டாஸ் ஜெயிச்சு பேட்டிங் எடுத்து தப்பி பண்ணிய சன்ரைசர்ஸ் – அகமதாபாத் 2ஆவது பேட்டிங்கிற்கு தான் சாதகம்!

அகமதாபாத் மைதானத்தில் நடைபெற்ற போட்டிகளில் 2ஆவது பேட்டிங் செய்த அணி தான் அதிக முறை வெற்றி பெற்றிருக்கிறது. அப்படியிருக்கும் போது சன்ரைசர்ஸ் பேட்டிங் தேர்வு செய்து தப்பு செய்துவிட்டது.

KKR vs SRH IPL 2024

அகமதாபாத் மைதானத்தில் நடைபெற்று வரும் ஐபிஎல் 2024 தொடரின் முதல் தகுதிச் சுற்று போட்டியில் கொல்கத்தா நைட் ரைடர்ஸ் அணிக்கு எதிராக முதலில் டாஸ் வென்ற சன்ரைசர்ஸ் ஹைதராபாத் கேப்டன் பேட் கம்மின்ஸ் பேட்டிங் தேர்வு செய்துள்ளார். ஆனால், இந்த மைதானத்தில் 2ஆவது பேட்டிங் செய்த அணியே அதிகளவில் வெற்றி பெற்றிருக்கிறது. இரு அணிகளிலும் எந்தவித மாற்றங்களும் செய்யப்படவில்லை.

சன்ரைசர்ஸ் ஹைதராபாத்:

டிராவிஸ் ஹெட், அபிஷேக் சர்மா, ராகுல் திரிபாதி, நிதிஷ் ரெட்டி, ஹென்ரிச் கிளாசென் (விக்கெட் கீப்பர்), அப்துல் சமாத், ஷாபாஸ் அகமது, பேட் கம்மின்ஸ் (கேப்டன்), புவனேஷ்வர் குமார், விஜயகாந்த் வியாஷ்காந்த், டி நடராஜன்.

கொல்கத்தா நைட் ரைடர்ஸ்:

ரஹ்மானுல்லா குர்பாஸ் (விக்கெட் கீப்பர்), சுனில் நரைன், வெங்கடேஷ் ஐயர், ஷ்ரேயாஸ் ஐயர் (கேப்டன்), ரிங்கு சிங், ஆண்ட்ரே ரஸல், ரமன்தீப் சிங், மிட்செல் ஸ்டார்க், வைபவ் அரோரா, ஹர்ஷித் ராணா, வருண் சக்கரவர்த்தி.

டிராவிஸ் ஹெட் மற்றும் அபிஷேக் சர்மா இருவரும் தொடக்க வீரர்களாக களமிறங்கினர். இதில், ஹெட் முதல் ஓவரிலேயே கிளீன் போல்டானார். ரன் ஏதும் எடுக்கவில்லை. மிட்செல் ஸ்டார்க் வீசிய முதல் ஓவரின் 2ஆவது பந்திலேயே ஹெட் ஆட்டமிழந்துள்ளார். இவரைத் தொடர்ந்து அபிஷேக் சர்மா 3 ரன்னில் ஆட்டமிழந்தார். தற்போது வரையில் ஹைதராபாத் 2 ஓவர்கள் முடிவில் 2 விக்கெட்டுகளை இழந்து 13 ரன்கள் மட்டுமே எடுத்து விளையாடி வருகிறது.

நடப்பு ஆண்டுக்கான ஐபிஎல் தொடரில் கொல்கத்தா நைட் ரைடர்ஸ் விளையாடிய 14 போட்டிகளில் 9ல் வெற்றியும், 3ல் தோல்வியும் அடைந்துள்ளது. அதோடு 2 போட்டிகளுக்கு முடிவு இல்லை. மேலும், புள்ளிப்பட்டியலில் நம்பர் 1 இடம் பிடித்து பிளே ஆஃப் சுற்றுக்கு முதல் அணியாக தகுதி பெற்றது.

இதே போன்று சன்ரைசர்ஸ் ஹைதராபாத் விளையாடிய 14 போட்டிகளில் 8ல் வெற்றியும், 5ல் தோல்வியும் அடைந்து புள்ளிப்பட்டியலில் 2ஆவது இடம் பிடித்தது. ஒரு போட்டிக்கு முடிவு இல்லை. இதற்கு முன்னதாக இரு அணிகளும் மோதிய 26 போட்டிகளில் 17 போட்டிகளில் கொல்கத்தா நைட் ரைடர்ஸ் வெற்றி பெற்றுள்ளது.

சன்ரைசர்ஸ் ஹைதராபாத் 9 போட்டிகளில் வெற்றி பெற்றுள்ளது. இந்த சீசனில் இரு அணிகளும் மோதிய ஒரு போட்டியிலும் கேகேஆர் 4 ரன்கள் வித்தியாசத்தில் வெற்றி பெற்றுள்ளது. 

முதல் முறையாக இரு அணிகளும் அகமதாபாத் நரேந்திர மோடி மைதானத்தில் மோதுகின்றன. இந்த மைதானத்தில் இதுவரையில் நடைபெற்ற 33 போட்டிகளில் முதலில் பேட்டிங் செய்த அணி 15 போட்டியிலும், சேஸ் செய்த அணி 18 போட்டியிலும் வெற்றி பெற்றுள்ளன. இந்த சீசனில் இந்த மைதானத்தில் நடைபெற்ற 6 போட்டிகளில் முதலில் பேட்டிங் செய்த அணி 2 போட்டியிலும், 2ஆவது பேட்டிங் செய்த அணி 4 போட்டியிலும் வெற்றி பெற்றுள்ளன என்பது குறிப்பிடத்தக்கது.