ரூ.2840 கோடி சொத்து.. அமெரிக்காவின் 100 பணக்கார பெண்கள் பட்டியலில் இடம்பிடித்த இந்திய வம்சாவளி பெண்..

2024 ஆம் ஆண்டில் அமெரிக்காவின் 100 பணக்கார பெண்களின் பட்டியலில் இந்திய வம்சாவளி பெண் இந்திரா நூயி இடம்பெற்றுள்ளார்.

Entrepreneur

இந்தியாவில் பிறந்த பலர் பல உலகளாவிய நிறுவனங்களை வெற்றிகரமாக வழிநடத்தியுள்ளனர். பல வருடங்கள் உலகின் முன்னணி நிறுவனங்களை சி.இ.ஓவாக இருந்துள்ளனர். அப்படிப்பட்டவர்களில் ஒருவர் தான் பெப்சிகோவின் முன்னாள் தலைமை நிர்வாக அதிகாரி இந்திரா நூயி. அவர் 2006 முதல் 2018 வரை 12 ஆண்டுகள் பெப்சி நிறுவனத்தை வழிநடத்தினார்.

68 வயதான அவர் 2017-ம் ஆண்டு 31 மில்லியன் டாலர், அதாவது கிட்டத்தட்ட ரூ. 200 கோடி சம்பளம் பெற்றார். 2017-ம் ஆண்டு தான் நிறுவனத்தின் தலைமைப் பொறுப்பில் அவரது கடைசி முழு ஆண்டு. 'தனது வாழ்க்கையில் வித்தியாசமாக ஏதாவது செய்ய வேண்டும்' என்று வேலையை ராஜினாமா செய்தார்.

ஃபோர்ப்ஸின் கூற்றுப்படி, மே 28, 2024 நிலவரப்படி அவர் ரூ. 2840 கோடி (340 மில்லியன் அமெரிக்க டாலர்கள்) சொத்து மதிப்பைக் கொண்டுள்ளார். 2024 ஆம் ஆண்டில் அமெரிக்காவின் 100 பணக்கார பெண்களின் பட்டியலில் இந்திய வம்சாவளி பெண் இந்திரா நூயி இடம்பெற்றுள்ளார். பெப்சிகோவில் பணிபுரியும் போது அவர் கோடிக்கணக்கில் சம்பளம் பெற்றார். .

பெப்சிகோவை விட்டு வெளியேறிய பிறகு, நூயி 2019 இல் அமேசான் குழுவிலும், 2022 இல் டாய்ச் வங்கியின் உலகளாவிய ஆலோசனைக் குழுவிலும் சேர்ந்தார்.

இந்திரா நூயி 1955 ஆம் ஆண்டு அக்டோபர் 28 ஆம் தேதி, இந்தியாவில், அதுவும் நம் சென்னையில் பிறந்தார். அவர் தனது பள்ளிப்படிப்பை தி.நகரில் உள்ள ஹோலி ஏஞ்சல்ஸ் ஆங்கிலோ இந்தியன் மேல்நிலைப் பள்ளியில் பயின்றார்.

1975 இல் மெட்ராஸ் பல்கலைக்கழகத்தின் மெட்ராஸ் கிறிஸ்டியன் கல்லூரியில் இயற்பியல், வேதியியல் மற்றும் கணிதம் ஆகியவற்றில் இளங்கலைப் பட்டங்களைப் பெற்றார், மேலும் 1976 இல் ஐஐடி கல்கத்தாவில் முதுகலை திட்ட டிப்ளோமாவைப் பெற்றார்.

இந்திரா ஜான்சன் & ஜான்சன் மற்றும் மேட்டூர் பியர்ட்செல் ஆகிய நிறுவனங்களில் தனது கெரியரை தொடங்கினார். அவர் 1978 இல் அமெரிக்காவிற்கு குடிபெயர்ந்தார். அங்கு எம்.பி.ஏ படித்தார். 2006 இல் அமெரிக்காவின் சில பெண் CEO களில் ஒருவராக மாறினார்.

இந்திரா 1981 ஆம் ஆண்டு AmSoft Systems இன் தலைவர் ராஜ் K. நூயியை மணந்தார். இந்த தம்பதிக்கு  இரண்டு மகள்கள் உள்ளனர். தற்போது அவர் அமெரிக்காவில் வசித்து வருகிறார்.