தீயில் 10 முதல் 15 நிமிடங்கள் சமைக்கவும்.

கோங்குரா கீரையைச் சேர்க்கவும்

சிக்கன் நன்றாக வெந்ததும், நாம் வதக்கி வைத்துள்ள கோங்குரா கீரையை சிக்கனுடன் சேர்த்து நன்றாகக் கிளறவும்.
புளிப்புச் சுவை சிக்கனுடன் நன்றாகச் சேர்ந்து எண்ணெய் மேலே மிதந்து வரும் வரை 2 முதல் 4 நிமிடங்கள் மிதமான தீயில் வைத்து சமைக்கவும்.
இடையிடையே கிளறிவிடவும். சிக்கன் நன்றாக வெந்து, கீரை மசாலா சிக்கனில் ஊறி, கிரேவி கெட்டியாகும் வரை சமைக்க வேண்டும்.

கோங்குரா சிக்கன் தயார்

எண்ணெய் மேலே பிரிந்து, கிரேவி நன்றாகக் கெட்டியானதும் சிறிதளவு கொத்தமல்லித்தழை சேர்த்து அடுப்பை அணைக்கவும். சுவையான ஆந்திரா ஸ்பெஷல் கோங்குரா சிக்கன் தயார்.

கோங்குரா கீரைதான் முக்கியம்: இதன் புளிப்புச் சுவையே இந்த உணவின் தனித்துவம். புளிப்பு அதிகமாக இருந்தால் கீரையின் அளவைக் குறைக்கலாம்.

கீரையை நன்றாக வதக்கவும்: பச்சை வாசனை போகும் வரை வதக்குவது சுவையை அதிகரிக்கும்.

தக்காளி விருப்பமானது: கோங்குரா ஏற்கனவே புளிப்புச் சுவை கொண்டதால் தக்காளியைத் தவிர்க்கலாம்.

காரத்தை சரிசெய்யவும்: ஆந்திரா ஸ்டைலில் காரம் அதிகமாக இருக்கும். உங்கள் விருப்பத்திற்கு ஏற்ப மிளகாயின் அளவைக் குறைக்கலாம்.

சிக்கனை அதிகமாக வேகவைக்க வேண்டாம்: சிக்கன் மென்மையாக இருக்கும் வரை மட்டும் சமைக்கவும்.

கிரேவி கெட்டியாக இருக்கட்டும்: இந்த உணவு சாதத்துடன் சாப்பிடுவதற்கு ஏற்ற வகையில் சற்று கெட்டியாக இருந்தால் சுவையாக இருக்கும்.

ஆந்திரா ஸ்பெஷல் கோங்குரா சிக்கனை சூடான சாதத்துடன் சேர்த்து சாப்பிட்டால் அதன் காரமும் புளிப்பும் அற்புதமான சுவையைத் தரும்.

மேலும்,

நெய் சாதம்
சப்பாத்தி
பரோட்டா
தோசை
ஜீரக சாதம் ஆகியவற்றுடனும் பரிமாறலாம்.

கோங்குரா கீரையின் புளிப்பும், சிக்கனின் சுவையும் ஒன்றாக இணையும் இந்த ஆந்திரா ஸ்பெஷல் கோங்குரா சிக்கன், வழக்கமான சிக்கன் குழம்பிலிருந்து முற்றிலும் மாறுபட்ட சுவையைத் தரும். வார இறுதி மதிய உணவுக்கு செய்து குடும்பத்தினருடன் ருசித்துப் பாருங்கள்.

Dal Cooking Tips: பருப்பு ஊறவைத்த தண்ணீரை கீழ ஊத்துறீங்களா..? சத்துகள் வீணாகாம சமைப்பது எப்படி..?

Asianet News — Wed, 04 Nov 2026 19:19:38 +0530

பருப்பு உடல் நலத்திற்கு மிகவும் நல்லது. நம் உடலுக்குத் தேவையான ஊட்டச்சத்துக்களும் புரதமும் பருப்பில் நிறைந்துள்ளன. இருப்பினும், அவை அனைத்தையும் பெறுவதற்கு, அதை எப்படி சமைப்பது? எப்படிச் சாப்பிடுவது? என்பதை நாம் தெரிந்து கொள்ள வேண்டும்.

நம் இந்தியர்களின் அன்றாட வாழ்வில் பருப்பு இல்லாத ஒரு உணவைக் கற்பனை செய்து பார்ப்பது மிகவும் கடினம். நாம் பயறு, கொண்டைக்கடலை, மற்றும் ராஜ்மா போன்ற பல்வேறு பருப்பு வகைகளை ஏதேனும் ஒரு வடிவத்தில் உட்கொண்டு வருகிறோம். பருப்பில் நம் உடலுக்குத் தேவையான ஊட்டச்சத்துக்களும் புரதமும் நிறைந்துள்ளன. இருப்பினும், இந்த ஊட்டச்சத்துக்கள் அனைத்தையும் நம் உடல் பெறுவதற்கு, நாம் பருப்பை சமைக்கும் விதமும் மிகவும் முக்கியமானது. பருப்பில் உள்ள ஊட்டச்சத்துக்கள் வீணாகாமல் இருக்க, அதை எப்படி சமைப்பது? நாம் பருப்பை எப்படிச் சாப்பிட வேண்டும்? வல்லுநர்கள் என்ன சொல்கிறார்கள் என்று பார்ப்போம்…

பலர் பருப்பை நேரடியாக சமைக்கிறார்கள். ஆனால், அதிலுள்ள ஊட்டச்சத்துக்களைப் பெறுவதற்கு, சமைப்பதற்கு முன் பருப்பை குறைந்தது 2 மணி நேரமாவது ஊறவைப்பது மிகவும் அவசியம். இவ்வாறு ஊறவைப்பது, பருப்பிலுள்ள ஃபைடிக் அமிலம் போன்ற ஊட்டச்சத்து எதிர்ப்பிகளை நீக்குகிறது. இது நமது செரிமான அமைப்பு பருப்பில் உள்ள புரதங்களை முழுமையாக உறிஞ்சிக்கொள்ள அனுமதிக்கிறது. இதனால் வயிறு உப்புசம் அல்லது வாயுத் தொல்லைகள் ஏற்படாது.

ஊறவைத்த தண்ணீரை வீணாக்காதீர்கள்...

பருப்பை ஊறவைப்பதற்கு முன், அதை நன்றாகக் கழுவவும். கழுவிய பிறகு, அதைத் தண்ணீரில் ஊறவைக்கவும். பலர் ஊறவைத்த தண்ணீரை வீணாகக் கொட்டிவிடுகின்றனர். அந்தத் தவறைச் செய்யாதீர்கள். பருப்பைத் தண்ணீரில் ஊறவைக்கும்போது, வைட்டமின் பி மற்றும் வைட்டமின் சி போன்ற ஊட்டச்சத்துக்கள் தண்ணீரில் கரைந்துவிடுகின்றன. அந்தத் தண்ணீரை நீங்கள் வீணாகக் கொட்டினால், எல்லா வைட்டமின்களும் போய்விடும். இதுபோன்று வீணாவதைத் தவிர்க்க, பருப்பை ஊறவைப்பதற்கு முன் 3 முதல் 4 முறை கழுவவும். தூசி, அழுக்கு மற்றும் பாலிஷ் அனைத்தையும் நீக்கிய பிறகு, நல்ல தண்ணீரை ஊற்றி ஊறவைக்கவும். அதே தண்ணீரை நீங்கள் சமைக்கப் பயன்படுத்தினால், எல்லா ஊட்டச்சத்துக்களும் பாதுகாப்பாக இருக்கும்.

தீட்டப்படாத பருப்புகளை விரும்புங்கள்: பருப்புகளின் பளபளப்பான தோற்றத்தைக் கண்டு ஏமாந்து விடாதீர்கள். செயற்கையாகத் தீட்டப்பட்ட பருப்புகளைக் காட்டிலும், இயற்கை அல்லது தீட்டப்படாத பருப்புகளில் அதிக இயற்கை ஊட்டச்சத்துக்களும் நார்ச்சத்தும் உள்ளன.

தரத்தில் சமரசம் செய்யாதீர்கள்: புரதச்சத்து நிறைந்த, கொழுப்புச்சத்து குறைந்த, மற்றும் அத்தியாவசிய ஊட்டச்சத்துக்களை வழங்கும் தரமான அல்லது நம்பகமான பருப்பு வகைகளைத் தேர்ந்தெடுங்கள்.

பருப்பு வகைகளைக் கலந்து சமைக்கவும்: தினமும் ஒரே வகையான பருப்பு வகைகளைச் சாப்பிடுவதற்குப் பதிலாக, மசூர் பருப்பு, கொண்டைக்கடலை மற்றும் ராஜ்மா போன்றவற்றை ஒன்றாகச் சமைத்துச் சாப்பிடுவது, உடலுக்குப் பலவிதமான அமினோ அமிலங்களையும் ஊட்டச்சத்துக்களையும் வழங்குகிறது.

உங்கள் சமையல் குறிப்புகளில் பன்முகத்தன்மையைக் காட்டுங்கள். பருப்பு சாதத்துடன் மட்டும் நின்றுவிடாமல், சாலடுகள், சிற்றுண்டிகள், பருப்பு தோசைகள் செய்வது அல்லது ரொட்டிகளில் மாவு சேர்ப்பது போன்ற புதிய விஷயங்களை முயற்சி செய்யுங்கள். பருப்பைக் கொண்டு எத்தனை சுவைகளில் வேண்டுமானாலும் செய்யலாம். அப்போது, பருப்பில் உள்ள அனைத்து ஊட்டச்சத்துக்களும் உங்களுக்குக் கிடைக்கும். நீங்கள் மிகவும் ஆரோக்கியமாகவும் இருப்பீர்கள்.

Aattukal Paya : தீபாவளி காலையில் எண்ணெய் குளியலுக்கு பிறகு சூடான இட்லி, மணக்க மணக்க ஆட்டுக்கால் பாயா!

Vishnupriya — Tue, 03 Nov 2026 16:27:04 +0530

Aattukal Paya: தீபாவளி காலையில் எண்ணெய் குளியல் முடித்து சூடான இட்லியுடன் மணக்க மணக்க ஆட்டுக்கால் பாயா சாப்பிட்டால் அசத்தல் சுவை. மென்மையான ஆட்டுக்கால், காரசாரமான மசாலா, தேங்காய் மணம் நிறைந்த பாயாவை வீட்டிலேயே எளிதாக செய்வது எப்படி? இதோ செய்முறை.

தீபாவளி என்றாலே அதிகாலையில் எழுந்து எண்ணெய் தேய்த்து, வெந்நீரில் குளித்து, புத்தாடை அணிந்து, வீட்டில் பட்டாசு சத்தம் முழங்க குடும்பத்துடன் கொண்டாடும் அந்த மகிழ்ச்சியே தனி.

அதிலும், தீபாவளி காலையில் குளித்துவிட்டு வந்து, ஆவி பறக்கும் இட்லியை தட்டில் வைத்து, அதன் மீது மணக்க மணக்க தயாரான ஆட்டுக்கால் பாயாவை ஊற்றி சாப்பிட்டால் அந்த சுவைக்கு ஈடு இணை எதுவுமே இருக்காது.

மென்மையான இட்லிக்குள் இறங்கும் ஆட்டுக்கால் பாயாவின் காரசாரமான சுவையும், மசாலா மணமும், நாவில் கரையும் ஆட்டுக்கால் துண்டுகளும் சேர்ந்து முதல் வேளையிலேயே தீபாவளியை இன்னும் சிறப்பாக்கிவிடும்.

ஹோட்டல் ஸ்டைலில், வீட்டிலேயே கெட்டியான சுவையான ஆட்டுக்கால் பாயா செய்து, இந்த தீபாவளியை வயிறும் மனமும் நிறைந்த கொண்டாட்டமாக மாற்றலாம். இதோ, இட்லிக்கு தொட்டுக்க சாப்பிட ஏற்ற ஆட்டுக்கால் பாயா செய்முறை.

ஆட்டுக்கால் வேகவைக்க

ஆட்டுக்கால் - 4 முதல் 6
பெரிய வெங்காயம் - 1
தக்காளி - 1
மஞ்சள் தூள் - 1\2 டீஸ்பூன்
உப்பு - தேவையான அளவு
தண்ணீர் - தேவையான அளவு

பாயா மசாலா தயாரிக்க

பெரிய வெங்காயம் - 2 (பொடியாக நறுக்கியது)
தக்காளி - 2 (நறுக்கியது)
இஞ்சி-பூண்டு விழுது - 2 டேபிள்ஸ்பூன்
பச்சை மிளகாய் - 2
மிளகாய் தூள் - 1 டீஸ்பூன்
மல்லித்தூள் - 2 டீஸ்பூன்
மஞ்சள் தூள் - 1\4 டீஸ்பூன்
கரம் மசாலா - 1\2 டீஸ்பூன்
மிளகுத்தூள் - 1\2 டீஸ்பூன்
தேங்காய் - 1\2 கப்
சோம்பு - 1 டீஸ்பூன்
கசகசா - 1 டீஸ்பூன் (விருப்பப்பட்டால்)
பட்டை - 1 சிறிய துண்டு
கிராம்பு - 3
ஏலக்காய் - 2
பிரியாணி இலை - 1
எண்ணெய் - 3 டேபிள்ஸ்பூன்
கறிவேப்பிலை - சிறிதளவு
கொத்தமல்லி - சிறிதளவு
உப்பு - தேவையான அளவு

ஆட்டுக்காலை சுத்தம் செய்தல்

ஆட்டுக்கால்களை வாங்கும்போதே நன்றாக சுத்தம் செய்து, முடிகள் நீக்கப்பட்டுள்ளதா என்பதை உறுதி செய்துகொள்ளவும். வீட்டிற்கு வந்ததும் வெந்நீரில் நன்றாக கழுவி, தேவையற்ற அழுக்குகளை நீக்கவும்.

ஒரு பாத்திரத்தில் ஆட்டுக்கால், மஞ்சள் தூள், சிறிதளவு உப்பு சேர்த்து நன்றாக அலசி மீண்டும் சுத்தமான தண்ணீரில் கழுவி எடுத்துக்கொள்ளவும்.

ஆட்டுக்காலை வேகவைத்தல்

குக்கரில் சுத்தம் செய்த ஆட்டுக்கால், ஒரு நறுக்கிய வெங்காயம், ஒரு தக்காளி, இஞ்சி-பூண்டு விழுது, மஞ்சள் தூள், உப்பு மற்றும் தேவையான அளவு தண்ணீர் சேர்த்து 10 முதல் 15 விசில் வரும் வரை வேகவைக்கவும். ஆட்டுக்கால் நன்றாக மென்மையாக வேக வேண்டும்.

குறிப்பு: ஆட்டுக்கால் எலும்பிலிருந்து எளிதாக பிரியும் அளவுக்கு வெந்திருக்க வேண்டும். வேகவைத்த தண்ணீரை வடிகட்டாமல் அப்படியே வைத்துக்கொள்ளவும். அதுதான் பாயாவுக்கு சுவையும் கெட்டித்தன்மையும் கொடுக்கும்.

தேங்காய் மசாலா அரைத்தல்

மிக்ஸி ஜாரில் தேங்காய், சோம்பு, கசகசா மற்றும் முந்திரி சேர்த்து தண்ணீர் சேர்த்து நைசாக அரைத்து வைத்துக்கொள்ளவும்.

பாயாவுக்கு மசாலா தாளித்தல்

ஒரு பெரிய அடிகனமான பாத்திரத்தில் எண்ணெய் ஊற்றி சூடானதும் பட்டை, கிராம்பு, ஏலக்காய், பிரியாணி இலை சேர்த்து தாளிக்கவும்.
பின்னர் நறுக்கிய வெங்காயம், பச்சை மிளகாய், கறிவேப்பிலை சேர்த்து பொன்னிறமாக வதக்கவும்.
இஞ்சி-பூண்டு விழுது சேர்த்து பச்சை வாசனை போகும் வரை வதக்கவும்.
தக்காளியை சேர்த்து நன்றாக மசியும் வரை வதக்கவும்.

மசாலா தூள்கள் சேர்த்தல்

இப்போது மிளகாய் தூள், மல்லித்தூள், மஞ்சள் தூள், கரம் மசாலா, மிளகுத்தூள் மற்றும் தேவையான அளவு உப்பு சேர்த்து குறைந்த தீயில் கிளறவும். மசாலா கருகாமல் இருக்க சிறிதளவு தண்ணீர் தெளித்து நன்றாக வதக்கவும்.

ஆட்டுக்கால் மற்றும் தேங்காய் விழுது சேர்த்தல்

வேகவைத்த ஆட்டுக்காலையும் அதன் தண்ணீரையும் மசாலாவில் சேர்த்து நன்றாக கிளறவும்.
பின்னர் அரைத்த தேங்காய் விழுதை சேர்த்து கலக்கவும்.
பாத்திரத்தை மூடி மிதமான தீயில் 10 முதல் 15 நிமிடங்கள் கொதிக்க விடவும்.

ஆட்டுக்கால் பாயா தயார்

ஆட்டுக்காலில் மசாலா நன்றாக இறங்கி, பாயா சற்று கெட்டியாகி எண்ணெய் மேலே மிதக்கத் தொடங்கும். இறுதியாக கொத்தமல்லி தூவி இறக்கினால் சுவையான ஆட்டுக்கால் பாயா தயார்.

பாயாவை முதல் நாள் இரவே தயாரித்து வைத்தால், மறுநாள் காலையில் மசாலா நன்றாக ஊறி இன்னும் சுவையாக இருக்கும்.
இட்லி மிகவும் மென்மையாகவும் சூடாகவும் இருக்க வேண்டும்.
பாயாவை இட்லியின் மீது ஊற்றி, சிறிதளவு மிளகுத்தூள் தூவி சாப்பிட்டால் ஹோட்டல் ஸ்டைல் சுவை கிடைக்கும்.
விருப்பப்பட்டால் பாயாவில் சிறிதளவு எலுமிச்சைச் சாறு சேர்த்து சாப்பிடலாம்.
பாயா மிகவும் தண்ணீராக இல்லாமல், இட்லிக்குள் இறங்கும் அளவுக்கு சற்று கெட்டியாக இருக்க வேண்டும்.
கூடவே வெங்காயம், கொத்தமல்லி தூவி பரிமாறினால் மணமும் சுவையும் அதிகரிக்கும்.

தீபாவளி காலையில் எண்ணெய் குளியல் முடித்து, புத்தாடை அணிந்து, வீட்டில் தயாரான சூடான இட்லியுடன் இந்த ஆட்டுக்கால் பாயாவை பரிமாறுங்கள். முதல் இட்லியிலேயே பாயாவின் மசாலா சுவை நாவில் இறங்க, குடும்பத்தினர் அனைவரும் இன்னும் ஒரு இட்லி கேட்பது நிச்சயம்.

இந்த பாயாவை இட்லி மட்டுமின்றி தோசை, ஆப்பம், இடியாப்பம் கியவற்றுடனும் சேர்த்து சாப்பிடலாம்.

Fish Curry : மீன் வாங்க வேண்டாம்! மீனே இல்லாமல் மீன் வறுவல் செய்யும் ரகசியம் இதோ!

Arun Mozhi Varman — Wed, 04 Nov 2026 09:00:44 +0530

Fish Curry : மீன் இல்லாமலேயே கத்தரிக்காயை வைத்து சுவையான மீன் வறுவல் போன்ற உணவைச் செய்யலாம். மசாலா சேர்த்து மொறுமொறுப்பாகத் தயாரிக்கும் இந்த வித்தியாசமான ரெசிப்பி இதோ!

மீன் வறுவல் சாப்பிட ஆசையாக இருக்கிறதா? வீட்டில் மீன் இல்லையென்றாலும் கவலை வேண்டாம். கத்தரிக்காயைப் பயன்படுத்தி மீன் வறுவல் போன்ற தோற்றத்திலும் காரசாரமான மசாலா சுவையிலும் ஒரு வித்தியாசமான உணவைத் தயாரிக்கலாம். கத்தரிக்காயைத் துண்டுகளாக நறுக்கி, மிளகாய்த்தூள், மல்லித்தூள், மஞ்சள்தூள் உள்ளிட்ட மசாலாக்களைச் சேர்த்து ஊறவைத்து வறுத்தால் சுவையான கத்தரிக்காய் வறுவல் கிடைக்கும். சைவ உணவு விரும்புபவர்களுக்கும் புதிய ரெசிப்பியை முயற்சி செய்ய நினைப்பவர்களுக்கும் இது நல்ல தேர்வு.

இதையும் படிங்க : Hospital Bill : கட்டணங்களை வெளியிடப் போகும் மருத்துவமனைகள்? இனி சிகிச்சைக்கு முன்பே தெரிஞ்சுக்கலாமா?

இந்த ரெசிப்பி செய்ய இரண்டு பெரிய கத்தரிக்காய்கள், ஒரு தேக்கரண்டி மிளகாய்த்தூள், அரை தேக்கரண்டி மஞ்சள்தூள், ஒரு தேக்கரண்டி மல்லித்தூள், அரை தேக்கரண்டி மிளகுத்தூள், அரை தேக்கரண்டி சீரகத்தூள், ஒரு தேக்கரண்டி இஞ்சி-பூண்டு விழுது, ஒரு தேக்கரண்டி எலுமிச்சைச் சாறு, தேவையான அளவு உப்பு, இரண்டு மேசைக்கரண்டி அரிசி மாவு, ஒரு மேசைக்கரண்டி கடலை மாவு மற்றும் வறுப்பதற்குத் தேவையான எண்ணெய் எடுத்துக்கொள்ளுங்கள். விருப்பப்பட்டால் சிறிதளவு கறிவேப்பிலையையும் சேர்க்கலாம்.

இதையும் படிங்க : Leftover Chapati : மீதமான சப்பாத்தியில் அல்டிமேட் டேஸ்டில் 6 சூப்பர் ரெசிப்பிக்கள்!

முதலில் கத்தரிக்காயைக் கழுவி, சுமார் அரை சென்டிமீட்டர் தடிமனுள்ள வட்டத் துண்டுகளாக நறுக்கிக்கொள்ளுங்கள். ஒரு பாத்திரத்தில் மிளகாய்த்தூள், மஞ்சள்தூள், மல்லித்தூள், மிளகுத்தூள், சீரகத்தூள், இஞ்சி-பூண்டு விழுது, எலுமிச்சைச் சாறு, உப்பு ஆகியவற்றைச் சேர்த்துக் கலக்கவும். இப்போது அரிசி மாவு, கடலை மாவு சேர்த்து, மசாலா கத்தரிக்காயின் மீது நன்றாகப் படியும்படி கலக்குங்கள். மாவு ஒட்டுவதற்குத் தேவையான அளவு மட்டும் தண்ணீர் தெளிக்கவும். மசாலா கத்தரிக்காயில் நன்றாகப் படியும்படி 15 முதல் 20 நிமிடங்கள் ஊறவிடுங்கள்.

ஒரு தவாவில் தேவையான அளவு எண்ணெய் ஊற்றி மிதமான தீயில் சூடாக்குங்கள். மசாலா தடவிய கத்தரிக்காய்த் துண்டுகளை ஒன்றுடன் ஒன்று ஒட்டாமல் அடுக்கவும். ஒரு பக்கம் பொன்னிறமாகவும் ஓரங்கள் மொறுமொறுப்பாகவும் மாறியதும் மறுபக்கம் திருப்பிப் போடுங்கள். கத்தரிக்காய் உள்ளே மென்மையாக வேகும் வரை மிதமான தீயில் வறுக்கவும். தேவைப்பட்டால் சிறிதளவு எண்ணெய் சேர்க்கலாம். தீயை அதிகமாக வைத்தால் வெளிப்புற மசாலா விரைவாகக் கருகிவிடலாம்; எனவே அவ்வப்போது திருப்பிப் போட்டு இருபுறமும் சீராக வேகவிடுங்கள்.

இப்போது மசாலா மணத்துடன் சுவையான கத்தரிக்காய் வறுவல் தயார். இதைச் சூடான சாதம், ரசம் சாதம் அல்லது தயிர் சாதத்துடன் பரிமாறலாம். கத்தரிக்காயைச் சற்று தடிமனாக நறுக்கினால் உள்ளே மென்மையாகவும் வெளிப்புறம் மொறுமொறுப்பாகவும் கிடைக்கும். மசாலா நன்றாகப் படிவதற்காக ஊறவைக்கும் நேரத்தைக் குறைக்க வேண்டாம். இந்த உணவு மீனைக் கொண்டு தயாரிக்கப்படும் வறுவல் அல்ல; மீன் வறுவலின் மசாலா சுவையை நினைவூட்டும் வகையில் செய்யப்படும் கத்தரிக்காய் வறுவல். வீட்டில் உள்ள எளிய பொருட்களைக் கொண்டு வித்தியாசமான சைவ உணவை முயற்சி செய்து பார்க்கலாம்.

இதையும் படிங்க : Wedding Invitation : பழைய கல்யாணப் பத்திரிகைகளைத் தூக்கிப் போடாதீங்க! மீண்டும் பயன்படுத்த 10 ஐடியாக்கள்!

Bread Samosa : மாவு பிசைய வேண்டாம்.. பிரெட்டை வைத்து மொறுமொறு சமோசா செய்யலாம்!

Arun Mozhi Varman — Thu, 05 Nov 2026 06:00:09 +0530

Bread Samosa : சமோசா செய்ய மாவு பிசைய வேண்டியதில்லை! பிரெட் துண்டுகளை வைத்து உருளைக்கிழங்கு மசாலா நிரப்பி மொறுமொறுப்பான சமோசா செய்வது எப்படி என்று பார்ப்போம்.

மாலை நேரத்தில் சூடான சமோசா சாப்பிட ஆசையாக இருக்கிறதா? அதற்காகத் தனியாக மாவு பிசைந்து, உருட்டி, வடிவம் கொடுக்க வேண்டிய அவசியமில்லை. வீட்டில் இருக்கும் பிரெட் துண்டுகளை வைத்தே முக்கோண வடிவில் சமோசா தயாரிக்கலாம். உள்ளே காரசாரமான உருளைக்கிழங்கு மசாலாவை நிரப்பி, எண்ணெயில் பொரித்தால் வெளிப்புறம் மொறுமொறுப்பாகவும் உள்ளே மென்மையாகவும் இருக்கும். வழக்கமான சமோசாவுக்கு மாற்றாக எளிமையான சிற்றுண்டியை முயற்சி செய்ய விரும்புபவர்களுக்கு இந்த பிரெட் சமோசா நல்ல தேர்வாக இருக்கும்.

இதையும் படிங்க : Kitchen Tips : புதுப் பாத்திரத்தில் ஸ்டிக்கரை நீக்கியும் பிசுபிசுப்பா இருக்கா? இந்த 5 எளிய வழிகளை முயற்சி பண்ணுங்க!

இந்த பிரெட் சமோசா தயாரிக்க 6 முதல் 8 பிரெட் துண்டுகள், 2 வேகவைத்த உருளைக்கிழங்குகள், ஒரு சிறிய வெங்காயம், 1 பச்சை மிளகாய், சிறிதளவு இஞ்சி, அரை தேக்கரண்டி மிளகாய்த்தூள், கால் தேக்கரண்டி மஞ்சள்தூள், அரை தேக்கரண்டி கரம் மசாலா, சிறிதளவு சீரகம், உப்பு, கொத்தமல்லித்தழை ஆகியவற்றை எடுத்துக்கொள்ளவும். விருப்பப்பட்டால் வேகவைத்த பச்சைப் பட்டாணியையும் சேர்க்கலாம். பிரெட் துண்டுகளின் ஓரங்களை ஒட்டுவதற்கு சிறிதளவு தண்ணீரும், சமோசாவைப் பொரிப்பதற்குத் தேவையான எண்ணெயும் எடுத்துக்கொள்ளவும்.

இதையும் படிங்க : சென்னையிலிருந்து 8 மணி நேர பயணத்தில் இப்படியொரு இடமா? பூமிக்கு அடியில் 150 அடி ஆழத்தில் ஒளிந்திருக்கும் அதிசயம்!

முதலில் கடாயில் சிறிதளவு எண்ணெய் ஊற்றி சீரகம் சேர்க்கவும். பின்னர் பொடியாக நறுக்கிய வெங்காயம், பச்சை மிளகாய், இஞ்சி ஆகியவற்றைச் சேர்த்து வதக்கவும். வெங்காயம் வதங்கியதும் மிளகாய்த்தூள், மஞ்சள்தூள், கரம் மசாலா மற்றும் உப்பு சேர்க்கவும். இப்போது வேகவைத்து மசித்த உருளைக்கிழங்கைச் சேர்த்து நன்றாகக் கிளறவும். விருப்பப்பட்டால் வேகவைத்த பட்டாணியையும் சேர்க்கலாம். இறுதியாகக் கொத்தமல்லித்தழை தூவி இறக்கவும். மசாலாவில் அதிக ஈரப்பதம் இருக்கக்கூடாது; அப்படியிருந்தால் பிரெட் விரைவில் நனைந்து கிழிய வாய்ப்புள்ளது. மசாலாவை ஆறவிடவும்.

இதையும் படிங்க : Top 7 SUV Cars : 29 கி.மீ மைலேஜ் முதல் 100 கி.மீ வேகத்தை 9 நொடிகளில் எட்டும் திறன் வரை... டாப் 7 SUV கார்கள்!

பிரெட் துண்டுகளின் ஓரங்களை விருப்பப்பட்டால் வெட்டி நீக்கவும். பின்னர் சப்பாத்திக் கட்டையால் மெதுவாக உருட்டி, பிரெட்டைச் சற்றுத் தட்டையாக்கவும். ஒரு துண்டைப் பாதியாக வெட்டி, ஒவ்வொரு பாதியையும் கூம்பு அல்லது முக்கோண வடிவில் மடிக்கவும். ஓரங்களில் சிறிதளவு தண்ணீர் தடவி ஒட்டவும். உள்ளே தயாரித்த உருளைக்கிழங்கு மசாலாவை நிரப்பி, திறந்த பகுதியையும் நன்றாக அழுத்தி மூடவும். பிரெட் கிழியாமல் இருக்க அதிகமாகத் தண்ணீர் தடவ வேண்டாம்; மசாலாவையும் அளவாக நிரப்பவும்.

கடாயில் எண்ணெயை மிதமான சூட்டில் காயவைக்கவும். தயாரித்து வைத்துள்ள பிரெட் சமோசாக்களை எண்ணெயில் மெதுவாக விடவும். அவை பொன்னிறமாக மாறும் வரை திருப்பித் திருப்பிப் பொரிக்கவும். எண்ணெய் மிகவும் சூடாக இருந்தால் வெளிப்புறம் மட்டும் விரைவாக நிறம் மாறி, சமோசா சரியாகப் பொரியாமல் போகலாம். அதேபோல் எண்ணெய் போதிய அளவு சூடாக இல்லாவிட்டால் பிரெட் அதிக எண்ணெயை உறிஞ்சலாம். எனவே மிதமான சூட்டில் கவனமாகப் பொரிப்பது நல்லது. பொரித்த சமோசாக்களை எண்ணெய் வடிகட்டும் தட்டில் எடுத்து வைக்கவும்.

வெளிப்புறம் மொறுமொறுப்பாகவும் உள்ளே காரசாரமான உருளைக்கிழங்கு மசாலாவுடனும் இருக்கும் பிரெட் சமோசாவைச் சூடாகப் பரிமாறலாம். இதனுடன் புதினா சட்னி, தக்காளி சாஸ் அல்லது உங்களுக்குப் பிடித்த சட்னியைச் சேர்த்துச் சாப்பிடலாம். பிரெட்டில் ஈரப்பதம் அதிகமாக இருந்தால் சமோசா கிழியக்கூடும் என்பதால், மசாலாவை நன்றாக ஆறவைத்து, பிரெட்டை மென்மையாகக் கையாள்வது முக்கியம். வழக்கமான சமோசா மாவு தயாரிப்பதைத் தவிர்த்து, வீட்டில் இருக்கும் பிரெட்டைக் கொண்டு விரைவாகச் செய்யக்கூடிய சிற்றுண்டி இது.