GOAT Movie: தளபதியின் 'GOAT' படத்தின் தமிழக உரிமையை... மிகப்பெரிய தொகைக்கு கைப்பற்றிய பிரபல நிறுவனம்!

கோட் படத்தின் தமிழக டிஸ்ட்ரிபியூஷன் உரிமையை பிரபல நிறுவனம், மிகப்பெரிய தொகைக்கு கைப்பற்றி உள்ளதாக அதிகாரப்பூர்வ தகவலை படக்குழு வெளியிட்டுள்ளது. 

கோலிவுட் திரை உலகின், வசூல் மன்னனாக இருக்கும் தளபதி விஜய்க்கு தமிழகத்தை தாண்டி தெலுங்கு, மலையாளம், கன்னடம், உள்ளிட்ட தென்னிந்திய மொழிகளிலும் ஏகப்பட்ட ரசிகர்கள் உள்ளனர். கடந்த 36 வருடங்களாக தமிழ் சினிமாவில் தன்னைத்தானே செதுக்கிக் கொண்டு, யாரும் எட்ட முடியாத உயரத்தை எட்டி இருக்கும் தளபதி விஜய், தற்போது ரூ.200 கோடி சம்பளம் வாங்கும் நடிகராக உயர்ந்துள்ளார்.

இந்நிலையில் தளபதி விஜய், கடந்த ஆண்டு தன்னுடைய அரசியல் பிரவேசத்தை உறுதி செய்ததை தொடர்ந்து, கோட் படத்தை முடித்த பின்னர் அடுத்ததாக நடிக்கும் 69 ஆவது படம் தான் தன்னுடைய கடைசி திரைப்படம் என்பதையும் உறுதி செய்துள்ளார். எனவே தளபதி விஜய் நடித்து வரும் 'கோட்' மற்றும் அவருடைய அடுத்த படம் மீதான எதிர்பார்ப்பு ரசிகர்கள் மத்தியில் எக்கச்சக்கமாக எகிறி உள்ளது.

GOAT

கோட் படத்தின் படப்பிடிப்பு பணிகள் பெருமளவு முடிவடைந்துவிட்ட நிலையில், இன்னும் ஒரு சில காட்சிகள் மட்டுமே எடுக்கப்பட உள்ளதாக கூறப்படுகிறது. இந்த படத்தை ஏஜிஎஸ் என்டர்டேயின்மென்ட் நிறுவனம் ரூ.350 கோடி செலவில் தயாரித்துள்ளது. இயக்குனர் வெங்கட் பிரபு இயக்கியிருக்கும் இந்த படத்திற்கு, அவரின் ஆஸ்தான இசையமைப்பாளர் யுவன் சங்கர் ராஜா இசையமைத்துள்ளார்.

இந்த படத்தில் இருந்து இதுவரை வெளியாகியுள்ள ஃபர்ஸ்ட் லுக், செகண்ட் லுக்  மற்றும் முதல் சிங்கிள் இரண்டாவது சிங்கிள் என அனைத்திற்குமே ரசிகர்கள் மத்தியில் நல்ல வரவேற்பு கிடைத்தது. மேலும் அடுத்தடுத்து இப்படம் குறித்த தகவல்கள் தொடர்ந்து வெளியாகி வருவதையும் பார்க்க முடிகிறது. விஜய் பிகில் படத்திற்கு பின்னர் இரட்டை வேடத்தில் நடித்துள்ள இந்த படத்தில், அப்பா விஜய்க்கு ஜோடியாக நடிகை சினேகா நடித்துள்ளதாகவும்... மகன் விஜய்க்கு ஜோடியாக நடிகை மீனாட்சி சௌத்ரி நடித்துள்ளதாகவும் கூறப்படுகிறது.

 இவர்களை தவிர மைக் மோகன், லைலா, பிரசாந்த், பிரபுதேவா, அஜ்மல், போன்ற ஏராளமான பிரபலங்கள் நடித்துள்ளனர். கூடிய விரைவில் இப்படத்தின் ஆடியோ லான்ச் குறித்த தகவல் வெளியாகலாம் என எதிர்பார்க்கப்படும் நிலையில், தற்போது இந்த படத்தின் தமிழக உரிமையை கைப்பற்றி உள்ள நிறுவனம் குறித்த தகவலை பட குழு அதிகாரப்பூர்வமாக அறிவித்துள்ளது. அதன்படி 'தி கிரேட்டஸ்ட் ஆஃப் ஆல் டைம்' திரைப்படத்தின் தமிழக உரிமையை, ரோமியோ பிக்சர்ஸ் நிறுவனம் மிகப்பெரிய தொகைக்கு கைப்பற்றி உள்ளதாக கூறப்படுகிறது. 

 அதே போல் கேரள உரிமையை கோகுலம் நிறுவனம் கைப்பற்றியுள்ளது. தளபதியின் கோட் திரைப்படம் தீபாவளியை முன்னிட்டு வெளியாக உள்ளது குறிப்பிடத்தக்கது.